Matthew 20

Luunun Ti Luvuttadi Diga Gugu

La ne Iesu ga lok bok ti luvuttadi loklok ka anasa ren, “Linintoo no vana at laxalibet i lok keretna. Lara laradi mo ga suubu suu maxantamak, kusu na lok ka tuvuttadi kusu dina gugu ro at laraamang vaen teren. Mo laradi ga mulus kusu na un nedi mi legesa denarias at leges aleng, la neni ga riki aonon ta di uto at laraamang vaen.

At lavasik konaleng neni gat pas manga uto at loxot etang, la ga ven manga lentaba luvuttadi mo diga tu onon nava mun go. La neni ga lok tidi, ‘Nemi bok minat pas la mina gugu ro at laraamang vaen tarak, la nia aba un nimi mi luunun i epovo at lugugu.’ La diga vas kaxat.

At lasangaun mi legepu xonaleng la at lavantun konaleng neni ga lok box i xuren.
Ga auret kusu na valimo konaleng la ni gat pas manga uto at loxot etang la neni ga ven manga lentaba luvuttadi mo diga tu go, la ni ga sue di, ‘Kereva, mia tu gamasa mun nade at na laaleng axap la kopmen mina lok tepanga?’

La diga lok tin, ‘Kopmen tara na lok kaka nama ri gugu.’

La ni ga lok, ‘Minat pas la mina gugu bok to at laraamang vaen tarak.’

Ukantinao at lavanna konaleng temen laraamang vaen ga lok ti laradi loklok tatao at luvuttadi gugu, ‘Una xup kaka luvuttadi gugu la una un nedi mi luunun atnedi; una ru ka i atnedi nia a lok ka nedi ri lugugu na ukantinao at lavalimo konaleng la naba xap atnedi, nia a xup ka avot di maxantamak suubu.’

Luvuttadi diga gugu kaxat at lavalimo konaleng diga lok ka legesa denarias ti legetgesa radi. 10 La nedi mo laradi gomgo ga xup kaka avot nedi, diga vot la diga nua i do dinaba xip ka mavana lixilik ap mo luunun, ketla nedi getgesara diga lok ka bok legesa denarias. 11 Diga lok ka mo lempilas la diga ru ka i xusu dina paase mukmusak ti ne temen mo laraamang. 12 Diga lok, ‘Na luvuttadi nenu ua xup kaka amupit di, la di gugu at loxonaleng lixilik mun; la nema ma gugu at na laaleng axap maxopok at na liplivi at laxangking, ketla luunun atdi i lok ngan bok atnama.’

13 Ketla temen laraamang ga lok ti legesara atdi, ‘Lentangas tarak, axo bala vukpux u. Nenu xa u siam do aba un u mi legesa denarias at leges aleng. 14 Una lok ka lempilas taram la una onon uto xolonu. A vara i do ana un na luvuttadi di mupit mi lempilas buaang kerekngan mun a un u min. 15 Ik mokso ria do ana lok lavanga salai mi lempilas tarak. La nenu u paase mumu parang ia mila nenia laradi ramtaba.”

16 La ne Iesu ga lok, “La kerepmo bok nedi di mumupit at na lorooro, dibam gomgo at lorooro melemu la nedi dim gomgo, diba mumupit.”

Iesu Ga Tong Asu Lanmet Teren

(Mk 10:32-34; Lu 18:31-34)

17 At lavatpas at ne Iesu uto Jerusalem, ni ga lam ka lasangaun mi legepura luvuttadi loklok ka anasa ren to basinge limixin la ga lok tidi, 18 “Nedik taba onon uto Jerusalem la lara laradi naba song araba ia, Laradi Mevana, ri lavamaasa silok eburu mi luvuttadi loklox ase at Lenavolo. Nedi diba lok li ia at lavapaase la diba lok li lumumuat tarak do nenia aba met. 19 La diba song araba ia ri limixin esep boro Rom kusu dina lok sese kapmex ia la dibak pixis ia la diba vaxarem ia at laxaba. Melemu at laaleng sepsev avantun nenia anaba roo xat amlong.”

Nenen Ne Jon Mi Ne Jems Ga Lok Lising Ti Ne Iesu

(Mk 10:35-45)

20 Melemu latkin at ne Sebedi ga vot parap ne Iesu mi lumdak teren; la ni ga xis tiktikbu mi luvatgulom teren to melamgo at ne Iesu, la ga vara sing i mi tara tavanga.

21 La ne Iesu ga sue i, “U vara lavanga salai?”

La ni ga lok, “Una siam do na lumdak tarak dubat kis saparav u at Linintoo ram, lara ro at latno la lara at liviang taram.”

22 Ketla ne Iesu ga lok, “Mixoklen lai nemi mi sing tin.”

La ni ga lok ti mo luradi loklok ka anasa ren, “Kereva, mu epovo do muna suma losongsongot silok eburu minia mo a gagas kusu aba xip tutu min?”

La duga vorang i rin keretna, “Ma epovo.”

23 La ne Iesu ga lok, “I ruturun do nemu muba suma levesongsongot silok; ketla kopmen lugugu rak do nia aba tong i do nege bat kis to at lakngak tino la at lakngak kia. Mo luxot ik lok mun tinedi ne Tamak gara soxolik ka vam di.”

24 Se lasangaun luvuttadi loklok ka anasa diga ronga i na, diga edak du. 25 La ne Iesu ga ro bubua ka di la ga lok, “Miklen i do luvuttadi amgomgo at limixin kopmen di me Judaia, di ruuna lololos mavana at limixin atdi. 26 Ketla nemen gat na loklok nak lok kantubu atnimi. Mo do tara atnimi i vara i do na silok, neni na lok ngan lasaxaruki atnemi axap. 27 La do tara atnimi i vara i do nam gomgo, neni na lok ngan lasaxaruki gamasa atnimi. 28 Nenia Laradi Mevana la loklok tarak ik lok bok kuren. Nia xopmen a goxo vot kusu limixin dina ba lok ngan lavasaxaruki rak. Ketla nia aga vot kusu ana lok ngan lasaxaruki ridi, la kusu ana raba lorooro rak ngan laxaavuk tidi buaang limixin.”

Iesu Ga Lox Aroo Luradi Lengkatli Atdu Ga Main

(Mk 10:46-52; Lu 18:35-43)

29 Iesu eburu mi luvuttadi loklok ka anasa ren, diga vas kaxat basinge lemenemen Jeriko, la buaang limixin diga emu eburu midi. 30 La legepu radi, lengkatli atdu ga main, mo dugat kis at lisigege ngas. Se duga ronga i do ne Iesu ga vas polo du, duga xup keretna, “Leeme Silok. Livisik li at ne Devit. Una balamu nama’.”

31 La mo limixin diga tong i ridu do duna lok pilo, ketla dugap kup aleng, “Leeme Silok. Livisik li at ne Devit. Una balamu nama’.”

32 La ne Iesu ga ru la ga ro xaka du la ga sue du, “Lavanga salai mu vara i do ana lox i rinumu?”

33 Duga vorang i xeretna, “Leeme Silok. Ma vara i do lengkatli atnama’ na xasep.”

34 Iesu ga balamu du la ga long tu at lengkatli atdu. La soso mun lengkatli atdu ga xasep la duga mumu asu ne Iesu.

Copyright information for `MMX