aAis 40:3

Matthew 3

Jon Laradi Sep Susu Ga Vavang Ti Limixin

(Mk 1:1-8; Lu 2:1-18; Jo 1:19-28)

Buaang levenmaares gara volo, la ne Jon, laradi sep susu ga ru asuvos to at lamatbin at lenep silok Judaia la ga ru ka lugugu teren. Neni ga vavang keretna, “Mina leeng basinge leveloklok kakapmek atnimi, mila langas ti Linintoo no vana at laxalibet mo nga ira auret!” Leeme vapaase alii ne Aisaia ga paase mumu ne Jon mi levelinga xeretna,

‘Lara mo ip kup to at lamatbin keretna, mina lox agagas li langas ti Leeme Silok; mina lox akmokso langas tin!’ a 

Jon ga siga labantamon diga lox i mi lengkabinim at lakamel; neni ga dodos i mi labanbaane diga lox i mi labantuxu at lavanga mi lavanuet kangkedek teren. La neni ga anan levenasku mi laxanmisiu boro at laxairing. Limixin digat pot saparav i boro Jerusalem, boro at levenep axap Judaia, la boro bok at levenep saparap ladan sen Joridan kusu dinang tonga levelinga ren. Diga tong asu leveloklok kakapmek atdi la ne Jon ga sep susu nedi ro at ladan sen Joridan.

At loxonaleng ne Jon ga ven buaang nedi lubung Parisi mi lubung Sadiusi diga vosiga i kusu neni na sep susu nedi, neni ga lok tidi xeretna, “Nemi laxamdak at lempasii. Kereva, mi lok do mina sixiro at lebelemamao at ne Moroa mo naba vot saparap limixin kakapmek? Minak lok lempanga i nunuan kusu naba lox asuusu i do mira leeng basinge vam leveloklok kakapmek atnimi. Ketla mi guta nua i do miba sixiro at lebelemamao at ne Moroa mumu nga i do ne Abaram, neni lurubuno avolo atnimi. A tong i rinimi do Moroa i epovo na ba gili na laxanuat la dina vee ngan livipisik li avolo ri ne Abaram. 10 Moroa mo i gagas kusu ri tara asi larauna ro xa at laraixe atdi. Larauna do kopmen dina pisik asu lempeven una nunuan, neni naba ra asi di la na lu arup midi ro at laxao.”

11 La ne Jon ga lok bok, “A sep susu nemi mi ladan kusu mina lox asuusu i do mira leeng pam basinge leveloklok kakapmek atnimi; ketla lara mo naba mumu bok ba rak. Neni naba sep susu nimi mi Loroonan Kaala la laxao ri limixin tongtonga xepe. Lololos teren i volo lololos tarak. Axo epovo kusu anap kip luvanga vatpas teren mila i silok aleng tia.
Anai ni lavapaase poovo ri lox asuusu i do ne Jon ga lox asu langsangan loklok ngangao ren ti ne Iesu.
12 Neni naba ronga linga at limixin axap, la naba lok pes mun limixin avukat basinge limixin kapmek, kerekngan laradi loklok tatao laraamang i epes lenbolo avukat basinge lenbolo i gu; limixin avukat, neni naba lox arooro di uto vana at laxalibet i ngan lenbolo avukat; la limixin kapmek, neni naba lok li di at lemenemen songsongot, i ngan lenbolo gu di tara kutkut di.”

Jon Ga Sep Susu Ne Iesu

(Mk 1:9-11; Lu 3:21-22)

13 Goxo lox abao la ne Iesu ga vas kaxat boro Galili la uto Joridan, la ga vot pasa ne Jon kusu neni na sep susu i. 14 Ketla ne Jon ga lok tin, “Ixo epovo xusu una mu asu i na. I epovo do nenu una sep susu ia. La tila xa la ura sing ia do ana sep susu u?”

15 Ketla ne Iesu ga vorang i rin keretna, “Una lok lavanga salai nia ara tong pam i, mila at na mun i langas la neda ata ba lox asorun lempanga sai ik mokso ne Moroa i vara i.” Kuren la ne Jon ga mu asu lodoxoma at ne Iesu.

16 Melemu at ne Jon ga sep susu ne Iesu, neni ga vas urut basinge ladan la uto at lisigege dan. La ne Moroa ga suang laxalibet ti ne Iesu, la neni ga ven Loroonan at ne Moroa ga si boro vana la ukopok; ga ven ngan ta lamno la gasga ne Iesu. 17 La laxaka at ne Moroa boro vana at laxalibet ga lok, “Nena ne Nuruk. Nia a balamu i la a momo aleng min.”

Copyright information for `MMX