Psalms 65

Leemi Asu Mi Laramtaba Rotong Avukat

O Moroa, ik mokso xusu mana emi asu minu ro Saion, la mana doma xatling levengkakaape atnema ru, atla ung tonga res at levesing atnema. Limixin at levengkot axap dinaba vot pasa u, mumu leveloklok kakapmek atnedi. Loklok kakapmek atnema i sev asubu nema, ketla nenu u doxoma xepe i. Nedi nom una soxolik ka di, dina momo; u lok kaka nedi xusu dina nemen to at loogu xaala ram. Manabat kis mimila at levempanga nunuan keneng at loogu ram eburu mi leveloklok anarong at loogu laplavang taram i xaala. Mo naba lok epovo lavavara atnema.

Ung tonga res atnama mo do um taba nema mi lolos ti sak tup mi limixin munepen minema. La uk lok bok levempanga nunuan ti lox asepsu nema. Limixin at levengkot axap at na lavatbung menemen la at levenep tas paxalom bok di nuunu saga ram. Uga vaxaxis lempattavut mi lolos taram, la kerepmo uga lox asuusu lolos silok taram. Uk lox amila leretepit at laras la lulung at levempo paxanao, la uk lox axap bok levenekarakat at limixin. Limixin at lavatbung menemen axap ding sangu aleng mumu levempanga ugak lox i. Leven gugu ram i lox asu luxupkup momo boro at lara lenep kavaxap at lavatbung menemen uto at lara lenep.

Nenu uk lox asuusu loklok tatao ram ti laxangka, uk lox asi larabet tik lox ababaum laxangka kusu larauna na pisik avukat. Nenu uk suxa aumsu laradan sen mi levengkadan la um taba lavatbung menemen mi levempanga anan. Uk lox i xeretna; 10 up sep bet avukat ti leventaamang, la uk lox amlu laxangka mi levendan bet; u lox amumulum laxangka mi limisimisi bet la i lox asuusu larauna maxat. 11 Loklok taram i nunuan kuren la um taba aleng levempanga anan mukun avukat. At levengkot axap ut pas teren, i umsu mi laxampanga anan. 12 Ap mo levengkot laxampanga mi lavanuet kangkedek, di umsu ro at levengkot anan atdi, la limixin di nemen at laxasigege kaana di umsu mi lososoro. 13 Levengkot loklok tatao levempanga mi lavanuet kangkedek i umsu mi laxasipsip; to at lara sa i umsu mi laxam piao. Levempanga axap i nunuan aleng la limixin dip kup la dik pixan momo.

Copyright information for `MMX