Psalms 86

Lisingising Ti Loklok Tooro

Leeme Silok, una ronga ia; una sep siam mu ia, atla ara molos axap la axo epovo ri lok tooro axa ia. Una lox asepsu ia basinge lanmet, atla nia a ruturun amisik tu; una lox aroo ia, atla nia lasaxaruki ram la a nuunu saga ram. Nenu ne Moroa rak, kuren la una belemumu ia; at levenaleng axap, a ngising tu. O Leeme Silok, una lox aklek ia, lasaxaruki ram, mila levesingising tarak i ruturun amisik tu.

Uk lok luvukat tinema la um doxoma xepe laxapmek atnema, la u umsu mi labalamu lexen tinedi axap no di ngising parav u. Leeme Silok, una ronga i na levesingising tarak; una ronga na lerengteng tarak ti loklok tooro. A toro ru xeneng at levenaleng at levenmumuat, atla up sep siam at levesingising tarak.

O Leeme Silok, kopmen bok ba temoroa go i lok ngan u, la xopmen tino teta go ga lok tavanga silok ngan mo lempanga nenu ga lox i. Mo laranep silok ua nenu uga rudum li di, dinaba xis tintiding to melamgo ram; la dinaba emi asu mi laasen taram. 10 Nenu Lanaraavuk la uk lok lempanga maraanu; nenu xusuk mun ne Moroa.

11 Leeme Silok, una anasa ia mi lempanga u vara i xusu ana lox i, la anaba ronga res amisik taram; una anasa ia xusu anaba gugu taba u mi lorooro axap tarak. 12 O Leeme Silok ne Moroa rak, anaba emi asu minu mi lavatpeeve axap tarak. Anaba vavang asu lununuan taram at levenaleng amisik la noxo xap. 13 Labalamu lexen taram tia i silok aleng! Ugara lox asepsu vam ia basinge lamaut.

14 O Moroa, limixin loklok papavas nga mo dit pas tangarang ia; la libinam tadi longlong kuxurung mo di lok do dina sev amer ia, nedi limixin ua dixok mulus ka levelinga ram. 15 Ketla nenu ne Moroa la Leeme Silok tarak, u ruuna lebelemumu la labalamu lexen, uk lox atnaasan, uk belen tuntun, la u ruturun amisik ti limixin taram. 16 Una repukus mu ia la una belemumu ia; lox alolos ia la una lox aroo ia, atla nia a gugu taba u ngan lasaxaruki rinotno ram. 17 Leeme Silok, una lox asuusu mo luvukat taram tia, kusu nedi ua dingolong angtungun tia, dinaba mangan at loxonaleng dina ven i do ura lox aratao xaka ia la ura lok tooro ia.

Copyright information for `MMX