Matthew 7

Nemen Mita Ila Mumu Loklok At Tentaba Vetpes

(Lu 6:37-38, 41-42)

La ne Iesu ga lok bok keretna, “Nemen mita ila mumu loklok at tentaba vetpes, kusu ne Moroa noxo ila mumu loklok atnimi. Mo do mina ila mumu loklok at tentaba vetpes, ne Moroa naba ila mumu nimi ap mo mun langas; la lumumuat mi lok li mavana atnedi lentaba vetpes, neni mun i nom ne Moroa naba raba nimi min.”

La ne Iesu ga paase poovo bok keretna, “Nemen mita reven ti nom levendon i nemen at laxatli at neton nimi, la nemi xa kopmen mina long lenget ka levengkonuna ik lok pe lengkatli atnimi. Miba tong i ri neton nimi keretna, ‘Netak, una mulus tia kusu ana lok pes nom levendon at laxatli ram,’ ketla nemi xa xopmen mina ven kibis levengkonuna ik lok pe lengkatli atnemi getgesara. Nemi lavapen aala. Mina lok pes avot nom levengkonuna ik lok pe lengkatli atnimi, la melemu ba miba ven avukat ba i xusu mina lok pes ba levendon no at laxatli at neton nimi.

Nemen gat mita raba lubungman mi lempanga i xaala. Mo do mina lox i xuren, dinaba rem gili mu nimi la diba at koxorop nimi. La nemen mita lu raba lababo mi leven peal atnimi; mo do mina lox i xuren, diba but axangka i mi lengkangkedek atdi.”

Moroa Im Taba Lempanga Nunuan Tinedi Di Ngising Parav I

(Lu 11:9-13)

La ne Iesu ga lok bok keretna, “Mina ngising, la miba ruuna xaka i; mina puse, la miba vuse xaka i; minap dipdi, la lumusaragu naba rem suang tinimi; mila do mina ngising ne Moroa, miba lok kaka i; la do nemi mina puse, minaba vuse ka i; la lumusaragu naba rem suang tinemi mi dipdi.

Kereva, i epovo do ne temen tamdak na raba ne nitna mi toxonuat, modo neni na sing ti toxongkide? 10 Kopla i epovo kusu neni na raba i mi tisii mo do neni na sing ti temat? 11 Keke i do nemi limixin bilinga, ketla mikleklen i do mim taba laxamdak mi laxaalik atnimi mi lempanga nunuan. La kerepmo i epovo rinotno do ne Temen nimi ro vana at laxalibet naba lok momo aleng ti raba bok lempanga nunuan tinedi di ngising tin. 12 Leveloklok axap mina lox i ri lentaba vetpes, na lok ngan mun leveloklok mi vara i do dina lox i rinimi. Anai ni lavasuun tinotno at Lenavolo at ne Moses la levelinga at lavaeme vapaase alii.”

Lumusaragu I Veleot

(Lu 13:24)

13 La ne Iesu ga lok bok, “Mina beles keneng at lumusaragu i veleot kusu ri lok ka lorooro, mila lumusaragu uto at lemenemen songsongot i repalas la langas ugo at lemenemen songsongot kopmen na lolos, la buaang nedi limixin di pubeles teren. 14 Lumusaragu uto at lorooro ni i veleot mun la langas tin i lolos aleng tino la ixo buaang nedi luvuttadi di pubeles teren.”

Luuna Mi Lempeven Teren

(Lu 6:43-44)

15 La ne Iesu ga lok bok, “Mina lok tatao nemi mumu loklok atnedi lavaeme vapaase alii xaxarang; di vosiga nimi mi levelinga xaxarang la diba tong i do nedi luvuttadi at ne Moroa. Ketla di lok ngan lempatman atat, di siga lempanga singsiga diga lox i mi lengkabinim at levesipsip kusu dina xarang limixin. 16 Miba ven kibis nedi mi levempipisik at lorooro atnedi. Ixo epovo do mina dik ka tempeven una nunuan boro at taban gagas, la ixo epovo do miba dik ka tempeven una at looxo boro at tabaniles. 17 La kerepmo luuna nunuan i pisik lempeven una nunuan, ketla luuna mamao i pisik lempeven una mamao. 18 Luuna nunuan ixo epovo do na visik tempeven una mamao, la luuna mamao ixo epovo do na visik tempeven una nunuan. 19 Larauna axap do dixo pisik nunuan, di tara korop asi nedi la di lulu arup midi ro at laxao. 20 Kuren la miba ven kisip lavaeme vapaase alii xaxarang mi levempipisik at lorooro atdi.”

Laaleng Ete

(Lu 13:25-27)

21 La ne Iesu ga lok bok tidi, “Limixin diba tong ia do Leeme Silok, Leeme Silok; ketla kopmen nedi axap diba beles at Linintoo no vana at laxalibet; nedi xusuk mun di mumu asu lavavara at ne Tamak, diba vubeles teren. 22 At laaleng ete buaang nedi limixin diba lok tia, ‘Leeme Silok, Leeme Silok; maga paase alii ri limixin mi laasen taram, la maga riki asu lubunggas basinge limixin mi laasen taram, la maga lok buaang laxampanga sangsangu mi laasen taram.’ 23 Melemu aba vaase ridi xeretna, ‘Nia xopmen tinotno anaklen nimi. Uto nimi basinge ia, nemi limixin kapmek.”

Luradi Xipkip Gu

(Lu 6:47-49)

24 La ne Iesu ga lok bok tidi, “Kuren la, do tara i ronga na lempapaase rak la i ronga res mu i, neni i lok ngan laradi leklen ga xip loogu ren la ga sev asi lemet ukopok tinotno la ga lok nom loogu ren pana at laxanuat. 25 Larakabu ga vot, la ladanut ga sen, la lamanman gat mas lolos mo loogu, ketla loogu goxo rem sup, mila ni gasbo i mi laxanuat. 26 Ket do lara i ronga na levelinga rak la kopmen ni na mu asu i, neni i lok ngan laradi tangtangku, ga xip loogu ren la gasbo pe i mi laxapulang. 27 Larakabu ga vot, la ladanut ga sen at laradan, la lamanman ga vot lolos at nom loogu, la loogu ga rem sup la ga rem utut axap.”

Levenanasa At Ne Iesu Ga Mumuat

28 Se ne Iesu ga vaase axap na lempapaase, buaang nedi limixin diga sangu aleng at levenanasa ren, 29 mila neni ga anasa di, la levelinga ren ga mumuat, neni xopmen goxo anasa ngan luvuttadi loklox ase at Lenavolo.

Copyright information for `MMX