Psalms 66

Loxompixan Emi Asu Mi Lorotong Avukat

Nemi axap limixin, mina emi asu mi ne Moroa mi luxupkup momo! Minak pixan ti lox aurut laasen teren la mina tong asu leemi asu i nunuan aleng tin! Mina tong i ri ne Moroa xeretna, “Levempanga uk lox i, i nunuan aleng! Lolos taram i silok aleng, kuren la limixin munepen minu di xis tintiding to melamgo ram mi lanmarat. Limixin axap at lavatbung menemen di lotu saparav u; dik pixan emi asu saparav u, dik pixan emi asu ri laasen taram.”

Ude nimi, la mina ven levempanga ne Moroa gak lox i; ni gak lok leveloklok sangsangu ren kantubu at limixin. Ni ga lox arepukus laras i ngan ta laxangka mesemes; lavalabat atnedik diga vas korop lavatdan sen silok mi lengkangkedek mene. Ap mo loxot maga lok momo mi mo lavanga ni ga lox i. Lixitkis amgomgo ren naba nemen amisik mi lolos teren, la ni i reven tatao levenep silok. La nemen uta ke xepe limixin tongtonga xepe dina lox asilok di mavana ren.

Limixin at levennep silok axap, mina emi asu mi ne Moroa atnedik, la limixin dinang tonga leemi asu atnemi. Neni ga lok tatao lorooro atdik basinge laniu, la ni xopmen goxo ke limixin munepen midik gita sak tup midik. 10 O Moroa, uga lok li nema at loklok tongpen; i ngan lisiliva laxao i an adatdar i; kerepmo ura lok tong pen pam nema. 11 Uga ke nema la maga subu tup at lemet diga sep li rangais nama min la uga lok li levenaknixip mumuat pana at levenantuno nama. 12 Uga ke xepe limixin munepen minema diga vas asi nama; magat pas keneng at laxao mi ladanut. Ketla nanga ura lok kaka nema uto at loxot loklox alipe ram.

13 Nia anaba lok kaka levelaplavang ti kotos uto at loogu ram; anabam taba u mi levempanga nia aga xaape min tu. 14 Nia anaba raba u mi levempanga nia aga tong i do anaba raba u min, at levenaleng nia aga nemen keneng at lumumuat. 15 Anabam taba ru mi levesipsip, kusu ri xotos i ro at loxonin; anabaplavang mi levenbulumaxao remes la levenme, la losobu ren naba urut uto vana at lamavangkap.

16 Nemi mi lok ngangao at ne Moroa, ude nimi, la mina ronga i na, la nia ana tong asu axap nom levempanga ni gak lox i ria. 17 Agang teng tin ti loklok tooro; nia agak pixan emi asu min. 18 Dola lorooro rak gi umsu mi laxakapmek, Leeme Silok gixo ronga rak. 19 Ketla i ruturun tinotno do ne Moroa ira ronga vam ia; ira ronga res pam at lisingising tarak. 20 Nia a emi asu mi ne Moroa, atla ni xopmen nak sox sisixe lisingising tarak, kopla ni na rebeng alis labalamu lexen teren tia.

Copyright information for `MMX