Matthew 16

Diga Sing Ne Iesu Kusu Na Lok Tavanga Sangsangu

(Mk 8:11-13; Lu 12:54-56)

Lubung Parisi mi lubung Sadiusi diga vosiga ne Iesu la diga vara i do neni na lok tavanga sangsangu xusu dina lok tong pen i. La ne Iesu ga lok tidi xeretna, “Do mi ven laxalibet i memele ukantinao, mi lok, ‘Laaleng naba lox avukat kantamak.’ La do maxantamak, mi lok, ‘Larakabu mo naba vot mila laxalibet i memele la lengkontakabu bok mo.’ Mi reven lavatbung menemen la laxalibet; la mi epovo ri tong asu lavasuun at na lempanga, ketla xopmen mina xasep at leveloklok katling ne Moroa im taba nimi min at na levenaleng. Limixin kapmek mo di on basinge vam ne Moroa, di vara tavanga sangsangu, ketla nia noxo lox ase di mi tara, ketla mina doma mumu loklok katling at ne Jona, no ga nemen at lavantun aleng kangking la lavantun aleng kanimin to xeneng at lebelen leemat.” La ne Iesu ga vas kaxat basinge di.

Levenanasa At Lubung Parisi Mi Lubung Sadiusi

(Mk 8:14-21)

Iesu mi luvuttadi loklok ka anasa ren, diga los kas at lesepang la diga sen kaxat uto at lenep meo ap mo lavatdan kis. La luvuttadi loklok ka anasa diga domampe i xusu dina lok ka tengkongkide eburu midi. La ne Iesu ga lok tidi, “Mina lok tatao avukat nimi mumu laiis at lubung Parisi mi lubung Sadiusi.”
Laiis i ru katling leveloklox ase at lubung Parisi mi lubung Sadiusi.


La luvuttadi loklok ka anasa ren diga epaase kantubu atdi xeretna, “I vaase mo levelinga mila nedik kopmen ta lok ka tengkongkide.”

Iesu ga xasep pam at levelinga atdi, kuren la ni ga sue di, “Tila mi emaangun pilo min kantubu atnimi, mumu lengkongkide xopmen mina lok ka i? Lunuunu atnimi i lixilik. Kovisi mina xasep. Kereva, mira domampe vam lavalimo lengkongkide aga sebex i ri lavalimo larabin sangsangaun kobot (5000) limixin? La lavanisa leventat nemi miga suxa i? 10 Kereva, mira domampe vam lavanuet larabin sangsangaun kobot (4000) limixin aga raba di mi lavanuti lengkongkide? La lavanisa leventat miga suxa i? 11 Tila la mixo xasep do nenia xopmen ana paase rinimi mumu lengkongkide? Mina lok tatao avukat nimi mumu laiis at lubung Parisi mi lubung Sadiusi.” 12 Melemu levendoxoma atdi ga xasep ba do, Iesu xopmen goxo paase ridi mumu laiis dik lox eburu i mi lengkongkide; ketla mumu levenanasa
Di goxo xasep do digak pakes kusu dina ru asepsu at levenanasa at lubung Parisi.
at lubung Parisi la lubung Sadiusi.

Pita Ga Tong Asu Lorooro At Ne Iesu

(Mk 8:27-30; Lu 9:18-21)

13 Ap mo laaleng ne Iesu ga vot to at lenep kangka saparap lemenemen, Sisaria Pilipai, la ni ga sue luvuttadi loklok ka anasa ren, “Limixin di lok do nenia, Laradi Mevana, nege?”

14 La diga vorang i rin keretna, “Lentaba di lok do nenu ne Jon laradi sep susu. Lentaba di tong i do nenu ne Elaisa, la lentaba di tong i do nenu ne Jeremia kopla lara leeme vapaase alii me gano.” 15 La ne Iesu ga sue di, “Kereva ba nimi? Nemi mi lok do nenia nege?” 16 Simon Pita ga vorang i xeretna, “Nenu Lanarong, Nitna ne Moroa, Loroo Avolo.”

17 Iesu ga lok tin, “Luvukat tu, ne Simon lamdak at ne Jona, mila kopmen taradi ga tong asu i na ru, ketla ne Tamak no vana at laxalibet. 18 Nia a tong i ru do, nenu ne Pita la nenu Luat Kis la nia aba vaxaru ka lotu rak to mavana ram, la limixin lolos at ne Satan diba lok tong i kusu dina sele utut kepe i, ketla di noxo epovo. 19 Nia aba raba u mi lengki ri suang lumusaragu at Linintoo no vana at laxalibet. La mo leveloklok nenu u siam min kopla u sep pepe i nade xopok at na lavatbung menemen, ne Moroa naba siam min to vana at laxalibet.” 20 La neni ga vaase lolos ti luvuttadi loklok ka anasa ren do di noxo tong asu i na ri teta.

Iesu Ga Paase Mumu Lanmet Teren

(Mk 8:31-9:1; Lu 9:22-27)

21 Ga se ap mo laaleng ne Iesu ga ru ka i xusu na tong i ri luvuttadi loklok ka anasa ren do neni na onon uto Jerusalem; la mo go loxongkulao silok, lavamaasa silok la luvuttadi loklox ase at Lenavolo diba lox asongot aleng i la diba sev amer i la at laaleng sepsev avantun neni naba roo xat amlong.

22 Pita ga lam ka ne Iesu basinge luvuttadi loklok ka anasa la ga vaase sox i xeretna, “Leeme Silok. Nemen uta paase xeretnom. Na lempanga xapmek kopmen noxo vot saparav u.”

23 Iesu ga rem gili ri ne Pita la ga lok tin, “Uto u basinge ia. Nenu u lok ngan ne Satan. U vara i do una lok pe ia. U xopara na mu asu lavavara at ne Moroa, ketla u vara mun levendoxoma at limixin.”

24 La ne Iesu ga lok ti luvuttadi loklok ka anasa ren, “Mo do tara i vara i do na emu eburu minia, neni na domampe lorooro axap teren, la na gagas li i xusu nap kip losongsongot at levenaleng axap, la neni na mumu asu ba ia. 25 Do nege i vara i do na ranga alis lorooro ren, neni naba sang apkav i; ket do nege i soxope lorooro ren ti mumu asu ia, neni naba lok kaka lorooro avolo. 26 I lok kapmek do taradi na ruuna ka lempanga axap at na lavatbung menemen, ketla neni i subu basinge lorooro at ne Moroa. Laradi ixo epovo na un ka lorooro avolo. 27 Nenia, Laradi Mevana, mo anaba vot mi lisisixam silok at ne Tamak la eburu mi lubungangelo, la ap mo laaleng limixin axap dinaba lok kaka luunun i epovo mi leveloklok diga lox i. 28 La a tong tuturun i rinimi do lentaba atdi di tu de, di noxo met avot ti lovotpot tarak at laaleng nenia, Laradi Mevana, anaba vot ngan Loorong Silok.”

Copyright information for `MMX