aAis 6:3

Revelation of John 4

Loxonin Orong At Ne Moroa Ro Vana At Laxalibet

Melemu at na, aga ven manga lara lisilimet; maxeneng teren aga ven lara lumusaragu ga rem suang to vana at laxalibet. La aga ronga laxaka at lara xerekngan no avot nia aga ronga i, gang teng ngan luru; ga lok tia, ‘Ude vana u, la ana lox ase u mi lempanga naba rupot melemu at nai.’ La soso mun Loroonan at ne Moroa ga suxuna ia, la to at laxalibet loxonin orong mo gak lok mi lara gat kis teren. La mo laradi gat kis teren, neni ga milik ngan tinotno limikmilik at la jespa, loxonuat gamgames i memele la ga milik bok ngan lakanilian, loxonuat gamgames i memele aleng ngan lada; la laxaburi gak lok kangkan mo loxonin orong ga milik ngan la emaral, loxonuat gamgames i mamaxa. La legepu sangaun mi lavanuet bok lengkot kitkis orong gak lok kangkan mo loxonin orong la legepu sangaun mi lavanuet loxongkulao amgomgo digat kis teren. Diga sigaara mi levesingsiga bunbun la lempatbungorong i gol gak lok to at lempatlak atnedi. Boro at nom loxonin orong, langangao at lavanga i mam ga ravasu; aga ronga leretepaavat ga on. La to melamgo at nom loxonin lavanuti levenbabao mo ga babao; nedi lavanuti leventoonan at ne Moroa. La to melamgo ap mo loxonin orong, lara lavanga bok mo ga milik ngan ta langsangan liriong silok ga xasep aleng la ga silok ngan lavatdan kis.

La lavanuet levempanga rooro di tu kangkan amisik loxonin orong, di umsu mi laxangkatli to melamgo la to melemu bok.
Lara avot ga lok ngan la laion, lara sepsev agepura ga lok ngan lubulumaxao, lara sepsev avantun ga ruuna lamakmaran at lavatlak at laradi, la lara sepsev avanuet ga ven ngan lamalom taptava. Ti nom lavanuet levempanga rooro dik lox amisik, nedi getgesara diga ruuna lavanna levempapa, diga umsu mi levengkatli digak lok at lengkot axap la to bok maxopok at levempapa atdi. La at levenaleng kangking la kanimin kopmen dina xap ti tong na levelinga,

‘I melemelengan, i melemelengan, i melemelengan. Neni Leeme Silok ne Moroa i lolos aleng. Ni ga nemen ganoxa la i nemen mo, la naba vot bok melemu.’ a 

La mo lavanuet levempanga rooro di tong asu amisik leemi asu la loklok ngangao la levelinga rotong avukat ti mo lara it kis amisik to at loxonin orong teren. La ni naba rooro amisik. Do dina tong i nom, 10 mo legepu sangaun mi lavanuet loxongkulao amgomgo dit kis tiktikbu mi lempatgulom atdi to melamgo at ne Moroa mo it kis at loxonin orong teren la di lotu parap ne Moroa naba rooro amisik la kopmen taxavaxap teren. La di lok li lempatbungorong atdi ro melamgo at loxonin la di lok keretna,

11 ‘Moroa Leeme Silok atnama, nenu xusuk mun u epovo na lok kaka leemi asu, loklok ngangao mi lololos, mila nenu uga rudum li lempanga axap; la at lavavara mun taram uga rudum li di la uga lok li di xusu dina rooro.’
Copyright information for `MMX