Matthew 17

Moroa Ga Lox Arepukus Ne Iesu

(Mk 9:2-13; Lu 9:28-36)

Melemu at lavanna levenaleng Iesu ga sat kaka ne Pita, Jems du lueton mi ne Jon, la diga urut uto vana xasep at lakaana. Nedi lavanuet kusuk mun digak lok. Ap mo loxot Moroa ga lox arepukus ne Iesu to melamgo at lavantun luvuttadi loklok ka anasa ren. Lemeren ga soosoo ngan laxangking la lempanga singsiga ren gan bun kerekngan lovottas i sovosok. La soso mun ne Moses la ne Elaisa duga rupot to melamgo atdi la duga epaase eburu mi ne Iesu.

La ne Pita ga lok ti ne Iesu, “Leeme Silok. I lox avukat tinotno do mak lok de. Do u vara i, nia anaba xip tavantun taraugu kukuxut, tara ru, tara ri ne Moses la tara ri ne Elaisa.”

Pita move ga paase la lusugao gamgames ga ravasi la ga vaa di; la diga ronga laxaka at lara boro at lusugao ga lok, “Ana ne Nuruk, mo a balamu i la a lok momo aleng min. Mina mumu asu levelinga ren.”

Ga se luvuttadi loklok ka anasa diga ronga i na, diga subu tiding ti laxangka, la diga marat aleng. Ketla ne Iesu ga vosiga di la ga long tu atdi la ga lok tidi, “Mina xatu upana. Nemen mita marat.” La diga milik aurut upana la di goxo ven tara, Iesu xusuk mun mo gak lok.

Diga si at lakaana la ne Iesu ga tong lolos i ridi do, “Nemen mita tong i na ri teta, se nenia, Laradi Mevana, anaba roo xat amlong basinge lanmet.”

10 La luvuttadi loklok ka anasa ren diga sue i, “Ua lavasuun teren la luvuttadi loklox ase at Lenavolo di tong i do ne Elaisa ba rupot avot ti Lanarong?”

11 La ne Iesu ga vorang i ridi, “I ruturun tino. Elaisa ba rupot avot la ba lox amokso lempanga axap. 12 Ketla a tong i rinimi do ne Elaisa ga vot pam la limixin di goxo ven kibis i, la diga lok lempanga xapmek tin kerekngan diga vara i. La kuren mun diba lox asongor ia, Laradi Mevana.” 13 La luvuttadi loklok ka anasa diga xasep ba do ne Iesu ga paase mumu ne Jon, laradi sep susu.

Iesu Ga Riki Asu Lagas Basinge Lara Lamdak

(Mk 9:14-29; Lu 9:37-43a)

14 Iesu mi luvuttadi loklok ka anasa ren digat pas la diga ekip tangarang mi limixin buaang, la lara laradi ga vot pasa ne Iesu la ga xis tiktikbu mi luvatgulom teren. 15 La ni ga lok, “Leeme Silok. Una balamu lamdak tarak. Ing kanovot amisik mi lobomet la i ekip tangarang aleng mi laxasongsongot. La im subu tup amisik at laxao la at ladan. 16 Nia a lam ka i saparap luvuttadi loklok ka anasa ram kusu dina lox aroo i, ketla dixo epovo.”

17 La ne Iesu ga lok, “Limixin at na levenaleng kopmen tunuunu atnimi la levendoxoma atnimi i onon soogong. Lavanisa aleng tinotno nenia aba xip tutu mi levenmumuat atnimi? Nemi mi lox amolo ia. Una lam ka lamdak ude.” 18 La ne Iesu ga vaase lolos ti mo lagas, la lagas ga sixisu basinge nom lamdak. La ap mo mun loxonaleng lamdak ga lox avukat ta.

19 Melemu luvuttadi loklok ka anasa xusuk mun diga vosiga ne Iesu la diga sue i, “Ua lavasuun teren la nema ma xo epovo xusu mana riki kepe nom lagas?”

20 La ne Iesu ga vorang i ridi xeretna, “Lunuunu atnimi i lixilik aleng. Do mi ruuna lunuunu i xakalik kerekngan liit mastet, nemi miba epovo na lok ti na lakaana, ‘Una vas kaxat mede la uto at toxot petpes,’ la ni ba ronga res. La miba epovo na lok lempanga axap bok. 21 [Lisingising kusuk mene impana ri riki xepe lagas kapmek keretnom.”]

Iesu Ga Paase Manga Mumu Lanmet Teren

(Mk 9:30-32; Lk 9:43b-45)

22 Gase ne Iesu eburu mi luvuttadi loklok ka anasa diga vot eburu ro Galili, Iesu ga lok tidi, “I auret kusu limixin diba ranga alis ia, Laradi Mevana la diba song araba ia ri limixin esep. 23 La diba sev amer ia; ketla melemu nenia anaba roo xat amlong bok at laaleng sepsev avantun.” La luvuttadi loklok ka anasa diga bulu aleng.

Lexekepe Pilas Ti Loogu Laplavang

24 Iesu eburu mi luvuttadi loklok ka anasa ren diga rupot to Kaprenaum, la luvuttadi loklok ka pilas diga vosiga ne Pita la diga sue i, “Kereva, laradi loklox ase ram i kepe pilas bok ti loogu laplavang?”

25 La ne Pita ga vorang i, “Laaba.”

Pita ga vot to at loogu ne Iesu gak lok teren, la ne Iesu ga vaase avot tin, la ga lok, “Simon. Kereva lodoxoma ram? Lavaorong silok at na lavatbung menemen di lok ka pilas meva? At limixin at lenep silok atdi kopla at limixin boro vetpes?”

26 Pita ga lok, “At limixin boro vetpes.”

La ne Iesu ga lok, “I ven ngan ta do limixin mede kopmen di noxo kepe pilas. Kuren la ixo epovo do neda ta kepe pilas.
27 Ketla ta noxo lox amusak nedi na limixin. Kuren la unat pas uto at lavatdan kis la una xanom. La leemat avot una rep ka i, uba long lenget ka legesa derakma silok to xeneng at lungusno la mo legesa derakma silok naba epovo rida kusu ri kepe pilas ti loogu laplavang.”

Copyright information for `MMX