Psalms 144

Lorotong Avukat At Loorong Ti Ne Moroa

Nia a emi asu mi Leeme Silok ni Lurutu See Pe rak! Neni i arala ia mi loklok ti esep, la ik lox agagas ia ri leesep silok. Neni Lurutu See Pe la Lentupe rak, neni Lurutu See Pe rak, la Loogu Matmatkun la Laradi Loklok Arooro rak; neni laradi ua a nuunu saga ren kusu naba kubak pe ia. La neni ik sak tup mi levenabung mixin petpes la ik lok li di maxopok at loklok tatao rak.

Leeme Silok, limixin nedi lempanga salai, la uram domamu solo di; nedi lempanga gamasa mun ketla ung tonga levelinga atdi? Nedi di lok ngan mun lamanman i rava polo; la levenaleng atdi i lok ngan mun lamamau i sonao.

O Leeme Silok, una vaxat das laxalibet la una vas si ude xopok; una long tu at lempatkaana la dinaba soobang asu lusuxa. Una riki asu lamam(lavanga i mam) la una sak epeseves lavamunepen taram. Una so asu mi levesoosoo ram kusu naba lox amarat di la dina sixiro. Una song asi boro vana, la una sat asu ka ia boro xeneng tubu at lamaxat dan, la una lok li asepsu ia; una lox aroo su ia basinge lolos at limixin me xadiong, ua dixo tong asu rinotno luruturun, ketla di xaxarang la dirat los polo laxakaape atnedi, mo diga tong i do diba tong asu levelinga ruturun.

O Moroa, anaba vixan loxompixan maxat tu. Anabak sak ligita rak la anak pixan tu. 10 Uk lox alolos lavaorong kusu dinak sak tup mi lavamunepen atdi, la uk lox (paxat) asepsu lasaxaruki ram ne Devit. 11 Una lox asepmus ia basinge lebelemamao at lavamunepen tarak; la una lox asepsu ia basinge lolos at limixin boro vetpes ua dixo tong asu luruturun ketla di xaxarang la dirat los polo laxakaape atdi.

12 A vara i do laxamdak puraau atnema dinaba lok ngan larauna i suusu urut, la i lolos. La a vara box i do laxamposono maxat atnema dinaba milik maaranu (ngan levempos diga malagan i) la dinaba nganang levenmesuluk axap at loogu at loorong. 13 A vara i do laraugu liili atnema naba unumsu mi lara met luxa axap. La a vara i do leve sipsip to at lenep atnema, dina pisik aleng ngan lasangaun larabin sangsangaun kobot. 14 A vara i do laxan bulumaxao atnema, dina pisik aleng la di noxo pisik amet kopla dina seeve. A vara i do xopmen tanbulu xopla tanteng to at larangas atnema.

15 La lomomo naba vot parap mo lubungmixin mo do na lempanga na ravasu ruturun tidi; la lomomo naba vot parap nedi ua Leeme Silok, neni ne Moroa atnedi!

Copyright information for `MMX