Psalms 106

Leveloklok Anarong At Leeme Silok Ti Limixin Teren.

Nedik ata emi asu mi Leeme Silok. Ata tong avukat ti Leeme Silok, mila neni mun i lox avukat aleng, la labalamu ren naba nemen amisik. Kopmen tara i epovo na tong axap leven angsangan lempanga silok neni gara lok pam i. Kopmen tara i epovo xusu naba lox epovo lodoxoma ren mi leemi asu rin. Nedi dinang tonga res at levelinga at ne Moroa la di lok amisik lempanga ik mokso, dina momo.

O Leeme Silok. Uguta domampe rak, mo do una lok tooro limixin taram. Una us abeles box ia ukeneng at limixin taram, mo do una lox asepsu di. Una ke ia aba ven limixin taram dinaba ngasang kobot, la ana ruuna bok tomomo eburu minedi; la anak lok eburu bok midi xusu ri emi asu minu.

Marak lok pam laxakapmek kerekngan lavalabat atnama diga lox i, mara soogong pam la mara bixurun. Lavalabat atnama di goxo xasep nunuan at lempanga sangsangu neni ga lox i ro Isip. Diga domampe mo levenaleng buaang neni ga lox asuusu labalamu ren tidi. La digang tonga viribang tin, ne Lanaraavuk to at Loxontas Memele Ketla neni ga lox epovo laxakaape rentidi la ga lox arooro avolo di go, la kerepmo ni ga lox asuusu mo langsangan lolos teren. Neni ga tong mun i ri Loxontas Memele, la laras gara mes ta, la neni ga lam avolo limixin teren at laxangka mesemes. 10 Neni ga lox aroo di basinge lavamunepen atdi, la ga lox asepmus di basinge limixin esep boro Isip. 11 Laras ga vula pe axap di, la kopmen tinotno tara ga sepsu basinge laniu. 12 Melemu limixin teren diga nuunu at levengkakaape ren, la digak pixan emi asu min.

13 Ketla diga domampe soso mun lempanga silok ne Moroa ga lox i, la di goxo ngangais ba ri tevelinga axasep teren. 14 To at lamatbin diga umsu aleng mi langaongao anan, la diga lok tong pen ne Moroa. 15 Kuren la neni ga raba nedi mi levempanga nedi diga sing tin, ketla neni ga sep bok nedi mi lanmeres kapmek.

16 Diga tere mumu aleng ne Moses, la ne Aron to at lamatbin, nedu luradi gugu at Leeme Silok. 17 Melemu lavatkangka ga rem suang la ga xonom ne Datan, la garak mit bok ne Abiram midi loxoetemen. 18 La laxao ga si boro vana la ukopok tinedi diga mumu asu du, la ga rin asonao axap mo luvuttadi.

19 Melemu leme Israel diga lok lovovo bulumaxao ro Sinai, la digara lotu parav i ngan mo lomoroa xaxarang. 20 Diga sok sisixe ne Moroa mo i silok aleng la diga lok ekun lamakmaran teren, la diga lotu parap mo lovovo at lubulumaxao, mo i anan pivilis. 21 Diga domampe rinotno ne Moroa mo ga lox aroo di, mi langsangan lolos teren to Isip. 22 Diga domampe mo lempanga lolos, neni ga lox i go, la lempanga sangsangu neni ga lox i ro at Loxontas Memele. 23 La ne Moroa ga lok do naba sele ut kepe limixin teren, ketla laradi gugu ren ne Moses, ga vaase pe ne Moroa xusu noxo lox asuusu lebelemamao ren tidi.

24 Melemu diga sok tixirixes kepe mo lenep kangka ramtaba, mila di goxo nuunu at laxakaape at ne Moroa. 25 Digak lok to xeneng at laraugu kadis atdi la digara gagalinga amisik la di goxo ronga ba levelinga at Leeme Silok. 26 Kuren la neni ga xaape rinedi mi luruturun do ni naba lok nedi dina remet to at lamatbin; 27 la na lok livipisik li atdi, dina epeseves ti levenabung mixin petpes la na ke xepe nedi, dina remet etaba onon to at levenep silok petpes.

28 Melemu nedi limixin at ne Moroa digak lok to Pior, diga lotu saparap lomoroa xaxarang ne Baal la digara anan leventamtaba digap lavang min ti lenmoroa kopmen torooro atdi. 29 Kuren la diga lox axatu lebelemamao at Leeme Silok mi leventuptuvuk kapmek atdi, la langsangan lanmeres kapmek ga vot kantubu atdi. 30 Ketla ne Penias ga ru upana la ga sep amet mo luradi xapmek la mo lanmeres ga xap ta. 31 Na lavanga avukat, ne Penias ga lox i, move limixin at ne Moroa dim doma i; la dinabam doma su bok teren at na levenaleng i tu umelamgo.

32 Melemu diga lox amusak Leeme Silok to Meriba at levempuuvut dan; la ne Moses ga xip tutu mi mo lumumuat mumu laxakapmek atdi. 33 Diga lox abelemamao i, la ni ga paase solo la ga paase tupgat ta.

Leme Israel Diga Rupot To At Lenep Kangka Ramtaba

34 Leme Israel di goxo sev amet lavamolon ap mo lenep kangka kerekngan Leeme Silok ga tong taba di min ti lox i; 35 ketla diga epot ka di, la diga reven seo ka loklok benben atdi. 36 Limixin at ne Moroa diga lotu parap laxampoovo vanga, kuren la diga oon at levesin mumu mo loklok atdi. 37 Digam taba mi laxamdak mi laxaalik atdi, ngan laplavang atdi ri levenmoroa xaxarang me Kanan. 38 Diga sev amet mo laxamdak mi laxaalik ua kopmen taxakapmek atdi, la mumu mun mo langas diga lox abilinga mo lenep kangka ramtaba. 39 La kerepmo bok diga lox abilinga nedi xa; diga ke xepe rinotno levelinga at ne Moroa.

40 Kuren la Leeme Silok ga belemamao aleng limixin teren, neni ga musak teng tinotno midi. 41 La neni ga raba arulu di kusu nedi lavamolon la lavamunepen atdi dinabam gomgonga di. 42 Diga baava aleng mi levenaknixip, mo lavamunepen atdi diga raba nedi min. La diga nemen aleng maxopok at lolos at levendoxoma atnedi lavamunepen. 43 Buaang levenaleng Leeme Silok ga rebeng asu ka limixin teren basinge di, ketla move di goxo mumu asu levelinga ren, kuren la digam subu tup tino ukeneng at laxakapmek silok. 44 Ketla Leeme Silok ga ronga nedi, at loxonaleng digang teng tin, la neni ga ronga xibis lumumuat atdi. 45 Mumu mo lumumuat atdi, neni ga doma mo lekabus teren; la mumu langsangan labalamu ren. neni ga lox ekun lodoxoma ren. 46 La neni ga lok lavamunepen atdi, diga suma xapmek mumu loklok diga lox i ridi.

47 O Leeme Silok ne Moroa atnama. Lox aroo nama, la una lam asu nama boro xantubu at na larabung mixin, kusu maba tong avukat tu la mana emi asu mi laasen kaala ram. 48 Ata emi asu mi Leeme Silok, Moroa me Israel; ata emi asu min monga la amisik. La limixin axap dina vaase xeretna, “Tuturun!” Ata emi asu mi Leeme Silok!

Copyright information for `MMX