Psalms 76

Moroa Laradi Vatpas Asi

Limixin to Juda dikleklen ne Moroa; la dik lok ngangao aleng at laasen teren to Israel. I ruuna langkolonu ro Jerusalem; la neni i nemen to at loxongkaana Saion. Neni ga sak pirivit levesoosoo at laradi munepen teren ap mo loxot, la ga sak pirivit bok larapenban mi lemparise esep, lempanga esep axap bok. Na levelinga i ruturun tinotno.

O Moroa, u sisixam aleng. Laasen silok, neni ataram kusuk mun, at loxonaleng ugamlong boro vana at levengkaana, ap mo loxot ua uga sev asi lavamunepen taram. Mo limixin esep lolos, limixin taram diga sak paxat ka axap lempanga atdi, la monga dira vunga ngan luvuttadi met; levelolos atnedi mi lakleklen atdi ri vesep ga ravasu ngan lempanga gamasa. O Moroa at ne Jakop, at loxonaleng uga paase lolos tinedi, lempaaros eburu mi luvuttadi ro vana ren digam subu ri lanmet. Ketla nenu Leeme Silok, limixin axap dik marat taram. Teta ixo epovo xusu na ru tangarang u at loxonaleng u belemamao. To vana at laxalibet uga tong axasep limixin axap mi levelinga loklox akmokso ram; la limixin at lavatbung menemen diga marat, kuren la mo digat kis sixim mun; atla uga ru kaxat kusu ri vaase asu lempapaase ramtaba ina ram, la kusu ri lox aroo limixin baava de at lavatbung menemen. 10 Lebelemamao at limixin at lavatbung menemen ik lox asuusu mun leemi asu silok tu. Nedi di roo su at levenesep, dik lok katling amisik levenaleng silok taram.

11 Nemi mina raba Leeme Silok, neni ne Moroa atnemi mi levempanga no migapliplis i min; nemi levenabung mixin petpes mik lok auret leme Israel, minaba taba i mi leventamtaba atnemi. Moroa ik lok limixin axap kusu dinak marat teren. 12 Neni ik lox asi laxamdak at lavaorong silok dit las di, la lebelemamao ren ik lox amarat aleng tinotno lavaorong.

Copyright information for `MMX