Psalms 60

Lisingising Ti Loklok Asu

O Moroa, ugara sox sisixe xepe vam nama, la uga sev asubu vam nama; ugara musak kepe vam nama, ketla na manga una repukus bilong mu nama. Kuren la nanga ura lox angnengne vam na lenep silok la ugara lox arem kuang pam i; una i axatu mo levenmenemen teren atla i lok do na subu epeseves. Ura lok pam limixin taram kusu dina ekip tangarang mi laxanmumuat solo la laxaloklok asongot silok. Ma saaban ngan ta do ma inin laxangkadan lolos. Nu ugara vaase aronga vam nedi nom di lok ngangao ram, kusu dinaba sepsu basinge mo loklok asongot.

Una lox asepsu nama mi lolos taram; una siam at levesingising atnema, kusu mo limixin u kok nedi dinaba roo suu. To at loogu xaala ren Moroa ga tong i xeretna, “Nia anaba sak tup mi lavamunepen tarak la ana sak epeseves di basinge lenep kanga rak. Nia anabapdo epes nom lemenemen Sekem ti limixin tarak, la anapdo episa mo lasa ro Sukot. Nia a ruuna mo lenep Gileat, la Manase; la lenep Epraem bok ni lavatkiam tarak i tu pe ia at leesep. La lenep Juda ik lox asuusu lubung amgomgo ri limixin tarak. Ketla lenep Moab naba lok ngan lavattingtigon gosogos panga; nia anaba lu mi luxompanga vatpas tarak uto at lenep Edom, ngan loklok katling do nia a ruuna i. Limixin me Pilistia diga lok do dinaba sak tup minia, ketla digoxo epovo.”

O Moroa, nege bamgo ria ti lok tooro ia keneng at leesep eburu mi leme Edom? Nege ba lok tooro ia xusu ana sak tup midi ro at lemenemen silok atdi, mo diga bos kangkan i mi larangas uat. 10 Kereva, ura sok sisixe xepe rino vam nema? Kereva, ixo epovo bok ba xusu una vas su eburu bok ba mi limixin esep atnema? 11 Una lok tooro nema kusu mana sep lavamunepen, atla lolos at limixin noxo lok epovo tavanga. 12 Do ne Moroa na ru eburu minema, manaba sak tup mi lavamunepen, neni naba sev asubu di.

Copyright information for `MMX