bAis 52:5

Romans 2

Moroa Naba Ven Mumu Loklok At Limixin Axap

Nemi limixin, ixo epovo do mina viila mumu loklok at leventaba vetpes mila nemi mixo sepsu ap mo leveloklok kakapmek kerekngan nedi di lox i. Dola mi ila mumu loklok atnedi, la do mi lok bok nom levempanga di lox i, mi lok li xa lumumuat atnimi. Nema maklen i do ne Moroa ik mokso dola ni i ila mumu loklok at limixin di lok na leventaangas kapmek. Ketla nemi bok mi lok nom levempanga, no nemi mi viila mumu di min. Kereva, mi doma i do nemi limixin gamasa mun minaba sepsu at loklox asongot at ne Moroa? Kopla mi doma abalalak mene nom langsangan labalamu ren, mi loklok mulus teren la kopmen ni noxo ila mumu soso loklok atnimi. Tuturun miklen i do ne Moroa i lox avukat, atla ni i vara i do mina ven kisiv i nom la mina leeng.

Ketla levendoxoma atnemi i rebonot la mi xopara na leeng; kuren la mi lox asilok nom loklox asongot tinemi ap mo laaleng ne Moroa naba ila mumu loklok at limixin la na lox asu lebelemamao ren ti lasaxaven.

“Moroa naba raba unun ti legetgesara mumu xa levempanga ni ga lox i.” a 

Leventaba at limixin dik lox amisik leveloklok i nunuan, kerepmo di puse ri lisisixam mi loklok ngangao la lorooro nunuan; ne Moroa naba raba di mi lorooro avolo. Ketla leventaba atnemi limixin di doxoma mene di, la di sok tixirixes levelinga ruturun at ne Moroa, di vavara i do dina mumu asu levempanga i lok kapmek; nedi na dinaba ekip tangarang mi lebelemamao la lumukmusak at ne Moroa. Limixin dinaba ruuna ka loklox asongot mi levenmumuat atla dik lok levempanga xopmen na lok nunuan, leme Judaia avot la melemu rinedi limixin kopmen di me Judaia. 10 Ketla ne Moroa naba raba lisisixam mi laasen silok, la limila rinedi axap di lok levempanga nunuan, ti leme Judaia avot la melemu rinedi bok limixin kopmen di me Judaia. 11 Moroa i viila mumu loklok at limixin mi legesampoovo mene.

12 Limixin kopmen me Judaia dixo ruuna Lenavolo at ne Moses, dik lok laxakapmek la diba seeve. Limixin me Judaia di ruuna na Lenavolo, di lok laxakapmek la ne Moroa ba ila mumu loklok atnedi atla dixo mu asu Lenavolo. 13 Kopmen dina so asen limixin do dik mokso atla ding tonga mun Lenavolo, ketla nedi di mumu asu levelinga at Lenavolo dik mokso at lemeren ne Moroa. 14 Limixin kopmen me Judaia, dixo ruuna Lenavolo, ketla levendoxoma nunuan atdi i lok di xusu dina mu asu leventaangas teren, keke i do dixoklen i. Kuren la i lok ngan ta do di ruuna Lenavolo keneng at lebelen di. 15 Loklok atnedi i lox asuusu i do levempanga Lenavolo i paase min, Moroa ga malagan i keneng at lebelen di. Levendoxoma nunuan atdi i lox asuusu box i dola na i ruturun, mila at leventaba levenaleng levendoxoma atnedi i lox akmokso di, la at lentaba levenaleng i su auru loklok atdi. 16 Lagale Lavavang nia a vavang min, i tong asu i do ne Moroa naba ila mumu loklok at limixin at laaleng ete la keneng at ne Iesu Karisito neni naba ila mumu bok levendoxoma alipe xapmek at limixin.

Limixin Me Judaia La Lenavolo

17 La kereva nimi? Mi tong i do nemi luvuttadi me Judaia la mi nuunu at Lenavolo, la mit las nimi do mit kis esogo mi ne Moroa; 18 la miklen bok levempanga ne Moroa i vara i xusu minak lox i, la mira lok ka vam lakleklen keneng at Lenavolo xusu mina ila xaka levempanga ik mokso; 19 la mi tong lolos i do mim lam limixin kopmen dinaklen ne Moroa ngan lengkatli main, la nemi laxasep tinedi di nemen at lamain bonot, 20 la mi tong i do nemi luvuttadi loklox ase rinedi limixin loklok atdi i bilinga, la nemi luvuttadi loklox ase rinedi limixin kopmen takleklen atdi, mila keneng at Lenavolo mi ruuna levelinga axap i ruturun. 21 Mi lox ase leventaba vetpes kuren, la tila ba xopmen mina lox ase xa nimi? Mi vavang keretna, “Nemen mitap kip pilo.” Ketla nemi xa luvuttadi xipkip pilo. 22 Mi tong i xeretna, “Nemen mita velongka.” Ketla nemi luvuttadi longlongka. Mi paase vupu ri laxampoovo moroa, ketla nemi mip kip pilo ro xeneng at laraugu lotu at laxampoovo moroa. 23 Mit las nimi mi Lenavolo at ne Moroa, ketla mik lox amangan ne Moroa atla mixo mu asu Lenavolo ren. 24 Lovoang Kaala i tong i xeretna,

“Limixin kopmen me Judaia di vaase xapmek ti laasen at ne Moroa mumu loklok atnemi leme Judaia.” b 

25 Loklok ti rivit kepe lengkontuxu naba lok tooro mun taradi mo do i mumu asu Lenavolo; ketla do laradi na los polo Lenavolo, ni naba lok ngan mun mo laradi xopmen di goxo vit kepe loxontuxu ren. 26 Dola laradi xopmen me Judaia la kopmen di goxo vit kepe loxontuxu ren, ketla i mumu asu levelinga at Lenavolo, Moroa ba ven i ngan laradi diga vit kepe loxontuxu ren. 27 Nedi limixin kopmen me Judaia di mu asu Lenavolo, keke i do kopmen dina vit kepe levengkontuxu atnedi, dinaba sok taba nemi leme Judaia at laaleng ete, atla mixo mu asu levelinga at Lenavolo, keke i do ne Moroa ga raba nemi min, la miga vit kepe bok levengkontuxu atnemi.

28 Nege rinotno ni laradi me Judaia? Kopmen nom laradi i ruuna mene laasen do laradi me Judaia, la livirivit katling at labantuxu ren na lok ngan lavanga gamasa mene. 29 Ketla laradi ruturun me Judaia ni i ruuna lorooro maxat keneng teren, la diga vit katling loroonan teren, la nai ni lugugu at Loroonan Kaala at ne Moroa, kopmen at Lenavolo diga malagan i. Laradi xerepmo i lok kaka leemi asu ren boro at ne Moroa, la kopmen at limixin.

Copyright information for `MMX