Psalms 45

Loklok Epot At Loorong at Leme Israel

Levelinga nunuan i umsu at lodoxoma rak, la nia ara rivit na loxompixan ti loorong at leme Israel, nenia a gagas ti tong asu i ngan laradi akleklen ti malagan avukat mo i gagas lavanga mamalagan teren.

Loorong, nenu lampeneves, kopmen tara na lok ngan u. Levelinga ram ik sixit nunuan amisik. Moroa ik lox anarong amisix u. Loorong lolos, una lox agagas lavarise esep taram. Lisisinang taram i umsu la laasen bok taram i silok aleng.

Nenu loorong mi laasen silok, ut kis pana at la os(horse) ti esep. La uk sak tup mi lavamunepen taram ti lox alolos loklok mokmokso la levelinga ruturun. Levesoosoo ram i kasum, di soosoo beles at larapeve at limixin munepen minu. Limixin at leven abungmixin petpes di subu mi loklok ngangao ro saparap luxangkedek taram. Mo lixitkis amgomgo ne Moroa ga raba u min, naba nemen amisik la kopmen noxo xap. Nu um gomgonga limixin taram mi levelinga mokmokso. Uk lok momo mun mi leveloklok ik mokso la uk lox angtungun ti leveloklok ik lok kapmek. Ni lavasuun teren la ne Moroa, ni ne Moroa ram, ga soxolik ka u ngan loorong la ga raba u mi langsangan lomomo i volo lomomo atnedi lentaba lavaorong. Levempanga singsiga ram i so mavak ngan la mea (myrrh) la alos (aloes); limixin diga sinang laraugu at loorong mi levempanga nunuan (ivory), la di lox amomo u go mi leveng kompixan nunuan. Kantubu at lavakin di ruuna levenasen silok, laxaalik at lavaorong mo di tu, la at lenep tino at loxot kitkis orong taram, loorong tixin mo i tu, diga sinang i mi levempanga diga lox i mi logol i nunuan aleng.

10 Nenu loono ri loorong, una ronga na levelinga ana tong i ru; la uguta doma sola limixin taram mi libibinat taram. 11 Loorong naba veneves at levereven nunuan taram; neni laradi silok taram, la una mumu asu levelinga ren. 12 Limixin boro Taia dinaba raba u mi leventamtaba; limixin nopnovos bok dinaba lok tong i xusu dina sat lodoxoma ram, kusu una lok tooro di.

13 Loono ri loorong no i nemen keneng at loogu at loorong, neni loono maraanu rino! Ni i sigaara mi lisingsiga diga sokgatga i mi leteret gol. 14 Ni i sigaraa mi lisingsiga gigiliton teren, la di lam kaka i uto at loorong; ni i emu eburu mi lavakin pentangas teren, la di lam kaka bok di uto at loorong. 15 Di vubeles at loogu at loorong mi lomomo la lososoro.

16 Nenu loorong tarak, unaba ruuna laxanmadak temes solo, dinaba tu kun u eburu mi lavalabat taram ngan lavaorong, la unaba lok katling di lisi dina gomgonga mavana at limixin axap at na lavatbung menemen. 17 Na loxompixan tarak naba tong asu laasen silok taram kusu nedi lavaola melemu dinabam tere avolo laasen taram, la limixin axap dinaba emi asu amisik minu la kopmen tekavaxap teren.

Copyright information for `MMX