Psalms 81

Loxompixan Ti Lok Katling Laaleng Silok

Nemi minap kup mi leklek ti ne Moroa, neni lentupe atnedik; minak pixan mi leemi asu ri ne Moroa at ne Jakop! Mina vaxaru kaxat laxaka at livixan la minak sak leventabarin; minak sak lengkaka pixan avukat to at lempat taaleng mi lempat gita.

Minat mas lempat tu ap mo levenaleng silok, at laaleng at lagaaling maxat la at laaleng at lagaaling i re kobot. Neni na lere avolo at leme Israel, la neni langas ne Moroa at ne Jakop ga tong taba di min. Neni ga raba i ri limixin me Israel at loxonaleng neni ga lox asongot limixin at lenep kangka me Isip.

Nenia aga ronga laxaka at laradi ua nia a goxo ronga xibis i, ga lok keretna,
“Aga lok kepe levenmumuat boro at levenantuno atnemi; aga lok nemi xusu miba soxope asi lempat aknixip uat (birikis). At levenaleng migak lok keneng at levenmumuat to Isip, miga toro ria, la nia aga lox asepsu nemi. Aga lox epovo leventotoro atnemi at loxonaleng agak lok to xeneng at loxot alipe rak no xeneng at lamanman takabu. Aga lok tong pen nemi ro at levem puuvut dan to Meriba.

Limixin tarak, mina ronga i na levempapaase aronga rak; Leme Israel, a vara rinotno i xusu minang tonga res tarak! Nemen tinotno nemi guta lotu saparap teven moroa vetpes. 10 Nenia mun Leeme Silok ne Moroa atnemi, la nenia mun aga lam asu nemi boro Isip. Mina vangangba, la anaba raba luxa nemi.”

11 Ketla limixin tarak me Israel di goxo ronga ia, gita goxo ronga res tarak. 12 Kuren la aga ke aie di mila lodoxoma atdi ga vatken mi lorongtonga rubu linga; la diga mumu asu lavavara atnedi keneng at leveloklok diga vavara i. 13 Nia aga vavara rinotno i xusu limixin tarak dinang tonga ia; la a vara rinotno i xusu dinang tonga res tarak! 14 Mo do kuren, nia gitaba sak tup soso mun mi lavamunepen atnedi la gira vas asi nedi diga tu tangarang di. 15 Nedi ua digang long angtungun tia, dinabak milik tiding mi lanmarat to melamgo rak; la mo loklox asongot tinedi naba nemen amisik noxo xap. 16 Ketla anbak lox anan nemi mi levempiao i so misigisigis la anbak lox axap lavavara atnimi mi levendan misiu boro xanubuan.”

Copyright information for `MMX