Romans 3

Moroa I Ruturun Amisik

Kereva ba, limixin me Judaia di ruuna levenasen silok i volo limixin kopmen di me Judaia? Kopla di ruuna lisisilok mila diga rivit kepe lengkontuxu atnedi? Laaba, limixin me Judaia dik lox avot keneng at lodoxoma at ne Moroa, la ne Moroa ga doxoma rinotno i do ni na raba levelinga ren tidi kusu dina lok tatao i.

Naba lok ba xereva do teventaba atnedi di goxo ruturun at levendoxoma atnedi ri ne Moroa? I milik ngan ta do ne Moroa noxo ruturun ta, do? Kopmen tinotno! Moroa neni naba ruturun amisik la keke i do limixin axap laxampanga xaxarang. I ngan Lovoang Kaala i vaase i xeretna,

“Una lox asuusu i do nenu uk mokso at loxonaleng una paase; unaba vas asi levelinga i ru ram at loxonaleng di sok taba u min.” a 

La kereva ba, do laxakapmek atnedik na ravasu silok tinotno xusu limixin axap dina ven i do ne Moroa ik mokso, ataba tong ka lavanga sala? Ataba tong ka nga i do ne Moroa kopmen nak mokso atla neni i lox asongot nedik? (Na levelinga i ngan levelinga at limixin at na lavatkangka.) Kopmen tinotno! Do ne Moroa xopmen nak mokso, neni ixo epovo do na vaxaru limixin at lavatbung menemen at lavapaase. La kereva ba, do losoogong tarak na lok lisisixam la luruturun at ne Moroa na ravasu ri laxasep, ua lavasuun teren la neni naba lox asongor ia ngan laradi xapmek? Do laxapmek na lox asuusu lempanga avukat, kereva, i lox avukat ti tong asu levelinga xeretna, “Atak lok laxakapmek, kusu luvukat naba vot?” Lentaba luvuttadi diga lox asi ia la diga sok taba ia mi na levelinga! Luvuttadi di ruuna na lodoxoma, dinaba ru at lavapaase la dinaba lok ka losongsongot nop loklok atnedi.

Kopmen Taradi Nak Mokso

Kereva, nedik limixin me Judaia taba sepsu basinge lebelemamao at ne Moroa mila nedik limixin tino ren? Kopmen tinotno! Ara malagan ase vam nemi min at levelinga avot tarak do, limixin me Judaia la nedi xopmen di me Judaia, nedi axap dik lok maxopok at lololos at laxakapmek. 10 I ngan Lovoang Kaala i vaase i xeretna,

“Kopmen teta nak mokso. Kopmen tinotno tegesara go.
11 La kopmen teta ikleklen lomokmokso, kopla i puse ri ne Moroa. 12 Limixin axap digara raba arulu vam ne Moroa; la digara on pam at laxapmek; la kopmen tinotno tara na lok lempanga i lox avukat, kopmen tinotno. 13 Lorooro atdi i umsu mi laxakapmek ngan lempatmaaut; la laxaxarang ip tavasu at levenngusno atnedi, la levengkolinga sepsev amet ngan lempat sii angkang, ip tavasu at levenbulubun atnedi; 14 levenngusno atnedi i umsu mi levelinga xapmek i so mamao. 15 Soso mene nga nedi di vavara loklox asongot la dinap sev amet luvuttadi; 16 la dik paxaru levesongsongot mi lainbulu at levengkot axap nedi dit pas teren. 17 Kopmen dinaklen langas at limila, 18 la kopmen dinaklen loklok tik lox asuusu loklok ngangao ri ne Moroa.”
19 Anaa ba nedik taklen i do, levempanga axap keneng at Lenavolo, ik lok mu asu nedi dik lok maxopok at Lenavolo, kusu ri lok pepe levempapaase vepe at limixin, la na lok kaka limixin at lavatbung menemen axap kusu dinak lok maxopok at lavapaase ro melamgo at ne Moroa. 20 Kuren la kopmen tinotno taradi go, neni na mumu asu rinotno leventaangas at Lenavolo kusu ni na vee ngan laradi mokmokso at lemeren ne Moroa; la mo levempanga Lenavolo ik lox i, ik lok laradi xusu neni nabaklen i do neni ira lok pam laxapmek.

Langas Ne Moroa I Lox I Xusu Ri Lox Asepmus Limixin

21 Ketla amo nga, langas ti lok limixin ngan limixin mokmokso at lemeren ne Moroa ira ravasu vam, la kopmen tekot at Lenavolo nak lok teren. Lenavolo eburu mi levelinga at lavaeme vapaase alii di su auru i na. 22 Ketla ne Moroa ik lok li akmokso limixin mumu lunuunu atnedi saparap ne Iesu Karisito. La ne Moroa ik lox i na rinedi axap di nuunu at ne Karisito. Kopmen tevereven petpes atnedi leme Judaia la limixin kopmen me Judaia, 23 atla limixin axap digara lok pam laxapmek la digara subu kot basinge loklok mokmokso at ne Moroa. 24 Ketla ne Moroa ik lox asepmus di mumu letaba nabalamu ren at lekngen at ne Iesu Karisito, mo ga un ka amlong di. 25 Moroa ga raba ne Iesu ngan laxaavuk tinedi limixin dina nuunu do neni ga lox asu lada ren at laxaba xusu ri uu nop loklok atdi. Moroa ga lox i na xusu ri lox asuusu i do neni laradi mokmokso, mila gano migomgo neni gak lok atnaasan, la goxo reven ti laxapmek at limixin; 26 ketla ana nga at na levenaleng, neni i doxoma lolos laxapmek at limixin, kusu ri lox asaxaven loklok mokmokso ren. At na mun langas, la ne Moroa i lox asuusu i do neni xa ik mokso la ik lox asepmus limixin axap di nuunu at ne Iesu.

27 Kereva, i epovo dik taba simi dik mi lorongtonga res at Lenavolo? Kopmen tinotno. Ixo epovo do dik ta simi dik min mila nedik di nuunu. 28 La ata vaase box i xeretna do, laradi i sepmus basinge laxakapmek teren, mumu mun lunuunu la kopmen do mumu leventaangas at Lenavolo. 29 Kereva, ne Moroa neni lomoroa xusuk mun at leme Judaia? La neni xopmen lomoroa atnedi xopmen me Judaia? Laaba, neni xuren. 30 Moroa neni legesara, la neni naba lox asepmus leme Judaia mumu lunuunu atnedi, la nedi bok kopmen di me Judaia xuren, mumu bok lunuunu atnedi. 31 Kereva ba Lenavolo? Ata lok kepe nga i mila ata nuunu xusuk ta? Kopmen la kopmen tinotno, ketla ata su auru Lenavolo.

Copyright information for `MMX