aAbk 2:4

Romans 1

Lavapaase Axasep

Nenia ne Pol, lasaxaruki at ne Iesu Karisito, la nia luun pavang, ne Moroa ga soxolik ka ia la ga ro ka ia xusu ana vavang mi Lagale Lavavang teren. Na Lagale Lavavang ne Moroa ga vaase alii min ganoxa at levenngusno atdi lavaeme vapaase alii ren, la diga malagan li i xeneng at Lovoang Kaala, mumu ne Nitna ni Leeme Silok atnedik ne Iesu Karisito ni ga nemen ngan laradi mede at na lavatbung menemen, diga visix ka i at livipisik li at ne Devit. Ti loklok teren i xaala aleng, ne Iesu ga lok kaka laasen do Nitna ne Moroa at loxonaleng ni ga roo xat amlong basinge lanmet mi langsangan lololos teren. Keneng mun at ne Iesu la ti lox aurut laasen teren, Moroa ga raba ia mi letaba nabalamu ren kusu nia ana ru katling i ri lok lugugu ngan laradi vavang at ne Karisito, la ana sasar asu ka limixin boro xamang at limixin kopmen di me Judaia, kusu dinaba nuunu ren la dinang tonga res teren. La nemi bok limixin dom Rom, ne Moroa gara ro xaka vam nimi ri ne Iesu Karisito.

Nia a malagan na levelinga rinemi axap mi nemen dom Rom, Moroa i balamu nimi la ga ro xaka nimi do nemi limixin teren.

Letaba nabalamu la lenmila rinimi boro at ne Moroa ne Temen nedik, la Leeme Silok ne Iesu Karisito.

Lisingising Ti Tong Loklox Avukat

Avot be, nia a tong loklox avukat ti ne Moroa rak keneng at ne Iesu Karisito rinemi axap, atla limixin at lengkot axap at na lavatbung menemen di ronga levelinga mumu nom lunuunu atnemi. Moroa nia a gugu rin mi lorooro axap tarak, la nia a vavang mi Lagale Lavavang at ne Nitna, neni iklen i do na levelinga rak i ruturun aleng do nia am doma amisik nimi, 10 keneng at levesingising tarak at levenaleng axap. Nia a ngising ne Moroa dola lodoxoma ren kuren, neni naba suang langas tia xusu anaba vot saparap tinotno ba nimi dom.

11 Nia a vara aleng i do nia anaba ven nimi la ana raba nimi mi leveloklok tooro at Loroonan at ne Moroa eburu minemi ri lox alolos nimi. 12 Nia a doma i do dik ataba elok tooro ela; nemi miba lox alolos ia mumu lunuunu atnemi la nenia aba lox alolos nemi mumu lunuunu rak. 13 Luvutnetak mi luvurinuk. Nia a vara i do mina xasep nunuan; buaang laxanaleng nia agam doma i do anat pot pasa nimi, ketla lentaba lempanga ga tu pe ia. Nia a vara i xusu ana vavang dom atnemi xusu teventaba dinaba nuunu bok, kerekngan ia aga lox i ro at lengkot petpes kantubu at limixin kopmen me Judaia.

14 Nia a ruuna lugugu silok anaba lox i ri limixin axap, ti leme Grik la tinedi bok limixin petpes, ti limixin akleklen la tinedi bok kopmen takleklen solo atnedi. 15 Kuren la lodoxoma rak iplivi aleng, kusu ana vavang tinemi bok limixin mi nemen dom Rom.

Lolos At Lagale Lavavang

16 Nia xopmen ana lok mamangan ti vavang mi Lagale Lavavang, atla ni lololos at ne Moroa ri lox arooro nedi axap di nuunu, leme Judaia avot la melemu rinedi limixin kopmen me Judaia, 17 atla Lagale Lavavang i lox asuusu i do ne Moroa ik lox akmokso limixin mi legesa ngas mene nga, neni lunuunu la kopmen tangas petpes bok ba, kerekngan Lovoang Kaala i tong i xeretna,

“Laradi ip sep sogo at ne Moroa mi lunuunu ren, ni naba roo suu.” a 

Loklok Kakapmek At Limixin

18 Moroa ira lox axasep pam i ri limixin axap dola neni ixot kis epen mi leveloklok kakapmek at limixin, atla nom loklok kakapmek atnedi i sasar angtang kaka di basinge luruturun at ne Moroa, kuren la ni naba lox asi nom lebelemamao ren ti sev asongot di. 19 Moroa i lox asongot di atla di xasep nunuan pam ap mo leveloklok teren ni i lox axasep di min. Moroa xa i lox axasep di min, 20 ga ru xaka i gano ne Moroa ga rudum li na lavatbung menemen, mo loklox eburu mi lololos lexen teren i nemen amisik. Limixin kopmen dina epovo na ven mo lololos eburu mi loklok teren, ketla di ven kakasep kaka i at levempanga ne Moroa ga rudum li i. Kuren la kopmen tevelinga atdi ri lox asepsu di basinge lebelemamao at ne Moroa.

21 Digaklen ne Moroa, ketla digoxo emi asu min kopla digita tong loklox avukat tin. Levendoxoma atnedi ga rebonot axap, la levendoxoma rangtangku atnedi ga umsu mi lubuxumin. 22 Diga lok do nedi luvuttadi leklen, ketla xopmen; nedi luvuttadi baulang mene. 23 Kopmen di goxo lotu saparap ne Moroa ruturun i rooro amisik, ketla diga lotu saparap laxampoovo at luvuttadi mede xopok, la lavapixa eburu mi levempanga dit pas mi lavanuet kangkedek, kopla lempanga ngan laxangkavu.

24 Mo limixin digang tangku xerepmo, kuren la ne Moroa ga ke xepe di ri lok leveloklok kakapmek maxamang at lixitkis epot ngan diga vavara rin. La i lok ngan bok pam nedi eburu diga lok lengkot mamangan la diga lox abilinga labantuxu atdi. 25 Diga lox ekun luruturun at ne Moroa mi laxaxarang, diga lotu saparap levempanga ne Moroa ga rudum li i, la diga domampe laradi runtudum kusu dina lotu saparav i. Ata emi asu amisik min. Tuturun.

26 Limixin diga lox asu i mo loklok, kuren la ne Moroa ga ke xepe di ri mo leveloklok i lox asuusu langsangan lainmangan. Lavakin bok diga velongka, na ixo epovo do dina lox i. 27 La lavatlok bok kuren di goxopara nak midi eburu mi lavakin, la levendoxoma atnedi ga ngaongao xa ridi. Lavatlok diga lok levempanga mun mamangan, kuren la livipisik teren do diga ruuna ka levesongsongot ga epovo mi nom loklok kakapmek atnedi.

28 La limixin di goxopara i do dinam tebeng lakleklen tuturun mumu ne Moroa, kuren la ni ga ke xepe di ri mumu asu levendoxoma atdi xa i ekarakat, kerepmo la diga lok levempanga ixo epovo do dina lox i. 29 Di umsu mi laxanasen kakapmek axap, i ngan lodoxoma xapmek, loklok ti belegaao, la loklok kakapmek maxamang at lixitkis epot. Lorooro atdi i umsu mi loklok ngaongao ri lempanga at lentaba vetpes, di esev amet, di esep, di lok levenekarakat, di babala vukpuk, di doma xakapmek amisik ti leventaba vetpes, la di tere mumu. 30 Di lox asi limixin mi levelinga, di velox angtungun mi ne Moroa, di ekilu, dim simi di la dit las di, la di doma xaka bok leventaangas petpes ti lok laxakapmek, kopmen dina ronga res at luvuttemen di mi luvutnen di. 31 Kopmen dina ruuna tevendoxoma avukat, kopmen dina doma xatling levelinga atnedi, la kopmen dina lox asuusu labalamu ela, la loxokok ti lemet atdi. 32 Diklen i do Lenavolo at ne Moroa i tong i do limixin di mumu asu na leventaangas dinaba seeve. Ketla move dik lok na leventaangas la di momo mun midi limixin petpes ua di lok mo langas.

Copyright information for `MMX