Revelation of John 6

Lanasip Ga Ba Kaxat Kepe Levelumlut At Lugun Linga

Melemu aga ven Lanasip ga ba kaxat kepe lumlut avot at nom lavanuti levelumlut, la aga ronga lara atnedi lavanuet levempanga rooro ga vaase silok ngan leretepaavat ga lok ti lara, “Ude u.” La nia aga milik kaxat la aga ven lavaros bunbun, la mo laradi gat kis teren, neni gam tebeng labanara; la ni ga lok ka lavatbungorong, la ni ga sixit kaxat uto at lengkot axap at na lavatbung menemen ngan ta laradi esep kusu na sev asi lavamunepen teren.

La melemu Lanasip ga ba kaxat kepe manga levelumlut sepsev agepura; la aga ronga lavanga rooro sepsev agepura ga lok ti lara, “Ude u.” La lara lavaros manga ga vas su, ga memele aleng. La mo laradi gat kis teren, ga lok ka lololos kusu na lok kepe lumulum kantubu at limixin at na lavatbung menemen, kusu limixin diba esev amet. La neni ga lok ka bok lavarise sepsep i baalom aleng.

La melemu Lanasip ga ba kaxat kepe manga levelumlut sepsev avantun, la aga ronga lavanga rooro sepsev avantun ga lok ti lara, “Ude u!” La aga ven lara lavaros ga bibi aleng, la mo laradi gat kis teren gam tebeng lisikel to at lekngen. La aga ronga lavanga ga lok ngan laxaka linga boro xantubu ap mo lavanuet levempanga rooro, ga lok, “I epovo do una lox aurut luunun at lempanga anan; kuren la legesa buxom piao ni luunun lixilik ti laradi i gugu at leges aleng, la lavantun buxom balirais ni luunun lixilik ti laradi i gugu at leges aleng, ketla nemen uta lok kapmek ladan momonok la laxadan vaen.”

La Lanasip ga ba kaxat kepe levelumlut sepsev avanuet la aga ronga laxaka linga at lavanga rooro sepsev avanuet ga lok ti lara, “Ude u.” La nia aga milik kaxat, la aga ven lara lavaros ga ngangan la mo laradi gat kis teren, laasen teren ne Lanmet; la lara ga mumu ro melemu, laasen teren ne Edesa. La duga lok ka lololos mavana at lenep i sepsev avanuet at limixin axap at na lavatbung menemen, kusu duna sev amet di keneng at levenesep silok; la loroxo la levenanmeres silok la levempanga mi lavanuet kangkedek atdi diba sev amet bok limixin.

La Lanasip ga ba kaxat kepe manga levelumlut sepsev avalimo. La aga ven uto saparap loxonin laplavang la maxopok teren aga ven labaroonan at limixin nuunu diga met gano. Limixin diga sev amet di mila diga tong asu levelinga at ne Moroa la levelinga ruturun at ne Iesu Karisito. 10 Digap kup lolos mi laxaka linga xeretna, “Moroa lolos aleng, nenu u melemelengan la u ruturun aleng. Lingisa ba uba vaxaru li limixin at lavapaase la una sev amet di ri vorang laniu nema maga ekip tangarang min?” 11 La nedi getgesara diga lok kaka levesingsigaara bunbun la diga lok ka levelinga do dina ngangais be la dina lok mamas, se limixin dina sep bok tentaba at luvutneton di eburu mi lavasaxaruki xerekngan nedi diga uu. Do luutus at nom limixin na epovo, Moroa naba vorang laniu atnedi axap.

12 La aga ven Lanasip ga ba kaxat kepe manga levelumlut sepsev avanna. La langne silok ga vot, la laxangking gak maxat ngan lavanga singsiga limixin di lox i mi laxabinim bibi at lavatme; la lagaaling axap kopmen goxo soosoo axasep bok ba, ketla ga soosoo memeles ngan ta lada. 13 La laxampenti boro vana at laxalibet diga subu si ukopok ti lavatbung menemen kerekngan lempeven at luuna pik mo i mada vam, im subu si do lamanman silok it mas i. 14 La lamavangkap ga sonao ngan lugun diga vegun i, la lempatkaana axap eburu mi levesoxan diga vas kaxat uto vetpes.

15 Melemu lavaorong silok at lavatbung menemen la limixin gomgo la luvuttadi amgomgo at limixin esep, la limixin dip novos la limixin lolos, la nedi bok lavasaxaruki la limixin sepmus bok, diga lipe ro at laratabuang la ro xantubu at lempattavut silok to at larakaana, 16 digap kup ti lempatkaana mi lemparuat keretna, “Mina subu pavaa nama la mina lox alipe nama basinge mo laradi it kis to at loxonin orong la basinge bok lebelemamao, Lanasip ba lox asu i rinama, 17 mila mo laaleng silok at lebelemamao atdu na nga ira vot pam la ixo epovo xusu tara naba ekini min.”

Copyright information for `MMX