aPas 3:6
bLen 6:5
cMas 19:18

Matthew 22

Lavapaase Poovo Ri Leluxa

(Lu 14:15-24)

Iesu ga paase manga ridi mi lavapaase poovo, ni ga lok, “Linintoo no vana at laxalibet i lok ngan loorong silok ga gagas li leluxa ri loklox epot at lamdak teren. Neni ga riki lavasaxaruki ren ti mo limixin ni gara tong li vam atdi ri mo leluxa kusu dina tong i ridi do laaleng ti leluxa ga vot pam, ketla diga ronga xepe mo levelinga.

La ni ga riki manga lentaba lavasaxaruki mi levelinga xeretna, ‘Mina tong i rinedi no nenia aga tong li vam atdi do ara gagas li vam leluxa. Nia ara sep pam laxanbulumaxao, la lempanga axap ara gagas li vam i. Mina tong i ridi do dina vas kaxat ta ri leluxa at loklox epot.’

Ketla nedi diga ronga xape mo levelinga la digak lox angtang mene at leven gugu atdi xa. Lara avot ga vas kaxat uto at laraamang teren. Lara bok ga lok lugugu ti sesep mi lempanga. La nedi lentaba vetpes diga ranga alis lavasaxaruki la diga lok kapmek di la diga sev amet di. La mo loorong silok ga musak teng. Ni ga riki limixin esep teren la diga sev amet di la diga xotos axap lemenemen silok atdi.

La neni ga lok ti lavasaxaruki ren, ‘Leluxa i gagas pam, ketla mo luvuttadi nia aga ro ka di ti na leluxa nedi limixin kapmek mun la ixo epovo do limixin kapmek dinat kis at na laanan. Minat pas uto at levenngas la mina ro xaka limixin, mi ekip etangarang midi go kusu dina rupot ti leluxa rak.’ 10 La lavasaxaruki ren diga epeseves uto at levenngas la diga ro xaka limixin axap diga ekip tangarang midi, nedi limixin avukat eburu mi limixin kapmek. La loogu ri loklok epot ga umsu mi mo limixin.

11 Ketla loorong silok ga vubeles ti ven mo limixin, la ni ga ven lara laradi goxopmen tevempanga singsiga ren ti loklox epot. 12 La ni ga sue nom laradi, ‘Lentangas tarak. Nenu u beles ude xereva la kopmen tevempanga singsiga ram ti loklox epot?’ Ketla mo laradi goxo tong toxolinga.

13 La loorong silok ga tong i ri luvuttadi gugu ren keretna, ‘Mina xoxo lukngen mi luxangkedek teren la mina lu asu min uto xamang kusu neni na vubeles at lamain bonot no limixin dibang teng boron la diba rungur ivivilis.”

14 La ne Iesu ga lok bok, “Limixin diba lok kuren mila ne Moroa i toro rinedi buaang limixin, ketla lentaba mene atdi di epovo kusu ne Moroa na soxolik ka di.”

Laxakaape Pilas Ti Ne Kaisar

(Mk 12:13-17; Lu 20:20-26)

15 La lubung Parisi diga vas kaxat basinge mo lenep la diga gagas kusu dina bala arup ne Iesu mi levelinga. 16 La diga riki luvuttadi loklok ka anasa atdi eburu mi limixin diga mumu asu ne Erodes uto saparap ne Iesu. Diga lok tin keretna, “Leeme loklox ase. Maklen i do nenu laradi ruturun la u anasa limixin mi leveloklok at ne Moroa la mo levelinga ram ik mokso. Uxo lok tooro legesa binam tadi xusuk mun mila uxo doxoma solo i do tara i ruuna laasen silok kopla kopmen. 17 Una tong i rinama do ua lusumsuma ram. Kereva, ik mokso do mana xepe pilas ti ne Kaisar kopla kopmen?”

18 Iesu ga ven kibis laxaxarang atdi la ga lok tidi, “Nemi lavapen aala. Tila mi lok do mina lixo ia? 19 Mina lox ase ia mi tuxuven denarias mo mi kepe min.” La diga raba i mi legesa denarias. 20 La ni ga sue di, “Lamang la laasen atnege i nemen teren?”

21 La diga vorang i, “At ne Kaisar.”

La ni ga lok tidi, “Mina raba ne Kaisar mi lempanga i epovo at ne Kaisar, la mina raba ne Moroa mi lempanga i epovo at ne Moroa.”

22 Diga ronga lovoporang teren, la diga sangu, la diga on basinge i.

Lususue Mumu Laxakatu Kaxat Amlong

(Mk 12:18-27; Lu 20:27-40)

23 Ap mo mun laaleng lentaba at lubung Sadiusi diga vosiga ne Iesu, diga lok do limixin diga met pam, di noxo roo xat amlong. Diga lok tong pen ne Iesu xeretna, 24 “Leeme loklox ase. Moses ga tong i rinama do taradi na met la kopmen tamdak teren, neton nom laradi naba epot at mo lanaa rixin, kusu duba visik tamdak ti ruuna ka lempanga ap mo laradi ga met. 25 Ga lavanuti loxoeton diga nemen kantubu atnama. Lara gomgo ga epot la ga met, kopmen ni goxo visik taxamdak, kuren la lara sepsev agepura ga epot manga at nom latkin. 26 La lara sepsev agepura ga met bok la lara sepsev avantun bok ga met; la nedi loxoeton axap diga epot at nom latkin diga met. 27 La melemu nom latkin ga met. 28 At laaleng dola limixin dina xatu kaxat amlong, ti nege rinotno nom latkin, mila nedi axap diga epot teren?”

29 La ne Iesu ga vorang i ridi xeretna, “Nemi mi soogong at na lavanga mila nemi xopmen minaklen levelinga at Lovoang Kaala la lololos at ne Moroa. 30 Ap mo laaleng limixin diba xatu kaxat amlong, di noxo epot; diba nemen naa ngan lubungangelo ro vana at laxalibet. 31 Ketla a vara i do ana lox axasep nimi mumu laxakatu kaxat amlong at limixin basinge lanmet. Nemi mixo xasep at levelinga at ne Moroa ga raba nimi min. 32 Mo levelinga i lok keretna,

‘Nia ne Moroa at ne Abaram, Moroa at ne Aisak, la Moroa at ne Jakop.’ a 

Ap mo laaleng ne Moroa ga tong i na, nedi lavantun diga met pam. La neni ne Moroa atnedi limixin di rooro, la kopmen atnedi luvuttadi met.”

33 Limixin diga ronga i na, la diga sangu aleng at levenanasa ren.

Ua Levelinga At Ne Moroa I Silok Aleng

(Mk 12:28-34; Lu 10:25-28)

34 Lubung Parisi diga ronga i do ne Iesu ga vaase pe lubung Sadiusi, la nedi diga vot eburu la diga vot pasa ne Iesu. 35 Legesara atdi, neni gaklen avukat Lenavolo, ga lok tong pen ne Iesu. Ni ga sue i, 36 “Leeme loklox ase. Ua levelinga at Lenavolo i silok ti levelinga axap teren?”

37 La ne Iesu ga vorang i rin,

“Mina balamu Leeme Silok, ne Moroa atnimi mi lebelen nimi axap, la mi loroonan axap atnimi, la mi levendoxoma axap atnimi.’ b 

38 Na loxot neni imgomgo la i silok ti levelinga axap teren. 39 La lara bok sepsev agepura i lok ngan lara gomgo, i lok keretna.

‘Mina balamu mo limixin di nemen saparap nimi kerekngan pam mi balamu nimi.’ c 

40 Lenavolo eburu mi levenmamalagan at lavaeme vapaase alii i nemen maxopok at na levelinga.”

Lususue Mumu Lanarong

(Mk 12:35-37; Lu 20:41-44)

41 Lubung Parisi digak lox eburu la ne Iesu ga sue di, 42 “Lanarong, neni lurubuno avolo atnege mo?”

La diga vorang i xeretna, “Neni lurubuno avolo at ne Devit.”
43 La ni ga lok tidi, “Do kuren, tila ba ne Devit mi lodoxoma at Loroonan Kaala ga soxor i do Leeme Silok teren? Mila levelinga ren at Lovoang Kaala i lok keretna,

44 ‘Leeme Silok ne Moroa ga lok ti Leeme Silok tarak. Una xis de at lakngak tino se nenia ana lok li limixin munepen taram i ngan loxot burubut ti luxangkedek taram.’ d 

45 Mo do ne Devit ga so asen i do Leeme Silok, i lok kereva la Lanarong neni lurubuno avolo at ne Devit?” 46 Kopmen teta atdi gita epovo na vorang levelinga ren, la ga ru ka i ap mo laaleng, kopmen tara gita sue i mi tususue.

Copyright information for `MMX