Psalms 68

Loxompixan Ti Lox Asilok Laasen At Ne Moroa

Moroa i katu kaxat la ik sax epeseves limixin munepen min. Nedi dik lox angtungun tin, dik sixiro atla ik sak tup midi. I lok ngan lamanman it mas kepe lusuxa, la i xala xepe di; i lok ngan levelumlut misiu i sonao at liplivi kao. Kerepmo la limixin kapmek di seeve ro melamgo at ne Moroa. Ketla limixin mokmokso dik lek la di momo at lemeren ne Moroa; dik lok momo la dip kup mi lososoro.

Minak pixan ti ne Moroa, minak pixan emi asu mi laasen teren; mina gagas li langas tin mo it kis pana at loxontakabu. Laasen teren ne Leeme Silok. Mina lok momo ro melamgo ren! Moroa i nemen to xeneng at loogu laplavang teren i xaala; ni i kok lubungkurun la ik lok tatao lubung naa rixin, lavatlok atdi diga met pam. Ni im taba lavanat mangan mi limixin kusu dina nemen eburu min, la i sasar asepmus asu nedi limixin di nemen at loxokoxo xusu dina momo; ketla nedi dixo etu ebelen min, dinaba nemen at lenep kangka i vat dexes.

O Moroa, at levenaleng ugam gomgo ri limixin taram, la migat pas korop lamatbin, lavatbung menemen axap gangnengne, la lamavangkap ga sobang asu lebet, mumu lovotpot at ne Moroa boro at lakaana Sinai, lovotpot at ne Moroa me Israel. Nenu uga lox asu larabet nunuan ti lox amonok amu laxangka i vat dexes. 10 Limixin taram diga lok lemenemen atnedi go, la keneng at luvukat taram uga lox epovo lavakpakes at limixin banbalo.

11 Leeme Silok ga raba asu levelinga, la buaang lavakin diga etong aonon na levelinga xeretna, 12 “Lavaorong mi limixin esep atnedi dira sixiro!” Lavakin to xolonu diga episa levempanga, limixin esep diga esep kaka i. 13 Mo levempanga ga ngan ta levempoovo amno, diga moi di mi lisiliva, lempapa atdi gam games aleng mi leven gol avukat. (Tila leventaba atnemi diga lipe ro xeneng at loroboro at lubungsipsip at laaleng esep?) 14 Ap mo laaleng, Lanaraavuk ne Moroa ga sax epeseves lavaorong to at lavattaavut Salmon, ni ga lox asi lusugao mumudut (snow) ri subu ap mo loxot.

15 Nu lavattavut Basan u silok aleng tino, nu lavattaavut mi laxampatlak solo ram! 16 Nu lavattaavut mi laxampatlak solo, tila uk milik angtungun lavattaavut ne Moroa ga lok katling i do rin ti nemen, la u doma i do ni lavanga gamasa? Leeme Silok naba nemen amisik ap mo lavattaavut. 17 Leeme Silok ga rupot boro Sinai eburu mi laxanabin sangsangaun kobot laxang karis esep lolos teren, la ni ga vubeles at loxot kaala ren. 18 Ni ga lam kaka buaang limixin kokoxo la ga urut eburu midi uto vana at lakaana Saion. Ni ga ruuna ka leventamtaba atdi mo limixin tongtonga xepe diga esev eburu min. Leeme silok ne Moroa naba nemen go.

19 Leemi asu ri Leeme Silok, neni ip kip levenmumuat atnedik at levenaleng getgesara. Neni ne Moroa ik lox asepsu dik. 20 Moroa atnedik ni ne Moroa ik lox asepsu limixin; ni Leeme Silok, Leeme Silok atnedik la ni ik lox asepsu dik basinge lanmet.

21 Moroa naba rit povorok tuturun tinotno levempatlak at limixin munepen min; lempatlak atnedi di xopara na xap at leveloklok i bilinga. 22 Leeme Silok ga tong i xeretna, “Nia anaba lok kaka amlong limixin munepen minemi boro at lengkot axap; keke i do di nemen to at lempat kaana Basan kopla to xa maxopok at lisimaramain, nia anaba lok kaka amlong nedi, 23 kusu minabat pas keneng at lada atnedi la lubungman atnemi dinaba dem ka solo laxanda ri lox axap lavavara atdi.

24 O Moroa, limixin axap di reven u, ut pas to melamgo at limixin taram melemu at loxonaleng u sak tup mi limixin munepen taram ap mo leesep. O Moroa, nenu Loorong Silok ut pas beles uto xeneng at loogu xaala ram. 25 Nedi dik pixan, dit pas to melamgo; nedi dik sak gita, dit pas to melemu; la laxaalik dit pas to xantubu, dik sak leven tambarin. 26 Ata emi asu mi ne Moroa ro xeneng at lovotpot buru at limixin teren; nemi livipisik li at ne Jakop, mina emi asu mi Leeme Silok! 27 Loxon abungmixin at ne Benjamin dimgomgo, nedi di xakalik ti levenabung mixin axap; melemu ren lubung amgomgo at leme Juda eburu mi loxon binam tadi atnedi, la lubung amgomgo me Sebulon la Napitali di mumupit to melemu.

28 O Moroa, una lox asuusu lolos taram, nom lolos uga ru min tinema, 29 una lox asuusu lolos taram boro xa at loogu laplavang taram to Jerusalem, ap mo loxot lavaorong silok dim taba u mi leventamtaba ve. 30 Una vaase sok leme Isip; nedi di lok ngan lavatpanga sio mi lavanuet kangkedek i nemen to at lisigege dan; una vaase sok limixin at levenep silok di lok ngan laxanbulumaxao remes mi laxannat bulumaxao, se dinaba xis tiktikbu ro malmgo ram la dina lok letaba ru mi levesiliva. Una sak epeseves mo limixin di vavara esep amisik! 31 Luvuttadi rutu katling dinaba vot boro Isip; leme Itiopia dinaba xip aurut tikngen mi levesingising atnedi ri ne Moroa. 32 Nemi leventaba boro at levenep silok petpes at lavatbung menemen, mina vixan mi leemi asu saparap ne Moroa. Mina vixan emi asu saparap Leeme Silok,

33 mo it pas tangtagap de vana at lamavangkap, mo lamavangkap me ganoxa at lereot. Mina ronga levelinga ren i lulung silok boro vana at laxalibet. 34 Tong asu lolos at ne Moroa i silok aleng, la im gomgonga mavana leme Israel. I lox asuusu lolos teren tovana at lamavangkap. 35 Moroa me Israel i vas su boro xeneng at loogu xaala ren, la limixin dinaba lingun teren! Neni im taba lolos ti limixin teren. Leemi asu ri ne Moroa!

Copyright information for `MMX