Psalms 132

Leemi Asu Ri Loogu Laplavang

Leeme Silok, nemen uta domampe ne Devit mumu mo levenmumuat neni ga vekini min. Leeme Silok, una doxoma aklen ti mo laxakaape ren gara lok pam i ru; nenu ne Lanaraavuk ne Moroa at ne Jakop. Devit ga lok keretna, “A noxo onon uto xolonu xopla ana midi ro at loora rak; a noxo lok mamana xopla ana unga, naba se rinotno at loxonaleng anaba raba tenep kangka ri Leeme Silok ngan ta lang kolonu ri Lanaraavuk ne Moroa at ne Jakop.”

Nema leme Betilem maga ronga levelinga mumu lobokis at lekabus la maga long lenget kaka i ro laraamang gak lok saparap lemenemen Jearim. La maga lok keretna, “Atat pas uto loogu laplavang at Leeme Silok, la atap lavang to melamgo at loxot kitkis teren.”

Leeme Silok, una beles eburu mi lobokis at lekabus uto xeneng at loogu laplavang, neni lampoovo at lolos taram, la una nemen lexen ta de xeneng. A vara i do lavamaasa ram dinak lok amisik lempanga ik mokso; la a vara i do limixin taram dinap kup mi lomomo!

10 Uga lok laxakaape ri lasaxaruki ram ne Devit; kuren la Leeme Silok, uguta lox abulubun loorong soksoxolik taram. 11 Uga lok laxakaape lolos ti ne Devit la ni laxakaape ua u noxo lok ka amlong i, la i lok keretna, “Nenia anaba soxolik tara tamdak taram kusu naba ravasu ngan loorong, la naba rukun u rim gomgonga limixin. 12 La mo do luvutnurum dina ruturun ti lekabus tarak, la ti levelinga nia anam taba di min, luvutnitna di bok dinaba tu kun u ngan lavaorong at mo bok leven maares melemu.”

13 Leeme Silok ira soxolik ka vam lemenemen Saion; la i vara i xusu na lox i ngan langkolonu aulis teren, i lok keretna, 14 “Anaba nemen amisik ba ia de; la nia a vara i xusu anabat kis ngan Loorong Silok de at na loxot. 15 Anaba lox apnovos lemenemen Saion mi mo lempanga neni ik pakes tin; la anaba lox epovo lavakpakes at luvuttadi banbalo mego mi lempanga anan tidi. 16 Anaba lox anarong lavamaasa mego keneng at leven gugu axap nedi dinak lox i; la limixin dik lok keneng teren, dinak pixan la dinap kup mi lomomo. 17 Anaba soxolik kaka tara at livisik li at ne Devit go xeneng kusu nabat kis ngan loorong mi laasen silok teren; la anaba lok tatao avukat lixitkis orong at loorong soxolik tarak de xeneng at na lemenemen Saion. 18 Anaba sak pava lavamunepen teren mi lainmangan, ketla limixin at lixitkis orong teren dinaba ngasang kobot la dinap novos.”

Copyright information for `MMX