Psalms 63

Lavavara Ti Ne Moroa

O Moroa, nenu ne Moroa rak. Labalak i ngaongao ru. Lorooro axap tarak i vavara ru, ngan laxangka i vat dexes, la i soso vavagam ngan lasa mes. Lorooro rak ik minu ru.

A vara i do anaba ven u ro at loogu xaala, a vara i do ana ven lolos la lisisixam taram. Labalamu lexen taram i lox avukat ti lorooro rak, kuren la anaba emi asu minu. Nia anaba tong loklok avukat tu at levenmaares nia ana rooro ren, la anaba xip aurut lukngak do ana sing u. Kerepmo nia anaba lok momo i ngan nia, a lok leluxa la a an mais; la anaba vixan leveng kompixan momo ri leemi asu ru.

Dola nia ak midi ro at loora rak, am doma su ram; at laxanimin axap nia am doma u, atla nenu uga lok tooro amisix ia, kuren la nia ak pixan mi lomomo ro maxopok at luvapa ram. Nia at kis pepeve ram la lakngam tino i kubak pe ia basinge lavamunepen tarak. Nedi mo dik lok tong pen i do dina sev amer ia, dinaba rava si axap uto xopok Katimun. 10 Dinaba met keneng at leesep, la lubungman sio dinaba anan levenbaaxin tadi atnedi.

11 Loorong naba momo mi ne Moroa atla ne Moroa naba raba i mi lolos kusu na sak tup mi lavamunepen teren. Nedi nom diga lok levengkakaape mi laasen at ne Moroa, dinaba emi asu min, ketla ne Moroa naba vamngus luvuttadi xaxarang.

Copyright information for `MMX