Psalms 102

Lisingising At Laau Mi Lumumuat Teren

O Leeme Silok, una ronga lerengteng tarak la una lox epovo lisingising tarak ti loklok tooro ram tia. Uguta raba arulu ia at loxonaleng ak lok at lumumuat. Una ronga res tarak la una lox epovo soso levesingising tarak!

Lorooro rak na i sonao ngan lusuxa; la lanmet tarak i anan labantuxu rak ngan laxao. Dip sev asi ia ngan levempivilis mang; la lavavara anan tarak ira xap pam. At mes silok tinotno; labaaxin tarak ira gelegen axap la labantuxu rak na ira vaa nga at laxasi. A lok ngan lavatpixa aaxa no xeneng at lamatbin, a lok ngan bok lavatdudu i nemen kusuk to at lemenemen ira bin pam. Axo vunga at lengkanimin; ak lok ngan tinotno lapka ik lok tutulu kap to vana at loogu. At laxanaleng axap lavamunepen tarak di paase vupu ria; la nedi ua dik lok kalise ia, di tong laasen tarak at loxonaleng di paase asi lentaba vetpes.

La mumu i mo lebelemamao silok taram, laxakup i lok ngan ta leveluxa rak, la a inin elong levendan inin mi levengkabili dan at luxatli rak. Uga rebeng kaka ia la uga lu xepe minia. 11 Lorooro rak i lok ngan ta lamamau ukantinao; la a lok ngan tinotno levempivilis mang.

12 Ketla nenu Leeme Silok, unaba nemen amisik ngan Loorong Lexen; lavaola axap dinabam domasu ram. 13 Unaba ravasu la una lox aru amu lemenemen Saion; loxonaleng ira vot pam kusu tu ri belemumu i; loxonaleng mokmokso nga na ren. 14 Lavasaxaruki ram di vavara aleng i, keke i do limixin petpes diga sele utur i la ira bin ta; la keke i do mo lemenemen ira lok kapmek axap pam, ketla move di balamu aleng i.

15 Larabung mixin axap dinaba marat at Leeme Silok; la lavaorong at lavatbung menemen dinaba marat at lolos teren. 16 Leeme Silok naba vaxaru amlong lemenemen Saion, kerepmo neni naba lox asaxaven lolos teren. 17 Neni naba ronga nedi limixin teren di baava, la ni naba lox epovo levesingising atnedi.

18 I epovo do tara na malagan li mo lempanga Leeme Silok ga lox i xusu mo lavaola melemu diba utus i, la dinaba emi asu min. 19 Leeme Silok ga reven su boro vana at lenep kaala ren no vana; ga reven su boro vana at lemenemen teren ude xopok at lavatbung menemen. 20 Ni ga ronga lanteng atdi digak lok at loxokoxo la ga lox asepmus nedi ua ga auret kusu dina sev amet nedi. 21 Kuren la dinaba vavang mi laasen teren to Saion, la dinaba emi asu min to xeneng Jerusalem. 22 At mo loxonaleng levenabung mixin axap eburu mi levengkitkis orong dinaba etu buru la dina lotu saparap Leeme Silok.

23 Laau ia nave la Leeme Silok ira lox amolos pam ia; ira lox atmut pam lorooro rak. 24 O Moroa, laau ia nave la uguta lok kepe soso ia. O Leeme Silok, nenu u rooro amisik.

25 Uga rudum li lavatbung menemen ganoxa, la uga lok laxalibet mi lukngam akmokso. 26 Dinaba sonao, ketla nenu unaba nemen amisik; dinaba maut ngan lenbantamon. Unaba lu asu midi ngan lenbantamon, la dina sonao. 27 Ketla levereven taram kopmen nak lox ekun, la lorooro ram noxo xap. 28 Laxamdak mi laxaalik atnema dinabak lok keneng at loklok tatao maxopok at loxokok taram; levempipisik li atnedi dinaba rooro avukat mun.

Copyright information for `MMX