aPas 20:12-16

Matthew 19

Iesu Ga Paase Mumu Loklok Ti Tara Korop Epot

(Mk 10:1-12)

Iesu ga vaase axap mo levelinga, la ni ga vas kaxat mego Galili la gat pas uto at lenep Judaia at lenep dan meso at ladan sen Joridan. La buaang nedi limixin diga mumu asu i la neni ga lok aroo nedi go.

Lentaba lubung Parisi diga vot pasa ne Iesu la diga lok tong i mi lara lususue xeretna, “Kereva, Lenavolo atdik i mulus bok kusu tara na soxope latkin teren mumu mene tepanga gamasa mun?”

La ne Iesu ga vorang di xeretna, “Nemi mina xasep do Lovoang Kaala i tong i do ganoxa at lurutu kaxat Moroa ga rudum li lavatlok la lavakin. La ni mun lavasuun at nai la ne Moroa ga lok do laradi remes naba on basinge ne temen mi nenen la nak lox eburu mi latkin teren la nedu dunak lox eburu ngan mun legesara. La nedu du noxo lok ngan bok ba legepura, ketla legesara. Kuren la kopmen tara noxo ra korop leepot at leremes mi latkin teren, mila ne Moroa axa ga ven etang du.”

La lubung Parisi diga sue i, “Tila ba ne Moses ga raba nama mi levelinga, do tara na malagan tevelinga axasep ti latkin teren do neni mo i xopara na epot ta ren la na riki xepe i?”

La ne Iesu ga lok, “Moses ga raba nemi mi nom mila lebelen at lavalabat atnimi ga vat ken, ketla at lurutu kaxat kopmen goxo lok kuren. A tong tuturun i rinimi; do laradi i soxope latkin teren la kopmen goxo lok loklok ti longka, mo laradi ira longka vam mo do i epot at lara latkin petpes manga.”

10 La luvuttadi loklok ka anasa ren diga lok tin, “Mo do i lok kuren kantubu at leremes mi latkin, i lox avukat do keke leepot.”

11 La ne Iesu ga lok, “Na laanasa rik lok naa kopmen na vung pavaa limixin axap, ketla tinedi xusuk mun ne Moroa i raba nedi min. 12 Buaang levempasuun mo ik lok, tila la lavatlok kopmen dina epot; lentaba mumu i do diga visik axa di xuren; lentaba mumu nga i do limixin diga lok di xuren kusu di noxo epot; la lentaba dixo epot mila, di raba lorooro atdi kusu dina gugu ngan nedi lavaanat at ne Moroa. Nege do i epovo na siam ka na laanasa ti ke leepot, i vukat do neni na mumu asu i.”

Iesu Ga Lox Anarong Laxamdak Mi Laxaalik Kakalik

(Mk 10:13-16; Lu 18:15-17)

13 Lentaba limixin diga lok kaka laxamdak mi laxaalik kakalik atdi uto at ne Iesu kusu neni na lok li lukngen mavana atdi la na sing tidi; ketla luvuttadi loklok ka anasa ren diga ven di la diga sep pepe di.

14 La ne Iesu ga lok, “Mina ke laxamdak mi laxaalik kakalik dina vot pasa ia; la nemen mita sep pepe di, mila Linintoo no vana at laxalibet i epovo ridi na.” 15 Iesu ga lok li vam lukngen mavana atdi, la ni ga vas kaxat ta.

Laradi Gapnovos

(Mk 10:17-31; Lu 18:18-30)

16 Lara laradi ga vosiga ne Iesu la ga sue i, “Laradi loklox ase. Anaba lok lavanga avukat salai kusu anaba lok ka lorooro avolo?”

17 La ne Iesu ga vorang i xeretna, “Ua lavasuun teren la u sue ia mi lavanga salai i lox avukat? Legesara mun i lok avukat la neni ne Moroa. Do u vara na vubeles ti lorooro, una ronga res at lasangaun lenavolo.” 18 La nom laradi ga sue, “Ua lentaba?”

La ne Iesu ga lok,

‘Nemen uta sev amet tara, nemen utang longka tixin, nemen uta xip pilo, nemen uta xarang taba mumu tara mi levelinga xaxarang,
19 una lok ngangao at ne tamam mi nenam, la una balamu nedi di nemen saparav u xerekngan u balamu xa u.” a 

20 La nom laradi ga lok, “Nia aga mumu asu na levelinga axap. Lavanga salai bok move nia ak pakes tin?”

21 Iesu ga vorang i rin keretna, “Do u vara loklok taram nak mokso aleng, una sesep mi lempanga axap taram, la una raba lempilas at nom lempanga ri limixin banbalo la unaba ruuna ka lapnovos silok to vana at laxalibet. La una mumu asu ba ia.”

22 Nom laradi ga ronga i na, la ni ga vas kaxat mi lainbulu silok mila neni gapnovos aleng. La ni ga vas kaxat ta.

23 La ne Iesu ga lok ti luvuttadi loklok ka anasa ren, “A tong tuturun i rinimi. I lolos aleng do laradi nopnovos na vubeles at Linintoo no vana at laxalibet. 24 Ana tong box i xeretna. I lolos aleng do lavatkamel na vubeles at lamamara at linil, la kerepmo i lolos aleng bok ti laradi nopnovos kusu ri beles at Linintoo at ne Moroa.”

25 Luvuttadi loklok ka anasa diga ronga i na, la diga sangu aleng la diga sue ne Iesu, “Nege ba naba lok kaka lorooro avolo?”

26 La ne Iesu ga ven tooro di la ga lok, “Kopmen na epovo do taradi na lox i na, ketla i epovo do ne Moroa na lok lempanga axap.”

27 La ne Pita ga lok tin, “Kereva ba nama, maga on basinge vam lempanga axap atnama kusu mana mumu asu u. Lempanga salai mo ne Moroa ba raba nama min?”

28 La ne Iesu ga vorang i ridi, “Nia a tong tuturun i rinimi. At laaleng ne Moroa na lox amaxat lempanga axap, ap mo laaleng nenia, Laradi Mevana, anabat kis at loxonin orong tarak mi lisisixam silok tarak, la nemi mi mumu asu ia, mibat kis bok at lasangaun mi legepura lengkot kitkis orong la mibang tonga linga at lasangaun mi legepura levenbibinat at limixin me Israel. 29 La nedi axap diga on basinge laraugu atdi, luvutneton di, luvurinen di, luvuttemen di, luvutnen di, laxamdak mi laxaalik kakalik atdi, la leventaamang atdi kusu dina lok lugugu rak, nedi dinaba ruuna ka laxampanga solo la dinaba rooro amisik at lorooro melemu. 30 Ketla buaang limixin di ruuna laasen silok at na lorooro, di noxo silok at lorooro melemu; la nedi kopmen dina silok at na lorooro, dinaba silok at lorooro melemu.”

Copyright information for `MMX