Matthew 18

Nege I Silok At Linintoo At Ne Moroa

(Mk 9:33-37; Lu 9:46-48)

Ap mo mene loxonaleng luvuttadi loklok ka anasa at ne Iesu diga vot pasa i la diga sue i, “Nege i silok at Linintoo boro vana at laxalibet?”

La ne Iesu ga ro ka lara lamdak, la ga vaxaru i ro melamgo atdi, la ga lok, “A tong tuturun i rinimi, tara do ixo leeng basinge laxakapmek teren la ixo lok ka luruptuvuk at laxamdak kakalik, neni xopmen na epovo do na vubeles at Linintoo no vana at laxalibet. Laradi do i lox asi i se luruptuvuk teren i lok ngan luruptuvuk at lamdak lixilik, mo laradi naba ruuna ka laasen i silok aleng at Linintoo no vana at laxalibet. La do nege i seega rangarang tamdak keretna at laasen tarak, i lok ngan ta do neni i seega rangarang ia.”

Leveloklok Tong Pen Mo Naba Vot

(Mk 9:42-48; Lk 17:1-2)

La ne Iesu ga lok bok, “Naba lok kapmek aleng ti tara do na lox asubu tara atdi na laxamdak kakalik di nuunu rak. Ba lox avukat tin do dina xoxo li tangsangan tuat to at laxaka ren la dina dong asi i min uto xopok at lisimaramain. I lok kapmek aleng ti limixin do lentaba lempanga mo i lox asubu lunuunu atdi basinge ia. Lempanga xerepmo naba vot, ketla naba lok kapmek ti lara i lok kaxar i! Mo do lakngam mi laxangkedek taram na lox asubu lunuunu ram, una ra korop pes i la una lu xepe min. I lox avukat do una beles at lorooro avolo mi tenep mene at luxangkedek mi lukngam; lavanga ne Moroa na lu arup minu at laxao at lemenemen songsongot i nemen amisik. La do laxatli ram na lox u la lunuunu ram na subu, una lik gogo su min la una lu xepe min. I lox avukat do una beles at Linintoo mi tegesa xatli mun; lavanga ne Moroa na lu arup minu ro at laxao mo do u ruuna legepu xatli.”

Lisipsip Ga Soogong

(Lk 15:3-7)

10 La ne Iesu ga lok bok tidi, “Nemen mita sok tixirixes kepe tara at na laxamdak kakalik mila lubung angelo atdi dit pot pasa amisik ne Tamak to vana at laxalibet. Nia a tong tuturun i. 11 [La nenia, Laradi Mevana, aga vot kusu ana puse rinedi diga soogong la ana lox arooro di.”]

12 La ne Iesu ga tong lavapaase poovo ridi, “Dola tara atnimi i ruuna legesa sangaun kobot (100) laxasipsip la legesara atdi na soogong, neni ba lok lavanga salai? Neni ba on basinge lavasik sangaun mi lavasik laxasipsip to at lenep avukat, la ni nabat pas kusu na ven ti mo legesara no ga on soogong, i se ni naba long lenget ka i. 13 Nia a tong tuturun i do, mo neni na vuse ka i, neni ba lok momo aleng; lomomo ren ba volo lomomo ri mo lavasik sangaun mi lavasik di goxo soogong. 14 La kuren mun ne Temen nimi no vana at laxalibet i xopara i do legesara atdi na laxamdak lixilik na soogong basinge i.”

Uba Lok Tooro Netam Mo Do I Subu At Laxakapmek

15 La ne Iesu ga lok bok tidi, “Mo do netam i lok tavanga i lok kapmek tu, una vosiga i la una vaxase i mi mo losoogong teren, ketla mo lavanga nak lok kantubu xusuk mene atnumu. Mo do ni i ronga res at levelinga ram, ura lok kaka amlong pam i ri langas in manton. 16 Ket do ixo ronga res at levelinga ram, una lok ka bok tegesara xopla tegepu radi eburu minu xusu miba epen mi levelinga atnimi lavantun; kerekngan lovoang kaala i tong i do, ‘Levenekarakat bak mokso mo do tegepura xopla tavantun dina epen mi levelinga.’ 17 Ket do ixo ronga di, una tong i ri limixin axap di nuunu. La do ixo ronga res at limixin nuunu, mina sok tixirixes kepe i ngan lavamolon kopla laradi loklok ka pilas.”

18 La ne Iesu ga lok bok tidi, “Nia tong i rinimi do; mo levelinga u siam min kopla u sep pepe i nade xopok at na lavatbung menemen, Moroa naba siam min to vana at laxalibet.

19 Ana tong box i rinimi do tegepura du mulus do duna sing ti tavanga du vara rin, ne Tamak no vana at laxalibet naba raba du min, 20 mila do legepura xopla lavantun di vot buru xusu dina sing ia xeneng at laasen tarak, nenia mo ak lox eburu midi.”

Mina Doxoma Xepe Laxakapmek At Luvutneton Nimi

21 Melemu Pita ga vot posiga ne Iesu la ga sue i, “Leeme Silok. Nenia aba domampe xepe laxakapmek at netak i lox i ria naba vanisa? Ba vanuti?”

22 La ne Iesu ga vorang i xeretna, “Nia a tong i ru. Kopmen do una doxoma xepe laxakapmek teren na vanuti mene, ketla lavanuti sangaun mi lavanuti.

23 Ana vaase u mi na, mila Linintoo no vana at laxalibet i lok keretna. Lara loorong silok mo ga doxoma i do nakling lugugu pilas ap mo luvuttadi gugu ren. 24 Se neni ga vaxaru kaxat ka lugugu ren, lara ap mo luvuttadi gugu ren diga lox abeles i, ga lok ka legesa sangaun larabin sangsangaun kobot talen. 25 Ketla neni goxo epovo na vorang mo lempilas; kuren la loorong silok ga tong lolos i ri mo laradi gugu kusu neni mo diba sesep min eburu mi latkin teren la laxamdak kakalik atdu, la lempanga axap neni ga ruuna i kusu ri vorang mo lempilas.

26 Laradi gugu ga xis tiktikbu mi luvatgulom teren la ga lok ngangao ro melamgo at loorong silok la ga sing aleng i, ‘Una balamu ia, la aba sepo axap ba lempilas taram melemu.’ 27 Loorong silok ga balamu i, kuren la neni ga doma xape axap mo langsangan lempilas na laradi gugu ga lok ka i la loorong silok ga soxomus asu i.

28 Melemu mo laradi gugu ga vas su la ga ekip tangarang mi lara laradi gugu bok mo neni ga raba vam i mi legesa sangaun kobot denarias. Neni ga ranga alis i la ga long kukung kaka i la ga lok, ‘Una sepo lempilas tarak.’ 29 La mo laradi ga xis tiktikbu mi luvatgulom teren la ga sing i xeretna, ‘Una balamu ia la melemu aba vorang i!’

30 Ketla neni goxopara, la ga lok ka mo laradi la ga lox abeles i ro at loxokoxo kusu na nemen go se at laaleng neni naba vorang amlong mo lempilas teren. 31 Se lentaba luvuttadi gugu diga ven na lavanga, diga bulu aleng. La digat pas uto at loorong silok la diga tong asu mo lempanga axap tin.

32 La neni ga ro xaka mo laradi gugu ukeneng la ga lok tin, ‘Nenu laradi xapmek; aga doma xape axap lempilas nenu uga lok ka i rak, mila uga sing ia. 33 Kereva, uxo epovo na balamu mo laradi xerekngan nia aga balamu u?’ 34 Loorong silok ga musak, la ga lox abeles mo laradi gugu uto at loxokoxo, kusu na nemen at losongsongot naba se at laaleng neni naba vorang axap mo lempilas.”

35 La ne Iesu ga lok, “Ne Tamak no vana at laxalibet naba lok mun nimi xuren do nemi mi noxo domampe laxakapmek tara i lox i rinimi.”

Copyright information for `MMX