Psalms 80

Lisingising Ti Vaxaru Amlong Lenep Silok Israel

O laradi loklok tatao sipsip me Israel; una ronga atnema lubung amgomgo at limixin taram. Ut kis at loxot kitkis orong taram ik lok mavana at lempanga raptava; una ru asuvos ti levenabung mixin taram me Epraem, Benjamin, la Manase. Una lox ase nema mi lolos taram; la ude u la una lox asepsu nema!

O Moroa, una siam ka amlong nema! Una lox asuusu lebelemumu ram tinema, kusu manaba roo su.

Leeme Silok, nu Lanaraavuk ne Moroa. Naba se ba ua mo lebelemamao ram ti levesingising at limixin taram? Ugara raba vam nema mi levenanbulu ua ga lok an mais nema ngan lempanga anan, la magara inin pam lempatbuxom kamkabili dan at lengkatli atnema. Uga lox avolo limixin at laranep silok dik lok kangkan nema xusu dina vesep kaka mo laxangka atnama; la monga lavamunepen atnema di paase vupu rinema.

Lanaraavuk ne Moroa, una lok ka amlong nema basinge na lumumuat. Una lox ase nema mi lebelemumu ram, kusu manaba roo suu. Uga xip ka nema limixin taram boro Isip ngan labanoos vaen; la uga saksu mi limixin at laranep silok petpes la ugatlo mo labanoos vaen to at lenep kangka atnedi. Uga lox axasep lenep tin kusu rin ti suusu; la levenixe ren ga si rinotno uto xopok tubu, la levenoos teren gat las to mavana ap mo lenep kangka axap. 10 Ni gang pung kimit lengkongkaana mi lamamau ren la levengkakan teren ga engeng urut at lemparuna keda(Cedar) la ga kua abuxumin axav i. 11 Ni ga lox asu levengkakan teren uto saparap laras Mediterenian la uto bok at ladan sen Euparates.

12 Tila ba la uga ut asi loroboro no gak lok kangkan i? La mo nga limixin dit pas polo go, i epovo mene dinam nem kaka lempeven teren; 13 la laxanbo sio dirat pas axangka i, la laxampanga vetpes bok mi lavanuet kangkedek atdi, dira vanan levempeven teren. 14 Lanaraavuk ne Moroa, una repukus tinema! Una ven asi boroxun pana at laxalibet tinema; ude u la una lox asepsu limixin taram! 15 Ude u la una lox asepsu na labanoos vaen no nenu ugatlo li i; na labanoos vaen tamaxat ba mo, nu uga lox asuusu dangdangun la alolos box i.

16 Lavamunepen atnema digara ra koxorop asi vam i la digara song arup laxao ren; una sep di mi lebelemamao ram la una sev amet asonao rino di! 17 Una xok avukat nema limixin no nenu uga soxolik ka vam nama; nema lubung mixin ua nenu uga lox alolos nema. 18 Ma noxo repukus basinge bok ba u; una kox arooro nema, kusu manaba vemi asu minu. 19 Leeme Silok, Lanaraavuk ne Moroa. Una siam ka amlong nema, una lox asuusu lebelemumu ram tinema, kusu manaba roo su.

Copyright information for `MMX