Psalms 69

Lerengteng Ti Loklok Tooro

O Moroa, una lox asepsu ia! Ladan na ira urut pam ti laxaka rak. Nia na ara dong tup silatla nga at lapke, la kopmen toxongkangka lolos ti tu ren; nia nga na xeneng at ladan i si aleng, la larapaxanao i lok do nak mir axong ia. Laxaka rak ira xo axap mi luxupkup ti loklok tooro, luxukung tarak ira songot. Luxatli rak ira ung mi lerengteng, nia a ngangais ti loklok tooro ram. Nedi nom dik lox angtungun gamasa ria, di umsu aleng tino polo leexes at levengkabinim at lavatlak tarak. Limixin munepen minia di xaxarang taba ia; di lolos aleng la di lok do dina sev amer ia. Di xaxarang taba ia do aga xip pilo xaka lempanga nia agoxo xip pilo xaka i; la di tong i ria do ana raba amlong i. O Moroa, libilinga rak kopmen na nemen alipe ram, nu uklen larangtangku rak.

O Leeme Silok, nenu Loorong Avolo la Lanaraavuk. Nemen gat uta ke xepe limixin nuunu ram dina mangan mu loklok tarak. Moroa me Israel, nemen gat uta ke mo loklok tarak na sox asu lainmangan tinedi di lotu ruturun saparav u. Limixin munepen minia di paase aksaksa ria mumu mun u la ara umsu mi lainmangan. Luvutnetak di reven ia ngan laradi votpot mun, la a lok ngan laradi me xadiong keneng at lixitkis koetemen atnema. Lodoxoma rak i tu at loogu laplavang taram; i anan tos keneng tarak ngan ta laxao; levempapaase aksaksa dik lox i ru, im subu mavana rak. 10 Ak lox asi mun ia la aran mun an, la limixin dirak lox aksaksa ria. 11 Ang sigaara mi levesingsigaara rik saxaanu, la ding longon tarak. 12 Di paase mumu ia ro xeneng at larangas silok, la limixin inin tangtangku di voovo lengkompixan mumu ia.

13 Ketla nenia, Leeme Silok, anaba ngising parav u; Moroa, unaba ronga ia at loxonaleng axa nenu una soxolik ka i. Una vaase porang ia atla labalamu lexen taram i silok aleng la unaba lox epovo laxakaape ram tik lox asepsu limixin taram. 14 Una lox asepsu ia kusu anoxo dong si rino ukopok at lapke; una kubak pe ia basinge lavamunepen tarak, la una lox asepsu ia basinge lisimaramain. 15 Uguta ke xepe gat ladanut na vaxat ka ia; uguta ke xepe ia la ana xong to xeneng at lisimaramain, kopla ana dong tup to xeneng at lamaut. 16 Leeme Silok, una ronga res tarak mi luvukat at labalamu lexen taram; una repukus mu ia mi lebelemulus silok taram! 17 Uguta lipe axa u basinge ia lasaxaruki ram; nia na ak lok at langsangan lumumuat, la una ronga res tarak! 18 Una vot parav ia la una lox asepsu ia; una lox asepmus ia basinge lavamunepen tarak.

19 Uklen i do di paase aksaksa ria, la dixok lok ngangao rak la dirak lox abaava ia; u ven axap di na lavamunepen tarak. 20 Levempapaase aksaksa atnedi ira ba koxorop pam leveeve rak; lavarampen abulubun ta ia na. Aga vara tara xusu ri loklok amenemen ia, ketla goxopmen tara go ga lox amenemen ia. 21 At loxonaleng aga roxo, diga raba ia mi lasak; at loxonaleng aga minu, diga raba ia mi laxadan mamao.

22 Keke levenanan atdi nabak paxaru kaxat lasaxaek; la keke levempeluxa kaala atnedi naba lox ekarakat di kusu dina subu tup at leeteke. 23 Una sep di mi lemeramain! Unak lox amolos amisik lempat sintun atdi! 24 Una soobang asu lebelemamao ram mavana atnedi; keke lebelemamao mokmokso ram na sak pava di. 25 Keke lara menemen atnedi nak midi kixinak tino; la teta noxo roo su go xeneng at laraugu kadis atdi. 26 Di lox asongot nedi no nenu uga lox aleeng nedi; la di paase mumu nedi no nenu uga sev abi nedi. 27 Una malagan li xatling leveloklok kakapmek axap atnedi la uguta ke avolo di xusu dina ruuna xaka toxot at loklok arooro ram. 28 Una lok pes levenasen atnedi ro at lubuk at lorooro; uguta malagan li gat levenasen atdi eburu mi levenasen at limixin taram.

29 Ketla nia lampen abulubun, ak lok keneng at losongsongot. O Moroa, una lox aurut ia la una lox asepsu ia basinge na levenmumuat!

30 Anaba emi asu mi ne Moroa mi loxompixan; anaba paase asu laasen silok teren at loxonaleng ana tong avukat tin.

31 Neni na, naba lox amomo rinotno Leeme Silok la naba volo mo loklok tim taba mi levenbulumaxao, la naba volo bok laplavang tin mi lavat bulumaxao temes. 32 At loxonaleng limixin baava dina ven i na, dinabak lek aleng; la nedi di ngising parap ne Moroa, dinaba epang aru kantubu atnedi xa. 33 Leeme Silok ing tonga res atnedi dik pakes la ixom domampe limixin teren dik lok at loxokoxo.

34 O laxalibet mi lavatbung menemen, mina emi asu mi ne Moroa, la laras bok mi lempanga xeneng teren, mina emi asu min. 35 Neni naba lox asepsu leme Jerusalem basinge lavamunepen atdi la na vaxaru amlong levenmenemen silok at lenep Juda. Limixin teren dinaba ruuna ka mo lenep kangka la dinaba nemen amisik go. 36 Livipisik li at limixin axa ren dinaba vesoxun mun teren, la nedi ua di balamu i, dinaba nemen amisik go.

Copyright information for `MMX