Revelation of John 20

Satan Gak Lok At Loxokoxo

La nia aga ven lara laangelo ga si boro vana at laxalibet, neni gam tebeng lengki at lemeroon la gam tebeng bok lavaroos sen silok. La mo laangelo ga ranga alis lavattulaava la ga xoxo i kusu na nemen kuren at legesa abin sangsangaun kobot (1000) levenmaares. Mo lavattulaava ga nemen ganoxa, neni ne Devel la laasen bok teren ne Satan. La mo laangelo ga lu arup min ukopok at lemeroon, la ni ga vipe lavatban la gam lut pe avarang lumusaragu ap mo lemeroon. La ne Satan nabak lok go at legesa abin sangsangaun kobot (1000) levenmaares la ap mo levenaleng neni noxo bala arup bok ba limixin at lavatbung menemen se at laxavaxap ap mo levenmaares. Melemu at nom neni naba sepmus at lentaba levenaleng mene.

La nia aga ven lengkonin at lavaorong silok, la nedi limixin digat kis teren, diga ruuna lololos kusu dina ila mumu loklok at limixin. La aga ven bok leventoonan atnedi limixin la limixin petpes diga ra korop lengkaka atdi mila diga tong asu lunuunu atdi keneng at ne Iesu, la diga nuunu bok at levelinga at ne Moroa. At lorooro atdi di goxo lotu parap lavatpanga sio la lavatpoovo vanga ren la di goxo lok ka loklok katling at lavatpanga sio to at lenmang atdi kopla levengkikngen di. Diga roo xat amlong la nedi eburu mi ne Karisito digam gomgo ri limixin at legesa abin sangsangaun kobot (1000) levenmaares. La nedi limixin petpes diga met pam, kopmen di goxo roo xat amlong se at laxavaxap ap mo legesa abin sangsangaun kobot (1000) levenmaares. Anai, ni laxakatu kaxat amlong avot at labarongan. Naba lox avukat aleng tinedi na lavaanat soxolik at ne Moroa, diba nemen ap mo laxakatu kaxat amlong avot. Di noxo suma lanmet sepsev agepura ketla diba lok ka lugugu ngan lavamaasa ri ne Moroa la ri ne Karisito; la nedi eburu mi ne Karisito dibam gomgo ri limixin at legesa abin sangsangaun kobot (1000) levenmaares.

Lanmet At Ne Satan

Melemu ap mo legesa abin sangsangaun kobot (1000) levenmaares na xap, Moroa naba soxomus asu ne Satan boro at loxokoxo. La ni naba vasu ri bala limixin at lengkot axap at na lavatbung menemen. La nedi lubungmixin me Gok la Magok, Satan naba lok bubua ka di kusu ri leesep, la luutus atdi naba umsu aleng kerekngan laxangkaneng to loxon. Dinabat pas boro at lengkot axap la dinaba rupot to at mo lemenemen silok at ne Moroa i vavara aleng tin, la dinaba ru xangkan i. Ketla laxao naba si boro vana at laxalibet la naba xotos axap di. 10 La mo laradi babala arup, ne Satan, Moroa naba lu arup min uto at lemet kao at lasalpa; mo lemet kao lavatpanga sio eburu mi laradi vapaase alii xaxarang dubak lox e, la go nedi lavantun dinaba ruuna ka losongsongot silok at levenaleng kangking la kanimin la kopmen taxavaxap teren.

Laaleng Ete Silok

11 La nia aga ven langsangan loxonin orong bunbun la mo Laradi gat kis teren; la lavatkangka eburu mi laxalibet duga sixiro basinge i la duga sonao nga. 12 La aga ven nedi diga met pam, limixin silok la limixin gamasa, diga tu ro melamgo at loxonin orong at ne Moroa. Lentaba lempatbuk mo ga repalas. La lara lubuk ap mo levenbuk diga suang i, ni lubuk at lorooro. La ne Moroa ga ila mumu loklok atnedi limixin, la mo leveloklok atdi gak lok ap mo levenbuk. 13 La nedi limixin diga met to at laras la nedi bok limixin diga met la diga nemen to Edesa, la limixin axap diga met, diga tu ro melamgo at ne Moroa la neni ga ila mumu loklok atdi la diga lok ka luunun ga epovo mi leveloklok digara lok pam i. 14 La ne Moroa ga lu arup axap tino nga mi lanmet eburu mi lenep Edesa uto at lemet kao. Mo lemet kao, ni lanmet sepsev agepura. 15 La nedi limixin levenasen atdi goxok lok at lubuk at lorooro, Moroa ga lu arup bok midi uto at lemet kao.

Copyright information for `MMX