Psalms 49

Larangtangku At Lunuunu Saga At Lapnovos

Nemi axap, mina ronga ka i na! Limixin at levengkot axap, mina ronga xaka i na. Nemi limixin amgomgo mi limixin gamasa, limixin apnovos eburu mi limixin banbalo, mina ronga xaka i na. Lodoxoma rak naba xasep tinimi, la nia anaba vaase asu levelinga ri raba nimi mi lodoxoma avukat. Nia anaba vaase asu levelinga voovo, la anaba soxomus bok lavasuun teren do anak pixan eburu mi ligita.

Lavapaase rak i lok keretna:

Nia xopmen anak marat ti exip tangarang mi levenmumuat, at loxonaleng limixin munepen minia di ru kangkan ia. Mo limixin kakapmek di nunua i do dinaba ruuna ka lorooro nunuan mumu laxampanga solo atdi la dim simi xaka di at leven apnovos atdi la dik lox aru ka bok di. Ketla laradi ixo epovo ri ru korop ti lorooro axa ren, ixo epovo ri ru korop tin mi tuunun ti ne Moroa; atla luunun ti lorooro at laradi i silok aleng. Lavanga salai i vara na unun i min noxo epovo rinotno, ri lox aase i basinge lamaaut, la ni naba roo avolo.

10 Limixin axap di reven i do luvuttadi akleklen bok di remet, ngan bok luvuttadi rangtangku mi luvuttadi baulang. Nedi axap dinaba met basinge levenapnovos atdi la levempipisik li atdi dinaba ruuna xaka i. 11 Levenmaaut atdi naba lok ngan levenmenemen avolo atnedi; dinaba nemen amisik di e, keke i do diga ruuna lengkongkangka. 12 Lixitkis silok at laradi noxo lox asepsu i basinge lanmet; ni naba met bok ngan levempanga mi lavanuet kangkedek.

13 Limixin di nuunu saga atnedi xa, diba ekip tangarang mi lavanga salai mo? Lanmet ni laxavaxap atnedi. Di momo gamasa mene mi leven apnovos atdi. 14 Lanmet naba mumu asu di, la dinaba met ngan lubung sipsip. Limixin mokmokso dinabat kis silok polo di, atla nedi limixin kapmek dinaba nemen to at lemenemen at labarongan, la levenbaaxin tadi atnedi nabap sopso soso ro vaxalom basinge lara menemen aulis atnedi. 15 Ketla ne Moroa naba lox asepsu ia, ni naba lox asepsu ia basinge lolos at lanmet.

16 Nemen gat uta doxoma mu solo i do tara napnovos, la dola lapnovos teren na sisilok; 17 neni noxo xip kaka mo lapnovos eburu min dola ni na met. Lapnovos teren noxo emu min ti lorooro melemu. 18 Keke i do tara i ruuna lomomo at na lorooro; la keke i do limixin di emi asu min dola ni laradi nopnovos; 19 ni naba vot pasa lavalabat teren at lanmet, at mo loxot lamain bonot kopmen noxo xap, ketla naba nemen amisik. 20 Lixitkis silok at taradi noxo lox asepsu i basinge lanmet; neni naba met bok ngan levempanga mi lavanuet kangkedek.

Copyright information for `MMX