Psalms 122

Leemi Asu Ri Lemenemen Jerusalem

Aga momo aleng atla diga lok tia, “Uto dik at loogu at Leeme Silok.” La ana nga mara vubeles pam at langas povolo la mara tu nga ro xeneng at lemenemen Jerusalem.

Diga vaxaru li amu na lemenemen ngan lemenemen silok la diga penbixa avukat tinotno i. La nedi larabibinat me Israel dit pas pot de; nedi dit pas kusu dina emi asu mi laasen at Leeme Silok, kerekngan mo levempapaase matmatkun Leeme Silok ga raba limixin me Israel min. Na de Lavaorong Silok boro Israel digat kis at lengkonin atdi xusu dinang tonga linga at limixin.

Mina sing kusu limila nak lok to lemenemen Jerusalem; i epovo do nedi di vavara aleng na lemenemen, dinaba ngasang kobot. I epovo bok do limila nak lok keneng at na lemenemen la Leeme Silok na lok tatao avukat limixin keneng at laraugu silok atdi. Nia a lok lisingising mumu lemenemen Jerusalem keretna, “Limila nak lok keneng teren.” Ak lox i xerepmo kusu lentaba rak la larapentangas tarak dinaban tuuna lorooro nunuan. Nia a sing bok Leeme Silok kusu nemi limixin mego mina sang kobot avukat atla loogu at Leeme Silok ne Moroa atdik ik lok go.

Copyright information for `MMX