Psalms 50

Laplavang Tuturun

Lanaraavuk, neni Leeme Silok ne Moroa i paase; ni i toro ri limixin axap at na lavatbung menemen i ruka i at loxot laxangking it losu e la i se ro at loxot laxangking it los tuv e. Lisisixam at ne Moroa i soosoo su boro Saion, lemenemen silok i nunuan axap la i milik maraanu rino. Moroa atnedik nom boro naba vot, ketla ni noxo vot atnaasan; laxao bokbolot nabam gomgo rin, eburu mi langsangan lamanman bet nabak lok kangkan i. Ni naba ro ka laxalibet mi lavatbung menemen kusu dunaba ru rin la duna reven i na ila mumu loklok at limixin teren. Moroa i lok, “Muna lok bubua raba ia mi limixin tuturun tarak; nedi nom diga lok lekabus eburu minia at loxonaleng digaplavang tia.” Laxalibet i tong asuusu i do ne Moroa neni laradi mokmokso, la neni xa laradi rongtonga linga

Moroa i lok keretna, “Limixin tarak, mina ronga ia ana vaase. Nia anaba ruuna tevelinga rinemi, limxin tarak me Israel. Nia ne Moroa, la Moroa atnemi. Nia anoxo vaase sok nimi mumu levelaplavang atnemi la leventamtaba bok mi katos asonao amisix i ria. Axok pakes bok ti mo leven bulumaxao temes boro at laraugu bulumaxao atnemi kopla mo levenme boro at levenmenemen atnemi; 10 atla levempanga axap di ruuna lavanuet lengkangkedek di nemen at laxairing, atarak axap, eburu mi laxan bulumaxao at lasangaun larabin sangsangaun kobot (1000) kaana. 11 Lavapixa eburu mi levempanga axap di rooro ro xolonu, ni atarak kusuk.

12 Dola nia gita roxo, nia gitoxo sing nimi ri toxompanga anan, atla lavatbung menemen mi levempanga axap keneng teren, ni atarak kusuk. 13 Nia xopmen ana anan levenuut bulumaxao temes kopla ana inin levenda meme. 14 Loklok ti tong avukat, ni lagale laramtaba atnemi ria, ne Moroa; la mina raba nenia Lanaraavuk mi levempanga migara xaape vam i. 15 Naba lox avukat do mina ro ke rak mo do mina ekip tangarang mi levenmumuat, la anaba lox asepsu nemi, la minaba emi asu minia.” 16 Ketla ne Moroa i tong i ri limixin kakapmek keretna, “Kopmen tavasuun teren la nemi mi utus empampana axap lenavolo rak. La kopmen tavasuun teren la nemi mi vepaase mumu lekabus tarak, 17 atla mi ven abulubun kepe lavapaase sok tarak la mik sok sisixe bok leventaangas tarak. 18 Mi etangas mi luvuttadi xipkip pilo, la mi vemu eburu mi limixin longlongka.

19 Amisik mi vavara na paase xapmek; la soso mun mi tong asu levelinga xaxarang. 20 Amisik mi gagas tik lok li luvutneton nimi at levempapaase, la mira tere asu linga mumu bok di. 21 Miga lok na levempanga axap, ketla nia a goxo tong toxolinga, la miga doma i do nia a lok ngan nimi. Ketla nanga ana paase sok nimi la ana lox asuvos nemi at lavapaase.

22 Nemi mim taba sinta ia, mina ronga i na, naba lok kapmek do nia ana vaxat lalais nemi, la kopmen bok ba tara go naba lox asepsu nemi. 23 Loklok ti tong avukat, ni lagale laramtaba ip kip aurut laasen tarak, la nia anaba lox asepsu rinotno nedi di ronga res tarak.”

Copyright information for `MMX