Psalms 89

Loxompixan Keneng At Levenaleng Mumuat

O Leeme Silok, anabak pixan amisik mumu mo labalamu lexen taram; anaba paase asu i do nenu uk lox epovo amisik levelinga ram. Aklen i do labalamu la loklok tatao ram naba nemen amisik, la noxo xap ngan laxalibet.

Uga vaase xeretna, “Agara lok pam lekabus mi mo laradi nia aga soxolik kaka i; agara xaape vam ti lasaxaruki rak ne Devit, keretna, “Lavaorong nabap tavasu amisik keneng at livipisik li ram la mo lugugu ti lavaorong nabak lok at livipisik li ram amisik la noxo xap basinge nedi.”

Leeme Silok. Lempixan ip tavasu boro vana laxalibet mumu mo lempanga maraanu uk lox i. Luvuttadi xaala dik pixan do u ruturun amisik ti limixin taram. Leeme Silok, kopmen teta roxun pana at laxalibet i lok ngan u; kopmen teta at lempanga rooro no vana at laxalibet i epovo eburu minu. Keneng at lixitkis buru at limixin kaala, dik marat taram; la nedi axap di tu eburu mi loklok ngangao silok aleng tu. Leeme Silok ne Moroa nu Lanaraavuk, kopmen teta go, lolos teren i volo aleng ngan u. O Leeme Silok, nenu u ruturun at lempanga axap.

Um gomgo nga mavana ap mo laras lolos; la uk lox amila lolos lempat popaxanao. 10 Uga rit amdamda mo lavatpanga sio ne Raap la uga sev amer i; la uga sak tup mi lavamunepen taram mi mo lolos silok taram. 11 Laxalibet neni ataram, la lavatbung menemen bok; uga rudum lavatbung menemen la lempanga axap bok di nemen keneng teren. 12 Uga rudum li lunep borou la boroxun. Lakaana Tabor mi lakaana Eremon dik pixan mi lomomo ru. 13 U lolos pologat! Lolos taram i silok la i volo aleng!

14 Lininto ram it kis mavana at levelinga mokmokso mi lodoxoma avukat; labalamu eburu mi luruturun dip tavasu asaxaven keneng at lempanga nenu uk lox i. 15 Luvukat mo ik lok tinedi di lotu saparav u mi levempixan, la dik lok maxopok at lebelen tuntun taram! 16 La di momo amisik at levenaleng axap mumu mun u, la di vemi asu minu mumu luvukat taram. 17 Uga lok nema la maga sak tup mi lavamunepen atnema; uga lok nema xusu mana sak tup midi atla, mumu mun labalamu ram. 18 O Leeme Silok, nenu xa uga soxolik ka lurut see pe rinema; nenu xa ne Moroa melemelengan me Israel, uga raba nema mi loorong.

Laxakaape At Ne Moroa Ri Ne Devit

19 Keneng at lara lisilimet gano, uga paase ri lavaeme vapaase ali ram ua diga umsu mi luruturun at lamaram, uga lok keretna, “Ara raba vam loklok tooro ri mo lasesep doxodok; ara raba vam lugugu at loorong ti mo lara nia a soxolik kaka i ro xeneng at limixin. 20 Ara vaxaxis pam lasaxaruki rak ne Devit ngan loorong at loxonaleng aga lox anarong i mi ladan momonok i xaala. 21 Lolos tarak nabak lok amisik eburu min, lolos tarak naba lox alolos i. 22 Lavamunepen teren di boxo epovo ri vas asi i; limixin kapmek di boxo epovo ri sak tup min. 23 Anaba sax amdamda nedi di esep tangarang min, la anaba sev amet nedi axap ua dingolong angtungun tin. 24 Anaba balamu i la ana lok tatao amisix i; anaba lox i xusu lavamunepen teren di noxo sak tup min. 25 Anaba lox epasum lixitkis orong teren, tuka i ro at laras Mediterenian la uto epopolo at ladan Euparates. 26 La neni naba vaase ria xeretna, “Nenu ne Tamak la ne Moroa rak. Nenu Lurutu See Pe rak la Laradi Loklox Arooro rak.” 27 Anaba lox asilox i ngan lamdak avot tarak, la neni naba silok axap ti lavaorong axap at na lavatbung menemen. 28 Anaba lox epovo amisik levengkakaape rak tin, la lekabus tarak eburu min naba nemen amisik la noxo xap. 29 La mo leesooxun ngan lubung amgomgo keneng at livipisik li ren, naba nemen amisik ngan laxalibet; tavaorong nabap tavasu amisik boro at livipisik li ren.

30 Ketla do livipisik li ren dina ronga xepe at Lenavolo rak la di noxo rooro mu asu levelinga rak, 31 la do di noxo doxoma mu levempapaase axasep tarak, la dixo mu asu Lenavolo rak, 32 anaba lox asongot di mumu laxakapmek atnedi; anaba lok nedi dina baava mu mo laxapmek atdi. 33 Ketla labalamu rak ti ne Devit noxo xap kopla ana subu kot at laxakaape rak tin. 34 A noxo los polo lekabus tarak eburu min kopla ana ke xepe tara taxakaape go agara lox pam i eburu min. 35 Aga xaape gesara mene nga keneng at laasen kaala rak la noxo lox ekun bok ba i; la mo laxakaape naba nemen amisik. A noxo xarang tinotno ne Devit. 36 Neni naban tuuna amisik taxampipisik li, la anaba reven aratao lixitkis orong teren at levenaleng i rooro ren. 37 Na loklok tatao rak tinimi naba nemen amisik ngan lagaaling, ua neni i soso axasep amisik to vana at laxalibet.”

Lanteng Ti Loorong Diga Sak Tup Min

38 Ketla nenu ne Moroa, u belemamao mo loorong nenu uga soxolik ka i; ugara lox abulubun pam i la uga sok sisixe i. 39 Ugara los polo vam lekabus taram eburu mi ne Devit, lasaxaruki ram, la ura lox asi aleng i basinge lixitkis teren ngan loorong. 40 Ura ut tereve asi vam larangas uat ik lok kangkan lemenemen silok teren, la ura lok kapmek pam laraugu esep matmatkun teren. 41 La nedi limixin ua dit pas polo go, dim nem kaka lempanga ren; la nedi dik lok saparav i, ding longon sese i. 42 Ura lok tooro vam lavamunepen teren kusu dina sak tup mi limixin taram; ura lok pam lavamunepen la dira momo. 43 U lok lempanga esep teren i lok ngan lempanga gamasa nga la lavamunepen taram dirak sak tup etaba nga midi keneng at levenesep. 44 Ura lok kepe vam laasen silok teren la ura lok pes pam i basinge lixitkis orong teren. 45 Ura lox asioxo vemput ta i la ura vung kimir i mi lainmangan.

Lisingising ti Loklok Asu

46 Leeme Silok, kereva, unak lox alipe rino nga basinge nema? Mo lebelemamao ram na babao ngan laxao la naba se ba ua? 47 Una doma mumu be na lorooro rak it mut tinotno; la unaklen box i do nenu uga rudum li nema mi lenbantuxu gamasa mun! 48 Nege ba naba rooro amisik la noxo met? Taradi naba lok ba xereva xusu ni noxo beles at lamaut?

49 Leeme Silok, ua nga no lempanga nenu uga lox asuusu i ri lox asaxaven mo labalamu ram? Ua nga no lengkakaape nenu uga lox i ri ne Devit? 50 Uguta domampe i do limixin diga paase aksaksa la vupu xapmek tinotno ria lasaxaruki ram, la aga vekip mi mo lempapaase vupu at lavamolon. 51 O Leeme Silok. Lavamunepen taram diga paase xapmek ti loorong soksoxolik taram. Di paase xapmek tin ap mo axap lengkot neni it pas teren.

52 Leemi asu amisik ti Leeme Silok la kopmen tekavaxap teren! Tuturun! Tuturun tinotno!

Copyright information for `MMX