Psalms 71

Lisingising At Laradi Amgomgo

Leeme Silok, a vot parav u mi lisingsing kusu una lox aratao ia basinge lavamunepen tarak; uguta ke xepe di, dina sak tup minia! Nenu laradi mokmokso, kuren la una lok tooro ia la una lox asu ia at na lumumuat. Una ronga ia la una lox asepsu ia basinge di! Una lok ngan lomoo vungpung tia, la loogu lolos la matmatkun ti lok tatao ia. Nenu loroboro rak la nenia ak lok alipe ro xeneng taram. Lomoroa rak, una lox asepsu ia basinge limixin kapmek, la basinge lolos at limixin kapmek dik lok metarauat.

Leeme Silok. Nenu Loorong Avolo. Una ronga res tarak atla a doma sogo nga na ram. Ga ruka i at laau rak, agara nuunu saga vam taram. Agara sep sogo vam taram at mo axap laxanmaares nia aga rooro ren; la tuka i at laaleng ne naga ga visix ia, uga kok avukar ia. Anaba emi asu amisik minu. Lorooro rak ga lok ngan lampoovo avukat ti buaang nedi limixin diga mu asu i, atla nenu uga lok ngan loroboro lolos ga tu xangkan ia. Kuren la a emi asu amisik minu at levenaleng axap, la a paase asu lununuan taram. Uguta ven abulubun kepe ia at na loxonaleng nenia a sioxo nga; la uguta doxoma xepe ia mumu i do ara ventaae nga. 10 Lavamunepen tarak di vara i do dina sev amer ia; di vepaase nemnem levendoxoma ri levempanga diba lox i ria. 11 Di paase xeretna do, “Moroa ira doxoma xepe vam i; ata mu arup ta i la ata lox epovo lodoxoma atnedik; kopmen bok ba teta go xusu naba lok tooro i.” 12 O Moroa. Uguta nemen paxalom basinge ia. Lomoroa rak, una lok kepe soso na lumumuat tarak! 13 Una sak tup midi, la una sele utut nedi ua di lok do dina sev ia. La keke nedi di lok do dina lox asongor ia, dina mangan la dina baava.

14 Anabam doma saga amisik taram. Anaba emi asu amisik minu la leemi asu rak tu naba nemen epasum. 15 Anaba tonga asu luvukat taram. La at levenaleng axap, anaba paase mumu loklox arooro ram, la keke i do axoklen ausuv i. 16 Anabat pas keneng at lolos at Leeme Silok ne Moroa. Anaba paase asu kusuk mun mo luvukat taram to at lemeren limixin axap. 17 Ugarak lox ase vam ia, tuka axa i at levenmaares nia aga aau ren, la nia move a paase mumu leveloklok maraanu ram. 18 Ana nga ara sioxo la levengkabinim at lavatlak tarak irak sokso. O Moroa, uguta doxoma xepe ia. Una su aru ia at levenaleng ana paase asu lolos silok taram tinedi lavaola axap mo dibap tavasu.

19 O Moroa. Lempanga axap at na lavatbung menemen kopok la lempanga axap toxun pana at laxalibet, ik lox asuusu loklok taram in manton tino. Ugara lok pam levempanga silok; kuren la kopmen teta go na lok ngan u. 20 Ugara li vam levenekarakat mi levesongsongot mavana rak, ketla unaba suxa kun ia mi lolos taram; unaba lox asepsu ia basinge lamaut. 21 Unaba lox asilox ia polo mo levenmaares avot tarak; unaba lox amamana bok ba lodoxoma rak.

22 Anaba emi asu ruturun minu mi loxontaaleng; Moroa rak, anaba emi asu mi luruturun taram. Anabap sep levengkom pixan tu ro at loxontaaleng tarak. Nenu Leeme Melemelengan me Israel. 23 Anabap kup mi lososoro ru at loxonaleng anak sak loxontaaleng; anabak pixan mi lorooro axap tarak, atla ugara lox asepsu vam ia. 24 At levenaleng axap anaba paase asu loklok manmanton taram, atla ugara sev asi vam nedi ua diga vara i do dina lok kapmex ia; uga sak tup midi la nanga dira baava.

Copyright information for `MMX