Psalms 77

Loklox Amamana Xeneng At Levenaleng Songsongot

Ang teng silok ti ne Moroa; ang teng silok kusu neni nang tonga ia. Angising ti Leeme Silok keneng at levenaleng at levenmumuat; la at levenaleng kanimin axap, angosong aurut mi lukngak keneng at levesingising tarak, ketla lodoxoma rak kopmen nat kis bus.

At lengkonaleng amdoma mumu ne Moroa, lamamas tarak ixot lottu saga la arat mas gaaga. La mo do anam doma mumu levelinga ren, arak lox abulubun bok tarak. Neni ik lox ia ara tuang aan at lengkanimin. Ak lok bukbulu aleng, kuren la axo epovo ri vaase tekolinga. Am doma levenaleng ira vovolo vam la aram doma su bok at levenmaares me gano axa. At laaleng kanimin axap, a pubeles at levendoxoma lolos aleng; am doma mumu u ne Moroa, la ara susue bok axa ia xeretna;

“Kereva, Leeme Silok naba lox abulubun kepe amisik ta nema? Kopla neni noxo momo bok ba minema? Kereva, labalamu ren tinema ira xap ta kopla ira los polo vam laxakaape ren? Kereva, Moroa ira domampe vam i xusu neni na belemumu limixin teren? Kopla lebelemamao ren na ira soxun asu vam lebelemumu ren?”

10 Melemu aga vaase xeretna, “Lara lavanga i lox abulu ia xeretna, neni na ne Moroa ixo lok tatao bok ba nedik.” 11 Ketla nenia anabam doma amisik leven gugu silok taram ugak lox i, Leeme Silok. Anabam doma su la ana paase asu levempanga avukat no nenu ugarak lok pam i ga migomgo. 12 Anabam doma mumu mo levempanga axap nenu ugarak lok pam i. Anaba paase eburu minu mumu na levempanga lolos nenu uga lox i.

13 O Moroa, leven gugu axap nenu uk lox i, ik mokso aleng tinotno. Kopmen bok ba temoroa go i silok ngan u. 14 Nenu vam nom ne Moroa uk lok lempanga sangsangu; la ugak lox asuusu lolos silok taram keneng at laranep silok axap. 15 La mumu mun mo lolos taram, uga lox epovo i xusu una lox asepmus limixin taram, nedi livipisik li at ne Jakop la at ne Josep.

16 At loxonaleng laradan mi laras diga reven u, ne Moroa, digak marat; la lisimaramain at laras ga dede. 17 Lempat main bet ga soobang asu larakabu; la leretepaavat boro vana at laxalibet, la lavanga ga mam su boro at lara meramanman axap. 18 Lerete paavat at lengkon takabu ram ga teposok su, la lososo at lavanga ga mam ga soso axasep lavatbung menemen; la lavatbung menemen ga dede la gangne. 19 Ugat pas kantubu at loxontas; la uga xoxorop loxontas main, ketla maxo epovo ri ven kaka lenain at luxangkedek taram. 20 Ugam lam limixin taram ga ngan laradi loklok tatao sipsip, la uga lok li ne Moses mi ne Aron kusu dunam gomgonga limixin taram.

Copyright information for `MMX