Revelation of John 9

La laangelo sepsev avalimo ga mas mo luru ren la aga ven lenti no xopok at laxangka ga subu si boro vana lamavangkap. La mo lenti ga lok ka lengki ri suang lumusaragu at lemeroon. La ni ga suang lumusaragu at lemeroon la lusuxa ga ravasu ngan lusuxa at langsangan laxao. La mo lusuxa ga vula pe laxangking eburu mi lamavangkap la laxangking goxo epovo ri soosoo. La laxanasku ga ravasu boro at lusuxa uto at laxangka, la diga lok ka lololos ngan lololos at laksoxomet at na lavatkangka. La diga lok ka levelinga do nemen gat di guta lok kapmek lempivilis at na lavatkangka kopla levenasen ang bok, kopla levenuna; ketla dina lox asongot mene limixin, kopmen di goxo ruuna loklok katling at ne Moroa ro at levenmang atdi. La diga lok ka lololos kusu ri lox asongot nedi at lavalimo gaaling mun, ketla nemen gat di guta sev amet di. Mo losongsongot nedi diga suma i, ga lok ngan losongsongot at laksoxomet do i bi asongot laradi. La keneng ap mo lavalimo gaaling limixin dibam suma mo losongsongot silok la diba vara ri lanmet, ketla di noxo vuse ka i. Diba vara meremet ketla lanmet naba o basinge di.

Mo laxasixu diga ven ngan laxanos diga gagas kusu ri leesep. La to at lempatlak atdi diga siga lempatbungorong, ga lok ngan logol. La levenmeren diga lok ngan levenmeren at luvuttadi. Lengkabinim atdi ga baalom ngan lengkabinim at lavakin la levesangsa atdi ga lok ngan levesangsa at laion. Diga siga pe lenbongobong atdi mi levempanga singsiga aen; la lasasang at levempapa atdi ga lok ngan lasasang at laxanos eburu mi laxangkaris digak sixit uto at leesep. 10 La diga ruuna bok levenatketke la ga soxobi ngan at levenaksoxomet; la mo lololos ti sev asongot gak lok at levenatketke atdi la diga epovo na lox asongot limixin keneng at nom lavalimo gaaling. 11 Diga ruuna loorong silok, neni laangelo ik lok tatao lemeroon; laasen teren keneng at lavapaase Ibru do ne Abadon la at lavapaase Grik do ne Apolion. Lavasuun at na laasen do ‘Laradi sesele utut kepe.’

12 Lumumuat avot mo gara xap ta, ketla legepu mumuat move gara vot bok.

13 La laangelo sepsev avanna ga mas luru ren, la aga ronga laxaka linga boro at lavanuet mesuluk ap mo loxonin laplavang i gol la i tu ro melamgo at ne Moroa, 14 la ni ga lok ti mo laangelo sepsev avanna xeretna, “Una soxomus asu lavanuet lubungangelo mo dik lok at loxokoxo to at ladan silok Iupretis.” 15 Ni ga soxomus asu mo lavanuet lubungangelo la mo diga gagas ti mo loxonatat aleng ap mo laaleng ap mo lagaaling la ap mo lamaares kusu dina sev amet lenep sepsev avantun at limixin axap. 16 La aga ronga luutus at limixin esep ga buaang aleng, digat kis at laxanos atdi ga epovo at legepu sangaun kobot milion. 200,000,000. 17 La keneng at na lisilimet tarak aga ven mo laxanos la mo luvuttadi digat kis atdi diga siga pe lenbongobong atdi, mi levempanga singsiga aen mo ga memele aleng, la ga mamaxa ngan la sapira, ni loxonuat gamgames i mamaxa; la nom lempanga singsiga ga ngangan bok ngan salpa, mo i lok ngan laxakup ngangan. La lempatlak ap mo laxanos ga lok ngan lempatlak at laxan laion, la laxao eburu mi lusuxa la lasalpa ga ravasu boro at levenngusno atdi. 18 La na lavantun levempanga, laxao, lusuxa, la lasalpa ga sev amet lenep sepsev avantun at limixin axap. 19 Lololos ap mo laxanos gak lok to at levenngusno atdi, la to at levenatketke atdi. Mo levenatketke atdi ga lok ngan lempasii la diga ruuna lempatlak atdi kusu dina sev asongot bok limixin min.

20 La nedi limixin di goxo met ap mo levesongsongot, di goxo leeng basinge leveloklok kakapmek atdi. La move di goxo xap ti lotu saparap lubunggas la lempoovo moroa diga lox i mi levenuat ngan logol, la siliva la borons la levenuat petpes bok la levengkonuna, mo lempanga dixo epovo do dina reven la dinang tonga la dinat pas. 21 La kopmen bok nedi limixin di goxo leeng basinge loklok ti sev amet tadi, la loklok ti lok levesak la loklok kakapmek maxamang at lixitkis epot la loklok kipkip pilo.

Copyright information for `MMX