Romans 16

Levempapaase Loklok Momo

Na levelinga ti vaase axasep nemi mi lara neinen dik laasen teren ne Poebe, la neni ga lok lugugu silok keneng at lotu at lemenemen Senkiria. Mina seega rangarang i keneng at laasen at Leeme Silok, i epovo mi loklok at limixin at ne Moroa, la minabak lok tooro i at levempanga neni bak pakes tin; atla neni garak lok tooro vam buaang limixin, la nenia bok.

A lox aonon lavapaase momo rak ti ne Pirikila mi ne Akuila, nedu lenasun duga gugu eburu minia xeneng at lugugu at ne Iesu Karisito, la duga abelemes tinotno bok mi lorooro atdu ri lok tooro ia, la kopmen do nenia xusuk, ketla limixin axap bok at laraugu lotu atnedi kopmen di me Judaia. Lavapaase momo bok tinedi dit pot buru ro at loogu atdu. Lavapaase momo bok ti lentangas orong tarak ne Epinitas, neni laradi avot at lenep Asia ga nuunu at ne Karisito. Lavapaase momo bok ti ne Maria ga gugu lolos ti lok tooro nemi. Lavapaase momo bok ti ne Endronikas mi ne Junias luradi me Judaia no dugak lox eburu minia ro at loxokoxo; la luvuttadi vavang diklen avukat nedu la nedu duga lok ngan luradi mumu asu ne Karisito avot tia. Lavapaase momo bok tarak ti ne Apilietas lentangas tarak keneng at lurutu buru at Leeme Silok. Lavapaase momo bok ti ne Eban laradi gugu bok tarak keneng at lugugu at ne Karisito la ti lentangas orong tarak ne Sitakis. 10 Lavapaase momo bok ti ne Apelis, ga lox asuusu i do luruburu ren mi ne Karisito i tu atmatkun. Lavapaase momo bok ti ne Aristabalas midi loxoetemen. 11 Lavapaase momo bok ti ne Erodian leeme me Judaia la ti luvutnetak at laasen at Leeme Silok dik lok at loogu at ne Nakiso. 12 Lavapaase momo bok tarak ti ne Taraipina mi ne Taraiposa nedu lutkin du gugu lugugu at ne Moroa la ti lentangas orong bok tarak ne Pesis neni latkin gak lok lugugu silok at Leeme Silok. 13 Lavapaase momo bok ti ne Rupas laradi i gugu avukat lugugu at Leeme Silok, la ti nenen bok no gak lok tatao ia ngan ta do ne nitna. 14 Lavapaase momo bok tarak ti ne Asinkritas, la ne Peligon, la ne Eramas, la ne Patrobas la ne Eemes, la nedi bok luvutnetak keneng at laasen at ne Karisito mo dik lox eburu minedi. 15 Lavapaase momo bok ti ne Pilologas mi ne Julia, ti ne Nerius bok mi neinen, la ti ne Olimpas bok eburu mi limixin axap at ne Moroa mo dik lox eburu minedi. 16 Mina eseega rangarang mi lenetnes i xaala. Limixin axap bok at laraugu lotu at ne Karisito di lox aonon lavapaase momo atnedi rinemi.

Levempapaase Avit

17 Luvutnetak mi luvurinuk, mo nga a sing nemi; minak lok tatao nemi basinge luvuttadi no dik lok do dinak lok levenekarakat, la dik lox antun lunuunu at limixin la nedi no dik lox abulubun leveloklox ase nemi migara lok kaka vam i; minak lok petpes basinge nedi. 18 Leventaba dik lok mo leveloklok, kopmen dina gugu ri Leeme Silok atnedik, ne Karisito, ketla di gugu mun tinedi xa. Levempapaase atnedi ik lox avukat tinotno eburu mi levendoxoma atnedi; kerepmo dik lox atdan kaka limixin, lunuunu atdi xopmen na lolos, kusu dina sar asoogong di. 19 Limixin axap digara ronga vam lorongtonga res atnimi saparap Lagale Lavavang, kuren la a momo aleng minemi. Ketla a vara i do minaklen leveloklox avukat, la mina ven kepe lavanga i lok kapmek.

20 La ne Moroa laradi at lenmila, mo ma lixilik na but povorok ne Satan to maxopok at lengkangkedek atnimi.

Letaba nabalamu at Leeme Silok atdik ne Iesu nak lox eburu minemi.

21 Ne Timoti bok laradi gugu rak i lox aonon lavapaase momo ren tinemi; nedi mi ne Lusias, la ne Jeson, la ne Sosipata; nedi legesa vapaase rak boro Judaia.

22 Nenia bok na ne Tetias, a ru katling ne Pol ti malagan na lovoang;
Pol ga vaase i na levelinga ri ne Tetias la neni ga malagan i.
a lox aonon lavapaase momo xeneng at laasen at Leeme Silok.

23 Ne Gaius laradi no nema mak lok lotu ro at loogu ren i lox aonon lavapaase momo bok teren tinemi.

La ne Erastas bok laradi ik lok tatao lempilas at lemenemen silok eburu mi neton nedik ne Kuatas nedu du lox aonon bok lavapaase momo atnedu.
24 Letaba nabalamu at Leeme Silok atdik ne Iesu Karisito nabak lox eburu minemi axap. Tuturun.

Lisingising Loklox Axap

25 Ata emi asu mi laasen at ne Moroa. Neni i epovo ri lox aru lolos lunuunu atnemi, mumu Lagale Lavavang nenia a vavang min. Ni Lagale Lavavang at ne Iesu Karisito, mo lavapaase asu at luruturun gak lok lipe at laxanmaares buaang. 26 Ketla amo nga, mo levelinga ruturun gara ru asuvos pam ti laxasep, keneng at levenmamalagan at luvuttadi vapaase alii; ne Moroa laradi xopmen taxavaxap teren ga vaase asu i xusu limixin at laranep silok axap dinabaklen i, la nedi axap dinaba nuunu ren la dinang tonga res teren. 27 Ata emi asu kusuk mun mi laasen at ne Moroa neni laradi ak leklen la leemi asu bok tin mumu lugugu at ne Iesu Karisito amisik la kopmen taxavaxap teren. I ruturun.

Copyright information for `MMX