Philippians 1

Lavapaase Axasep

Nenia ne Pol. Nema’ mi ne Timoti, luasaxaruki at ne Iesu Karisito.

Ma sok na lovoang tinemi limixin at ne Moroa mi nemen keneng at lemenemen silok Pilipai, la ti luvuttadi amgomgo bok at lotu la luvuttadi loklok tooro, mo miga siam kaka ne Iesu Karisito xeneng at lorooro atnimi.

Letaba nabalamu la lenmila rinemi boro at ne Moroa ne Temen nedik la ne Iesu Karisito, Leeme Silok atdik.

Lisingising At Ne Pol

Nenia a tong avukat ti ne Moroa ap mo levenaleng axap do nenia a doxoma su atnimi. La at levesingising axap tarak tinemi axap, a ngising mi lomomo, mila miga lok tooro ia mi lugugu at Lagale Lavavang ga ru ka i at laaleng nia aga vaxaru xat ka lugugu dom kantubu atnimi la ise ningina. Kuren la aklen tinotno i do ne Moroa, ni ga vaxaru ka i na lugugu nunuan keneng atnimi, neni naba lox epovo na lugugu nunuan keneng at lorooro atnimi at na levenaleng la naba se at laxavaxap at lugugu atdik at laaleng ete at ne Iesu Karisito.

Am doma su amisik atnimi mi lomomo. La at lusumsuma rak ik mokso do ana doma mumu nemi. Nemi miga gugu eburu minia ap mo lugugu ne Moroa ga raba ia min la ni ga raba nimi mi lolos kusu minap kiv i, i se nga na nenia ak lok at loxokoxo, la ap mo bok levenaleng nenia agat pas tangtagap kusu ana lox asuusu i do Lagale Lavavang i return, la kusu ana lok limixin nuunu kusu dina ru lolos teen. La ne Moroa aklen i do nom nabalamu rak saparap nimi, i laa at labalamu at ne Iesu Karisito.

Lisingising tarak saparap ne Moroa i lok keretna. Nenia a ngising do labalamu atnimi na sisilok, eburu mi lakleklen tuturun, la lodoxoma nunuan, 10 kusu miba epovo do mina soxolik ka lempanga sala i nunuan la kerepmo lorooro axap atnimi naba dadat, la kopmen teveloklok kakapmek noxo nemen teren se at laaleng ete at ne Karisito; 11 la lorooro atnimi nabak mokso xusu minaba visik asu levempipisik nunuan, ne Iesu Karisito naba lox asuusu i at lorooro atnimi; kerepmo lisisixam eburu mi leemi asu nabat pas ti ne Moroa.

Pol Ga Nemen At Loxokoxo

12 Luvutnetak mi luvurinuk. A vara i xusu minaklen nunuan i do mo levesongsongot gat pot saparav ia, ga lok tooro aleng tinotno lususu at Lagale Lavavang. 13 Kuren la mo luvuttadi esep at loorong silok eburu mi luvuttadi di nemen de, diklen i do nia ak lok at loxokoxo mila nenia lasaxaruki at ne Karisito. 14 Mo lemenemen tarak nade xeneng at loxokoxo i lox alolos bok buaang nedi limixin nuunu kusu dina vavang abelemes mi levelinga at ne Moroa la kopmen Tamara atdi.

15 I ruturun leventaba di vavang mi ne Karisito kusu ri lox asilok levenasen atdi, di umsu mi loklok ti ngaongao ri lempanga at lentaba vetpes la loklok tik lox asilok di; ketla leventaba di vavang mi luruptuvuk atdi i nunuan. 16 Di lox i mi labalamu, atla diklen i do ne Moroa ga raba ia mi lugugu ri vaase pe Lagale Lavavang. 17 Nedi nom luvuttadi di paase asu ne Karisito, di vara i do dina lox asilok levenasen atdi. Di doxoma i do dina lox aurut gamasa levesongsongot mavana rak atla nia a nemen at loxokoxo. 18 Nia xopmen ana doxoma solo i nom. A momo mun dola at leventaangas axap dina vavang mi ne Karisito; keke i do lavavara atdi xopmen nak mokso.

19 La a lok momo bok mila aklen i do at levesingising atnimi la loklok tooro at Loroonan Kaala at ne Iesu Karisito, dinaba soxomus asu ia basinge na loogu xokoxo. 20 Lavavara axap at labalak do nenia a noxo subu basinge lugugu rak la ana lok mamangan, ketla at levenaleng axap nia anoxo marat tangarang kaka teta xusu limixin dinaba ven kisip ne Karisito keneng at lorooro rak do nenia move ana rooro xopla at loxonaleng do nenia ara met pam. 21 Lavanga salai lorooro? Tia ne Karisito mun. Do nia ana met, naba lox avukat aleng. 22 Dola lorooro rak nak lox abao, nenia ba lok tevengugu nunuan. Kerepmo la nia axoklen i dola ua langas nenia aba soxolik ka i. 23 Lodoxoma rak i ekarakat ti legepu nep. A vara aleng i do ana on basinge na lorooro la ana nemen buru mi ne Karisito, no mi lox avukat tinotno. 24 Ketla i epovo rinotno bok do nenia aba nemen kusu ri lok tooro nimi. 25 Aklen tinotno i la a xasep do aba nemen. Nenia aba nemen eburu minemi axap, ti lox asilok lususu at lunuunu atnimi, la kusu lomomo na silok keneng at lorooro atnimi. 26 Kuren la do nia ana nemen buru bok minemi, anaba lok nimi xusu lomomo atnimi naba susu aleng keneng at laasen at ne Iesu Karisito.

27 Nemen mita doxoma solo ri lavanga salai mo naba vot saparav ia, ketla luruptuvuk atnemi na epovo mi Lagale Lavavang at ne Karisito. Kuren la do nia ana vot pasa bok nimi kopla a noxo vot, aba ronga ba i do mi tu lolos mi legese belen la legesedoxoma, la mit kis eburu ngan legesara kusu mina esep lolos ti lunuunu mumu Lagale Lavavang. 28 Nemen mita marat atnedi di munepen minimi; amisik mina belemes, la nom lurutu lolos atnimi naba lok ngan loklok katling tidi do nedi dinaba seeve la nemi miba ruuna ka lorooro avolo, mo ne Moroa xa naba raba nimi min. 29 Moroa ga raba nimi mi lugugu at ne Karisito, kopmen do at lunuunu xusuk ketla minaba ekip tangarang bok mi losongsongot. 30 Nedik ta nemen ap mo leesep. Nom mun leesep miga reven ia aga esep teren migomgo, la miga ronga i do nia move a vesep tin at lorooro rak.

Copyright information for `MMX