Psalms 145

Loxompixan Emi Asu

Moroa, nenu Loorong Silok tarak. Anaba tong asuusu laasen silok taram atla nenu Loorong Silok la ne Moroa rak; anaba tong avukat amisik tu la a noxo xap tinotno ri tong avukat. Anaba tong avukat tu at levenaleng axap; anaba emi asu amisik minu la a noxo xap ti emi asu minu. Leeme Silok neni i nunuan aleng pologat, la i epovo rinotno do limixin dina emi asu min; atla ixo epovo xusu anaba re sa at lununuan teren ua i volo lakleklen tarak.

Limixin dinaba emi asu minu ri levempanga ugara lok pam i, tuka i at lara loola vetpes la ti lara loola melemu; la dinaba tong asuusu levempanga lolos ugarak lok pam i. Anaba paase asu lixitkis orong eburu mi laasen silok taram, la anabam doma mumu leven gugu maraanu nenu ugak lox i. Limixin dinaba paase mumu leven gugu lolos nenu ugak lox i, la nia anaba paase asu luvukat taram. Dinaba tere mo luvukat taram la dinak pixan mumu lebelemulus taram. Leeme Silok i ruuna labalamu mi lebelemumu, la kopmen nak belemamao soso ketla i umsu mi labalamu lexen. Neni i vukat ti limixin axap la i ruuna lebelemulus tinedi limixin axap ni ga rudum di.

10 Leeme Silok, lempanga rooro axap nenu uga rudum li di, dinaba emi asu minu, la limixin axap taram dinaba tong avukat tu. 11 Dinaba paase mumu lisisinang la lolos at lixitkis orong taram, la dina tong axasep limixin mi lolos taram, 12 kusu limixin axap dinabak leklen leven gugu lolos taram la lisisinang orong at lixitkis orong taram. 13 Lixitkis amgomgo ram naba nemen lexen, la kopmen tekavaxap at lixitkis orong taram.

Leeme Silok ik lok asoorun amisik leveng kakaape ren; la ik lox asuusu lebelemumu ren keneng at leven gugu axap teren.
14 Ik lok tooro nedi di vekip tangarang mi levenmumuat; la im tebeng aonon nedi ua diga subu.

15 Leeme Silok, levempanga rooro axap di reven tu mi leven doxoma voovo atdi, la um taba nedi mi leveluxa ua dik pakes tin. 16 Um taba epovo rinotno nedi, la uk lox epovo rinotno levem pakpakes atnedi axap.

17 Loklok at Leeme Silok in manton tinotno keneng at levempanga axap neni ik lox i, leven gugu ren ik lox i, ik lox i eburu mi lebelemumu ren. 18 Neni ik lok saparap nedi mo di ngising tin, nedi mo di ngising tin mi luruturun. 19 Neni im taba epovo ri levem pakpakes atnedi ua dik lok ngangao ren; ing tonga leven anteng atnedi la irak lox asepmus nedi. 20 Neni ik lok tatao nedi ua di vavara aleng tin, ketla neni naba sev amet nedi limixin dik lok laxapmek.

21 Anaba emi asu amisik mi Leeme Silok la mo lempanga axap ua neni ga rudum i, dina emi asu amisik mi laasen melemelengan teren.

Copyright information for `MMX