Psalms 44

Lisingising Ti Ne Moroa Nak Lok See Atdi

O Moroa, nema maga ronga rinotno mo lempanga matmatkun. Lavalabat atnama diga ga ven i nom levempanga sangsangu ugak lox i at levenaleng atdi gano migomgo. Maga ronga i do nenu xa uga saksu mi lavamolon, la uga vaxaxis limixin taram at lenep kangka atnedi. Uga lox asongot bok limixin at levennep silok petpes la uga lox anarong lubungmixin taram la diga ngasang kobot. Lubungmixin taram di goxo ruuna xaka nom lenep kangka at teesep. Kopmen di goxo ruuna xaka box i mi lolos atnedi. Diga ruuna ka i mi lolos mun taram, la digaklen i do uga nemen eburu minedi; nom i ga lox asuusu i do uga balamu di.

Nenu Loorong Silok tarak la ne Moroa rak, uk lok tooro limixin taram la dik sak tup mi limixin munepen midi, la mi lolos mun taram, nema ma sak tup mi limixin munepen minema; keneng at laasen taram ma sev asi di. Nia xopmen ana nuunu at losoosoo, kopla at lavarise rak ba lok tooro ia xusu na lox asepsu ia; ketla nenu, ne Moroa, uga lox asepsu nema basinge limixin munepen minema, la uga sak tup minedi digak lox angtungun tinema. Nema manaba emi asu amisik minu la manaba tong loklok avukat amisik tu la kopmen tekavaxap teren.

Ketla nanga ura sok sisixe nema, kuren la limixin munepen minema diga sak tup minema; kopmen bok ba una emu buru mi limixin esep atnema. 10 Uga lok nema la maga sixiro at limixin munepen minema, la diga lok kaka levempanga atnema. 11 Uga siam taba di minema xusu dina sep amet nema ngan lubung sipsip, uga lox epeseves nema uto ri levenep silok kadiong. 12 I lok ngan ta do uga sesep mi limixin taram ti luunun lixilik mene. Maga lok ngan lempanga gamasa mun.

13 Leven abungmixin petpes dik lok saparap nama, diga ven lavanga uga lox i rinema, di paase kalise la ding longon atnema. 14 Uga ke aie xepe nema la limixin boro at lengkot petpes ding longon arup nema, di piripat patlak la ding longon sese nema at levempanga it pot saparap nema. 15 Lainmangan i umsu at lorooro rak mumu mo levelinga atnedi 16 dit kis munepen minia la atnedi bok ding long angtungun tia, di tong asu lavapaase aksaksa la levelinga kapmek mumu nama.

17 Na lempanga axap ga vot saparap nama ketla ma goxo domampe u kopla nema gita los polo lekabus taram uga lox i rinema. 18 Ma goxo raba sinta u, la kopmen ma goxo ronga xepe bok at levelinga ram. 19 Ketla uga ke aie xepe nema kantubu at na limixin di lok ngan laxampanga sio; uga raba arulu nema keneng at lamain bonot.

20 Mo dola nema gita xap ti lotu saparav u, ne Moroa atnema, la do nema gita sing saparap lomoroa vetpes, 21 nenu gitabak len i, atla nenu uk leklen levendoxoma nemnem atnema. 22 Nema limixin taram, kuren la amisik dip sep amet nema. Amisik dip sep amet etaba nema ngan ta lubung sipsip, mo kopmen tara ri tupe di.

23 Leeme Silok, una aus! Una beleku kaxat! Una xatu upana! Nemen uta raba arulu rino axap ta nema! 24 Tila u lipe avolo nema? Nemen uta domampe levesongsongot mi levenmumuat atnema.

25 Diga vas amdamda nama, la maga subu midi xopok at laxangka; mak midi ngan ta luvuttadi met! 26 Ude, una lok tooro nema! U ruuna labalamu lexen tinama, kuren la una lox asepsu nema!

Copyright information for `MMX