Psalms 118

Lisingising Ti Tong Avukat Ti Leeme Silok

Ata tong avukat ti Leeme Silok, mila neni mun i lox avukat la labalamu ren i tu lexen. Limixin me Israel, mina tong i do, labalamu ren i tu lexen. Nemi lavamaasa, livipisik li at ne Aron, mina tong box i do, labalamu ren i tu lexen. Nedi bok limixin di lok linglingun at Leeme Silok, dina tong i do, labalamu ren i tu lexen.

Keneng at levenaleng at levenmumuat, aga toro ke at Leeme Silok la ni ga ronga ia la ga lox asepsu ia basinge levenmumuat. Leeme Silok ik lok eburu minia, la nia xopmen a noxo marat at lempanga limixin kapmek diba lox i ria. Leeme Silok ik lok eburu minia; neni mun laradi loklok tooro rak. La nenia anaba ven Leeme Silok na sak tup mi lavamunepen tarak. Naba lox avukat do nedik ata nuunu saga at Leeme Silok, la nemen gat dik guta nuunu saga at limixin. Naba lox avukat do ata doxoma saga at Leeme Silok, la nemen gat dik guta doxoma saga at lubung amgomgo at limixin.

10 Lavamunepen buaang diga tu kangkan ia, ketla aga sep amet axap di mi lolos at Leeme Silok. 11 Diga tu kangkan ia at lengkot axap, ketla aga sep amet axap di mi lolos at Leeme Silok. 12 Diga tu kangkan mu ia ngan laxampo masum, ketla soso mun di met axap ngan ta laxao i anan levempivilis mang. Ara sele utut kepe axap di mi lolos at Leeme Silok. 13 Diga esep tangarang minia la diga sev asi ia, ketla Leeme Silok ga lok tooro ia. 14 Leeme Silok ga lox alolos ia la neni laradi loklok arooro rak.’’

15 Limixin mo dip kup mi lomomo keneng at laraugu kadis at limixin mokmokso; mila dira sak tup pam mi limixin munepen atdi. La lolos mun at Leeme Silok ik lox i na lempanga. 16 Lolos at Leeme Silok ga lok tooro dik kusu ri sak tup mi lavamunepen atdik; lolos teren ga lok tooro dik keneng at leesep.

17 Nenia a noxo met, ketla aba rooro, la anaba paase asu lempanga Leeme Silok ga lok pam i. 18 Leeme Silok ira lox asongot kapmek tinotno vam ia, ketla neni ixo ke xepe ba ia xusu ana met.

19 Mina suang lumusmaragu at loogu laplavang, kusu aba beles la ana emi asu mi Leeme Silok.

20 Anai ni lumusmaragu at Leeme Silok; limxim mokmokso kusuk mun di epovo kusu dina beles teren.

21 Leeme Silok, nia a emi asu minu, mila uga ronga lisingising tarak; la uga lok tooro ia xusu ana sak tup mi lavamunepen tarak.

22 Mo luuat limixin kipkip gu diga sok tixirixes kepe i, ga ravasu ngan luuat kis la lugugu ren i silok aleng. 23 Leeme Silok axa ga lox i na, la i lox avukat aleng at levereven atdik. 24 Na xa laaleng ni laaleng ti lok katling loklok tooro at Leeme Silok; ata sosoro la ata momo aleng min. 25 Leeme Silok, una lox asepsu nama basinge lavamunepen atnama. O Leeme Silok, una lok nema xusu lorooro atnama naban manton aleng.

26 Luvukat ti mo lara i vubeles uto xeneng at loogu laplavang mumu laasen at Leeme Silok. Manaba lox anarong nemi axap mira vubeles pam to xeneng at loogu laplavang at Leeme Silok. 27 Leeme Silok, neni ne Moroa, la neni ira lox anarong pam dik; ataba tu eburu mi lengkakan bisi at lentingen dik at na laaleng momo la atap tii ben kangkan mo loxonin orong.

28 Nenu mun ne Moroa rak, la a tong aorong tu; la a xip aurut laasen taram mumu lolos silok taram.

29 Ata tong avukat ti ne Moroa, mila neni mun i lok nunuan. Mo labalamu ren naba nemen lexen.

Copyright information for `MMX