Psalms 135

Loxompixan Ti Emi Asu

Leemi asu ri Leeme Silok.

Nemi lavasaxaruki at Leeme Silok, mina emi asu mi laasen teren;
la nemi mo mi gugu ro at loogu at Leeme Silok, la to xeneng at loogu laplavang at ne Moroa atnedik. Mina emi asu mi Leeme Silok atla neni i vukat; minak pixan emi asu ri laasen teren, atla mo loklok i nunuan aleng. Neni ga soxolik kaka leme Jakop kusu tin; neni ga soxolik ka limixin me Israel kusu ateren akmokso.

Aklen i do Leeme Silok atnedik i silok, la i silok polo mo leven moroa vetpes. Neni i epovo na lok lempanga salai neni i vara i to vana at laxalibet, la de at lavatbung menemen, to xeneng at laras la to xopok tubu at lisimaramain. Neni ik lox asuusu lamanman takabu boro axa at latnese at lavatbung menemen; la ik lok lavanga i mam su boro at lamanman takabu, la i susuang asu lamanman boro at loogu lili ren.

Neni ga sep amet laxamdak temes avot at limixin me Isip, la lempanga bok mi lavanuet kangkedek atdi. Neni ga lox asuusu bok lempanga lolos la sangsangu xusu ri lox asongot loorong eburu mi luvuttadi silok ua diga gugu maxopok teren. 10 Neni ga sele utut buaang levenabung mixin, la ga sep amet lavaorong lolos, nedi ne 11 Sion loorong at leme Amor, Ok loorong at leme Basan, la nedi lavaorong axap me Kaanan. 12 Neni ga lok ka leveng kangka atnedi na lavaorong la ga raba limixin teren min; neni ga raba leme Israel min.

13 Leeme Silok. Dinaba tong asuusu amisix i do nenu ne Moroa; la laxam pipisik li melemu dinabam domasu ram. 14 Leeme Silok nabak lok see at limixin teren; neni naba belemumu lavaanat soxolik teren.

15 Limixin boro at levenabung mixin petpes di lok levenmoroa atdi mi la siliva la gol, luvuttadi mun mede xopok di vop di mi leventingen di. 16 Di ruuna leven ngusno ketla dixo epovo ri paase la levengkatli bok mo, ketla dixo epovo ri reven. 17 Levenbaalung mo atdi, ketla dixo epovo ring tonga; la dixo epovo rinotno bok tik lok ka mamas. 18 A vara i do mo luvuttadi ga vop mo lempoovo vanga la dira nuunu saga atdi, dinaba vee voovo vanga nga mo lentaba diga vop di!

19 Limixin me Israel, mina emi asu mi Leeme Silok; nemi lavamaasa at ne Moroa, mina emi asu min. 20 Nemi lubung mixin me Levi, mina emi asu mi Leeme Silok, la nemi axap mo mi lotu saparav i, mina emi asu min. 21 Mina emi asu mi Leeme Silok to xeneng Saion, ik lok to xeneng at langkolonu aulis teren Jerusalem.

Leemi asu ri Leeme Silok!

Copyright information for `MMX