Matthew 23

Iesu Ga Paase Asi Limixin Silok

(Mk 12:38-39; Lu 11:43,46; 20:45-46)

Melemu ne Iesu ga vaase ri limixin eburu mi luvuttadi loklok ka anasa ren. Ni ga lok keretna, “Luvuttadi loklox ase at Lenavolo la lubung Parisi di ruuna lixitkis silok ngan ne Moses, mo gam gomgo ri leme Israel. Kuren la mina ronga res axap at lempanga di tong i rinimi la mina mumu asu rinotno i; ketla nemen gat mita mu asu luruptuvuk atdi, mila dixok lok lempanga nedi di vavang min. Dim taba limixin mi laxantaangas solo, i lok ngan di koxo li lara aknixip doxodok at limixin, la i mumuat aleng kusu dinap kiv i, ketla nedi xa kopmen dinak lok tooro limixin kusu rip kip mo levenaknixip.

Lempanga axap dik lox i xusu limixin diba reven di la dina emi asu midi. Lavasuun mun at nai dik lok lengkonbokis lixilik tik lok li levelinga at ne Moroa ro xeneng teren; la mo lengkonbokis i silok ti mo lengkonbokis at limixin. La ding siga levempanga singsiga ri loxonaleng singising la dik lox asuusu i do di baalom aleng kusu dina lox ase limixin do nedi limixin tuturun. Di vavara aleng lengkot kitkis nunuan to at lara peluxa; la dik lok ka lengkot avukat tit kis to xeneng at laraugu singising. La di vavara aleng box i do limixin dibak lok ngangao atdi ro at lengkot etang, la dinap kup tidi do ‘Rabai.”

La ne Iesu ga lok bok tidi, “Ixo lox avukat do tara na soxot nimi do Rabai, mila mi ruuna leges ‘Eme Silok’ la nemi mina epovo ngan mun loxoeton. La nemen gat nimi guta tong tara at na lavatbung menemen do ne Temen nimi, mila legesara mun neni ne Temen nimi mo ik lok to vana at laxalibet. 10 La nemen gat limixin dina so asen nimi do ‘luvuttadi amgomgo’ mila legesa radi gomgo atnimi la neni Lanarong. 11 Neni do i silok kantubu atnimi neni na ngan mun lasaxaruki atnimi. 12 La do nege i lox asilox i, ne Moroa naba lox alixilix i; la nege do i lox alixilix i, ne Moroa naba lox asilox i.”

Iesu Ga Vaase Sok Luvuttadi Amgomgo

(Mk 12:40; Lu 11:39-42,44,52; 20:47)

13 Naba lok kapmek aleng tinimi, luvuttadi loklox ase at Lenavolo eburu minemi lubung Parisi. Nemi lavapen aala. Mik soxoba pe lumusaragu ri Linintoo no vana at laxalibet kusu limixin kopmen dina epovo dina beles teren. Ketla nemi xa xopmen minoxo beles teren la mi tu pe mo lumusaragu ri limixin dik lok tong i xusu dina beles. 14 [Naba lok kapmek aleng tinimi, luvuttadi loklox ase at Lenavolo eburu minemi lubung Parisi. Nemi lavapen aala. Mip kip pilo lempanga at lempatnaa sioxo rixin, la melemu at na mik lok levesingising to melamgo at limixin kusu rik lox ase di do loklok atnimi i nunuan axap. Kuren la ne Moroa naba lok li lumumuat silok atnimi.]

15 Naba lok kapmek aleng tinemi luvuttadi loklox ase at Lenavolo eburu minemi lubung Parisi. Nemi lavapen aala. Mit pas tangtagap at laxangka la miang kan bok at laras kusu minak lok ka tara xusu ni na ruuna ka lunuunu kerekngan lunuunu atnimi; la do tara ira ruuna ka vam mo lunuunu, mi gagas li i xusu neni naba epovo rinotno kusu nat pas epopolo uto at lemenemen songsongot.

16 Naba lok kapmek aleng mun tinimi, mila nemi limixin lengkatli atnimi i main la nemi xa xopmen mina epovo kusu mina lok tooro limixin. Mi tong i do lavangpangpe at tara i ngan lavanga gamasa, mo do i vangpe mi loogu laplavang; ket do ni i vangpe mi logol i nemen keneng at loogu laplavang, nemi miba doxoma atmatkun mo laxakaape ren. 17 Nemi luvuttadi rangtangku la lengkatli at labaroonan atnimi i main. Loogu laplavang neni i lox axaala mo logol; la loogu laplavang i silok ti logol; la i xaala aleng, kopmen logol. 18 Mi tong box i do lavangpangpe at tara ni lavanga gamasa mun, mo do i vangpe mi loxonin laplavang to at loogu laplavang; ket do ni na vangpe mavana at leventamtaba mo ik lok pana at nom loxonin laplavang, nemi mi lox amuat mo lavangpangpe ren. 19 Nemi laxangkatli main. Loxonin laplavang i silok ti mo leventamtaba la i lox axaala mo leventamtaba. 20 Kuren la do tara na vangpe mi loxonin laplavang, neni i lok lavangpangpe min eburu mi leventamtaba mo ik lok teren; 21 la do i vangpe mi loogu laplavang, neni i vangpe min eburu mi ne Moroa mo ik lok keneng teren; 22 la do i vangpe mi laxalibet, neni i vangpe mi loxonin orong at ne Moroa eburu mi ne Moroa mo it kis teren.

23 Naba lok kapmek aleng tinimi luvuttadi loklox ase at Lenavolo eburu minemi lubung Parisi. Nemi lavapen aala! Mim taba ne Moroa mi loxot i sev asangaun ap mo levempanga ik lok at laraamang, ketla mixo mumu asu leveloklok silok at Lenavolo, i ngan loklok mokmokso, lebelemumu, loklok nunuan ti lentaba vetpes, la loklok tuturun ti lentaba vetpes. Na leveloklok i epovo do mina lox asuusu i eburu mi mo loklok ti raba ne Moroa mi loxot i sev asangaun. 24 Nemi laxangkatli main. Mi mumu asu lengkot at Lenavolo kopmen na mumuat, ketla mixo mumu asu solo mo leveloklok i mumuat. I ngan ta do mi lox asu levenulang kakalik basinge lengkadan vaen atnimi la mi ke lavatkamel nak lok teren.

25 Naba lok kapmek aleng tinimi luvuttadi loklox ase at Lenavolo eburu minemi lubung Parisi! Nemi lavapen aala. Mi sogos anunuan i no ma xamang at leveng kap la leventingtigon, ketla no ma xeneng i umsu aleng mi loklok ti sak paxat ka panga la loklok ti belegaao. 26 Nemi lubung Parisi. Nemi lengkatli main. Mina gos anunuan avot be i no ma xeneng at lakap, la melemu no ma xamang ba lok nunuan ba.

27 Naba lok kapmek aleng tinimi luvuttadi loklox ase at Lenavolo eburu minemi lubung Parisi. Nemi lavapen aala. Mi ven ngan tinotno lempat maaut diga mo anbun i, i ven avukat to ma xamang, ketla no ma xeneng i umsu mi laxasi tongan la laxanorang. 28 Kuren la nemi bok mi lok ngan i nom, ma xamang atnimi, limixin di ven nimi ngan luvuttadi mokmokso la mi mumu asu Lenavolo, ketla ma xeneng at lebelen nimi mi umsu mi loklok at lavapen aala la loklok kakapmek aleng tino bok.

29 Naba lok kapmek aleng tinimi luvuttadi loklox ase at Lenavolo eburu minemi lubung Parisi. Nemi lavapen aala. Mira vaxaru ka vam levenmaaut avukat ti lavaeme vapaase alii; la mi sisinang avukat levenmaaut at limixin mokmokso; 30 la mi lok keretna, ‘Mo do nedik gita nemen ap mo levenaleng lavalabat atdik diga rooro ren, nedik gitoxo sev amet lavaeme vapaase alii.’ 31 La kerepmo mi tong asu i do nemi livipisik li ap mo limixin sepsep tadi, diga sev amet lavaeme vapaase alii. 32 Nemi bok limixin sepsep tadi, mi epovo do mina lox epasum na laxakapmek ti laxakapmek atnedi.

33 Nemi laxasii xapmek. Nemi laxamdak at lempasii. Ixo epovo do mina sixiro basinge lebelemamao at ne Moroa mo naba riki nimi uto at lemenemen songsongot. 34 Kuren la aba riki lavaeme vapaase alii eburu mi luvuttadi leklen la luvuttadi loklox ase saparap nimi. Lentaba atdi miba vaxarem di at larakaba la mibap sev amet di. La lentaba atdi mibak pixis di ro xeneng at laraugu singising la miba xala su mi lentaba atdi basinge levenmenemen atdi la uto at levenmenemen petpes. 35 Kuren la minaba xip tutu mi lanmet at limixin mokmokso at na lavatbung menemen, ga ru ka i mi lanmet at ne Abel ga se at lanmet at ne Sakaria, nitna ne Berakaia, mo lavalabat atnimi diga sev amer i ro xantubu at loogu laplavang la loxonin laplavang. 36 Nia a tong tuturun i dola na loola di rooro lingina dinaba xip tutu mi na laxakapmek axap atnedi luvuttadi sepsep tadi.”

Iesu Ga Tong Asu Labalamu Ren Ti Limixin Me Israel

(Lu 13:34-35)

37 La ne Iesu ga bulu aleng la ga lok, “Nemi limixin me Jerusalem. Lavalabat atnimi digap sev amet lavaeme vapaase alii at ne Moroa la diga lu amet nedi ne Moroa ga riki di. Buaang levenaleng a lok do ana kok nimi mi lukngak, i ngan lavatpalak kaxak i kok laxan natnat kaxak teren, ketla mixo siam ka ia. 38 I ruturun. Monga Moroa i lox axap loklok tatao ren tinimi. 39 A tong tuturun i rinimi do mi noxo ven bok ba ia, se at nom laaleng naba vot la miba lok keretna,

‘Luvukat ti mo laradi it pas mi laasen at Leeme Silok.” a 

Copyright information for `MMX