Psalms 90

Levelinga Mumu Ne Moroa La Limixin

O Leeme Silok, nenu ugak lok ngan amisik loogu aulis atnema lavaola axap. Avot ti laaleng uga rudum li levengkaana la lempanga di rooro xeneng at lavatbung menemen, nenu ugak lox axa ngan ne Moroa i rooro lexen, la unabat kis Moroa amisik la kopmen tekavaxap taram.

U tong i ri luvuttadi axap kusu dinabamlong ti mo loxot nedi diga ravasu ren; u baba gili amlong di xusu dina repukus ti laxakup. Nenu u ven legesa abin sangaun kobot maares di lok ngan mun legesa aleng; di lok ngan mun laaleng itinongo, ira onon pam, i lok ngan mun legesa xonatat aleng at laxanimin. Uga xip pes kaka nema ngan ladanut; maxo rooro abao bok ma ngan lapnobo i sonao. Ma lok ngan levenang i suu valas maxantamak suubu, di suu la di repalas asu lamaraanu, la melemu dira molos la dira met manga ukantinao.

U sesele utut nema mi mo lebelemamao ram; ma emilik sak mumu lebelemamao ram. U saali leveloklok kakapmek atnema ro melamgo ram, mo leveloklok alipe atnema ik lok go ap mo loxot nenu u epovo ri reven kaka di. La lorooro atnema, nenu u tara korop atmur i mi mo lebelemamao ram; la i sonao ngan lavapaase siksikma. 10 Lorooro atnema it pot mun at lavanuti sangaun maares la do ma lolos, maba se ka lavanuan sangaun maares; ketla ana levenmaares move im taba nema mi leven ekarakat la lainbulu; la soso mun lorooro atnema i vaxap kot, la mara onon tino nga.

11 Kopmen tara go gata suma vam lolos silok at lebelemamao ram. Kopmen bok teta iklen ka ba lanmarat silok, mo lebelemamao silok taram i epovo ri lox asuusu i xeneng atnema. 12 Una anasa nema do lorooro atnema it mut mun kusu manaba ruuna ka lodoxoma avukat.

13 O Leeme Silok, lebelemamao ram naba xap ba lingisa? Una belen tuntun mu nema, limixin me Israel, atla nema limixin tinotno ram! 14 Una suxa amisik nema at leven maxantamak mi labalamu lexen taram, kusu manabak pixan la mana sosoro keneng at lorooro axap atnema at na lavatbung menemen. 15 Una raba nema mi lomomo silok ngan bok pam mo lanbulu silok uga raba nema min ap mo levenmaares magak lok at lasaxaek. 16 Una lox avolo nema lavasaxaruki ram kusu mana ven leven gugu lolos taram; una lok bok livipisik li atnema xusu dina ven mo lolos silok taram.

17 Leeme Silok ne Moroa atnema, una ke mo loklox anarong taram nak lok keneng atnema. Una lox epovo levendoxoma atnema keneng at leven gugu axap nema ma lox i!

Copyright information for `MMX