Revelation of John 10

Laangelo La Lugun Linga Lixilik

Melemu aga ven manga lara laangelo lolos ga si boro vana at laxalibet. La loxontakabu ga itis i ngan lavanga singsigaara, la laxaburi gak lok to mavana at lavatlak teren. La lemeren ga soosoo ngan laxangking la luxangkedek teren ga lok ngan legepu xus una, laxao gak lok teren. To at lekngen neni gam tebeng loxon gun linga lixilik mo ga repalas pam; la laxangkedek tino ren ni ga vaxaru i ro at laras la laxangkedek kia ren ni ga vaxaru i ro at laxangka. La ni ga xup lolos mi laxaka linga silok ga lok ngan lavat laion im booro lolos; neni ga xup kerepmo la lavanuti levempanga tepaavat diga vaase porang i. Aga gagas kusu ana malagan mo levelinga diga tong i, ketla aga ronga laxaka linga at lara ro vana at laxalibet ga lok tia, “Nemen uta malagan mo levelinga atdi, ni ba nemen alipe mun.”

La mo laangelo aga ven i, ga tu ro at laras la to at laxangka, ga song urut mi lekngen tino upana ri laxalibet, la ga vangpe mi laasen at ne Moroa mo i rooro amisik la kopmen taxavaxap teren, la ga rudum li laxalibet la lempanga dik lok teren, la lavatkangka la lempanga dik lok teren, la laras la lempanga dik lok keneng teren, la ni ga lok keretna, “Moroa kopmen noxo ngais abao.” Ketla ap mo levenaleng laangelo sepsev avanuti naba mas luru ren, ne Moroa naba lox asorun mo lodoxoma alipe ren, kerekngan neni gara tong axasep pam i ri lavaeme vapaase alii ren, nedi lavaanat saxaruki ren. La mo laxaka linga nia aga ronga avor i, ga paase ria boro vana at laxalibet, ga lok manga ria, “Unat pas la una lok ka lugun linga mo i repalas pam la mo ik lok at lekngen laangelo mo i tu ro at laras la laxangka.”

La aga vot pasa mo laangelo la aga sue i mi lugun linga kusu na raba ia min; la ni ga lok tia, “Una lok ka na lugun linga la una anan i; naba so mamao to at labalam ketla ro at langsum ni naba so avukat ngan limisiu.” 10 Aga lok ka mo lugun linga lixilik boro at lekngen laangelo la aga an i, la ni ga lok ngan tinotno ladan misiu ro at langsuk; se aga linge i, ni ga so mamao ro at labalak. 11 La laangelo ga lok tia, “Mo manga una tong asu levelinga at ne Moroa mumu laxanabung mixin solo, levennep silok i buaang, la larapapaase la lavaorong silok.”

Copyright information for `MMX