Revelation of John 22

Ladan Tooro

La laangelo ga lox ase ia mi ladan at lorooro ga xasep aleng. La ga puvut su boro at loxot kitkis at ne Moroa la Lanasip; la ga sesen to xantubu at langas lom at lemenemen silok. La to meo la meo at na ladan, luuna at lorooro i tu go la keneng at legesa maares mo luuna i pisik, i epovo at lasangaun mi legepu aleng, la i pisik gesara at legetgesa gaaling. Lempavaxan una ren dik lok ka i ri lox aroo limixin at lavatbung menemen. La mo lasaxaek ik lok mavana at na lavatbung menemen noxok lox ap moi lemenemen silok. Loxonin orong at ne Moroa eburu mi Lanasip naba nemen go la lavasaxaruki ren diba lotu parav i. La diba epen etang mi ne Moroa, la laasen teren nabak lok to at lenmang atdi. La noxopmen bok ba taxanimin, la limixin di noxok pakes bok ba ri taxasep at lababao xopla laxangking, mila Leeme Silok ne Moroa neni naba lok ngan laxasep tidi, la dinaba ruuna lixitkis silok ti lok tatao limixin la dinaba nemen amisik kuren, la kopmen taxavaxap teren.

La laangelo ga lok tia, “Na levelinga i ruturun amet la i epovo do limixin dina nuunu ren. La Leeme Silok, ne Moroa im taba Loroonan Kaala ren ti lavaeme vapaase alii ren la ni ga riki laangelo ren kusu na lox ase lavasaxaruki ren mi lempanga salai naba vot soso.”

Iesu Mo Naba Vot

Iesu ga lok keretna, “Mina ronga i na, anaba vot soso mun. Luvukat tinedi di mumu asu levempapaase alii at na lubuk.”

Nenia ne Jon; aga ronga na levelinga la aga ven na lempanga, la aga xis tiktikbu mi luvatgulom tarak ti lotu parap laangelo mo ga lox ase ia mi na lempanga. Ketla neni ga lok tia, “Nemen uta lotu parav ia. Nenia mun lasaxaruki at ne Moroa kerekngan u la luvutnetam, nedi lavaeme vapaase alii la nedi bok ding tonga res at levelinga at na lubuk. Una lotu parap kusuk ne Moroa.”

10 La ni ga lok tia, “Nemen uta lipe levelinga vapaase alii at na lubuk, mila loxonaleng monga i auret kusu na levelinga na sorun. 11 La nedi dik lok laxapmek, una ke nedi dinak lok laxapmek; la nedi loklok atdi i bilinga, dina nemen kuren; la nedi dik lok leveloklok i nunuan, dina lox epasum i mi leveloklok i nunuan; la nedi di ruuna loklok i dadat, dina nemen kuren.”

12 La ne Iesu ga lok, “Mina ronga ia. Nenia anabamlong soso mun! Nia aba xip ka luunun eburu minia, kusu anaba raba limixin getgesara mi luunun naba epovo mi lempanga salai diga lox i. 13 Nenia Lamgomgo la Laxavaxap, Lurutu Kaxat mi Lumumupit.

14 Luvukat tinedi dira gos adadat pam levesingsiga atdi, kusu lorooro atdi naba epovo xusu dina anan at lempeven una boro at luuna at lorooro, la dina beles keneng at levenngas povolo uto at lemenemen silok. 15 Ketla limixin kakapmek la lavaun sak, la nedi limixin diga lok laxakapmek maxamang at lixitkis epot la limixin sepsev amet tadi, la nedi di lotu parap lempoovo vanga, la nedi bok di vavara aleng i xusu dina paase babala la dik lox amisix i; nedi axap na di noxo vubeles to xeneng ap mo lemenemen silok.

16 Nenia ne Iesu. Ara riki vam laangelo rak tinemi limixin at lotu xusu ni na vaase axasep nimi mi na levelinga. Nenia lavatturunen la livisik li at ne Devit; la nenia lentian i soosoo aleng. 17 Loroonan Kaala eburu mi latkin epot maxat du lok keretna, ‘Ude nimi.’ La nedi di ronga i na, dina lok bok keretna, ‘Ude nimi.’ Do nege i minu, i epovo do neni na rupot, la nege i vara ladan tooro, neni na lok ka i, mila kopmen tuunun teren.”

18 Nenia ne Jon, a vaase aronga nemi axap mira ronga vam na lempapaase alii at na lubuk; do tara na tong abeles parang tengkot ukeneng at na lubuk, Moroa naba raba i mi nom levesongsongot ik lok keneng at na lubuk. 19 La do tara na lok pes tempanga basinge na lempapaase alii at na lubuk, Moroa naba lok kepe levempeven una ren to at luuna at lorooro la neni noxo nemen bok ba ro xeneng at lemenemen melemelengan at ne Moroa. Mo luuna la mo lemenemen, ik lok at na lubuk.

20 La neni mo i paase aru i na, i lok keretna, “I ruturun aleng; nenia mo anaba vot soso nga.”

I ruturun. Ude u, Leeme Silok ne Iesu!

21 Letaba nabalamu at Leeme Silok ne Iesu nak lox eburu mi limixin at ne Moroa. I ruturun.

Copyright information for `MMX