Psalms 105

Moroa Ga Lok Tatao Limixin Teren Me Israel

Nedik ata tong avukat ti Leeme Silok, ata tong asu lolos teren; ata tong axasev i ri levenabung mixin buaang, mumu lempanga sangsangu neni ira lok pam i. Atak pixan emi asu ri Leeme Silok; ata tong asu lempanga nunuan neni ira lok pam i. Ata momo mila nedik ateren, la nedi di lotu parav i mi lebelen di axap dina sosoro. Atat pas parap Leeme Silok atdik kusu ri lok ka leveloklok tooro, la ata lotu parap (singising, lok ngangao) amisix i. Nemi livipisik li at ne Abaram, laradi gugu at ne Moroa, la nemi livipisik li at ne Jakop, mo laradi ne Moroa ga soxolik ka i. Minam doma aklen ti lempanga sangsangu ne Moroa ga lox i, la mo levesongsongot neni ga raba limixin munepen min.

Leeme Silok neni ne Moroa atdik; la mo levempapaase matmatkun teren ti limixin axap at na lavatbung menemen. Neni naba tu amisik at lekabus teren, la naba lox epovo mo laxakaape ren tinedi larabin sangaun kobot laraola. Neni naba doma amisik livirivit li ni ga lox i mi ne Abaram la mo laxakaape ren ti ne Isak. 10 Leeme Silok ga lok lekabus mi ne Jakop, mo lekabus ua naba nemen amisik. 11 Ni ga lok ti ne Jakop keretna, “Anaba raba u mi na lenep silok Kanan, la na laxangka naba nemen ngan ataram axa.

12 Limixin at ne Moroa di goxo buaang, la diga nemen kadiong ngan lavaose to at lenep silok Kanan. 13 Diga vovo saasaa onon mun at levenep silok uto at levenep silok petpes, la at lara kitkis orong silok uto at lara kitkis orong silok petpes. 14 Ketla ne Moroa goxo ke xepe ba tara gita lox abaava nedi; neni ga xok nedi, la ga sak pinak lavaorong silok mi levelinga i lok keretna, 15 “Nemen gat mita lox asongot limixin soksoxolik tarak; la nemen gat bok mita lox asongot lavaeme vapaase ali rak.”

16 Leeme Silok ga riki asi lean kangking ti lenep kangka atdi, la leveluxa atdi gara xap pam. 17 Ketla neni ga riki amgo lara laradi ri limixin teren, laasen teren ne Josep, mo diga sesep min kusu naba ravasu ngan lasaxaruki ro Isip. 18 Diga xoxo alis luxangkedek teren mi lemparoos sen, la diga vaxa onga i mi loxon aen. 19 Josep ga nemen ngan laradi xokoxo, ga se at mo laaleng lavapaase ali ren ga soorun; levelinga at Leeme Silok ti ne Josep ga lox asuusu i do neni goxo raba arulu i. 20 Loorong me Isip ga soxomus asu i, ni lamgomgo at levenabung mixin buaang la ga lox asepmus i. 21 Neni ga lok li ne Josep kusu nam gomgonga lagavaman teren; la ga lok li box i ri lok tatao mavana ap mo lenep silok Isip. 22 Ni ga ruuna lolos mavana atdi lentaba luvuttadi amgomgo at loorong la gak lok ka bok levelinga ren kusu ri anasa luvuttadi mukun.

23 Melemu ne Jakop eburu mi limixin teren diga beles ukeneng Isip, la digara nemen ta go ap mo lenep silok. 24 La Leeme Silok ga lox avosok aleng nedi go, la ga lok nedi diga lolos aleng tinotno ri lavamunepen atdi. 25 Neni ga lok limixin me Isip diga bele mumuat ti limixin teren, la lebelen di ga xapmek aleng tidi. 26 Melemu Leeme Silok ga riki ne Moses laradi gugu ren uto ri limixin teren, la ga riki bok ne Aron mo neni ga soxolik ka i. 27 Duga lok leveloklok katling at ne Moroa kantubu atdi, la lempanga sangsangu bok teren keneng at lenep silok Isip. 28 Neni ga riki lamain bonot la ga lox amain axap mo lenep kangka; ketla leme Isip move diga ronga xepe levelinga ren. 29 Neni ga vuk gili laradan atdi ri lada, la laxanmat axap digara met. 30 La lenep kangka atdi ga umsu mi laxangkoak, mo digat los beles bok uto xeneng at lengkot mikmidi at lubung amgomgo. 31 La ne Moroa ga tong i, la laxanulang mi laxan ngirobo diga umsu aleng at mo lenep silok axap.

32 La ni ga riki lavatbet uat eburu mi lavanga ga mam, ukeneng ap mo lenep silok atdi. 33 La dugak paksa asi larauna vaen atdi, eburu mi larauna pik bok la ga lox asubu bok larauna axap. 34 Neni ga tong mun i la, laxasixu diga vot, ga buaang aleng la di goxo epovo rinotno kusu ri exes di, 35 diga van axap lempanga ga suusu at laxangka; la diga van axap bok lempanga digat lotlo i. 36 Neni ga sev amet axap laxamdak temes avot keneng at lara kitkis koetemen to Isip.

37 Melemu neni ga lam asu limixin me Israel, digap kip ka laxa siliva la gol at leme Isip, la nedi axap diga rooro nunuan la diga lolos. 38 Limixin me Isip diga momo aleng at limixin me Israel diga vas kaxat basinge di, mila diga marat aleng atdi. 39 Moroa ga vung pava nedi mi loxontakabu kusu ri lok tatao di, la lababao at laxao ti raba nedi mi laxasep at lengkanimin. 40 Diga sing ne Moroa, la neni ga raba nedi mi levempixa (quail) kusu ridi ri anan, la ga raba avan mais nedi mi lengkide boro vana at laxalibet. 41 Neni ga lox arem suang lara lavaruat, la ladan ga rem soobang su ukamang; ga ngan lavatdan sen la ga sesen go xeneng at lamatbin; 42 mila neni gam doma mo laxakaape xaala ren, ga raba i ri ne Abaram laradi gugu ren.

43 Kerepmo neni ga lam asu limixin soksoxolik teren basinge lenep silok Isip, mi langsangan lososoro, la digak pixan la digap kup momo. 44 Neni ga raba nedi mi lenep kangka at lentaba levenabung mixin petpes: la digara ruuna ka nga leventaamang atdi, 45 kusu limixin teren diba ronga res at levelinga ren, la dina mumu asu mo lodoxoma ren. Ata emi asu mi Leeme Silok

Copyright information for `MMX