aLur 15:6
cLur 17:5
dLur 15:5
eLur 15:6

Romans 4

Lavapaase Poovo At Ne Abaram

Ataba tong ka nga i do kereva mumu ne Abaram lavareme avolo at lavalabat atnedik? La neni gakleklen lavanga sala na loklok ti lox amokso laradi? Do neni ga sepmus basinge laxapmek at leven gugu neni gak lox i, neni gitaba ruuna tavanga neni gibam simi i ren. Ketla neni goxo epovo xusu na simi aurur i at lemeren ne Moroa. Lovoang Kaala i vaase xeretna,

“Abaram ga nuunu at ne Moroa, la at lunuunu mun teren la ne Moroa ga siam kaka i ngan laradi mokmokso.” a 

Laradi do i gugu, ik lok kaka luunun, luunun teren kopmen na lok ngan laramtaba, ketla ik mokso do neni na lok ka i. Do laradi xopmen na nuunu saga at leven gugu neni ik lox i, ketla i nuunu at ne Moroa mo i lox asepmus limixin dik lok laxakapmek, lunuunu mun teren i lox i la ne Moroa i siam kaka i ngan laradi mokmokso. Neni na lavasuun at levelinga at ne Devit at loxonaleng neni ga paase mumu luvukat ti mo laradi ne Moroa i siam kaka i ngan laradi mokmokso, la kopmen do at leveloklok teren ik lox i;

“Luvukat tinedi ne Moroa ga domampe laxaloklok kakapmek atnedi, la neni gara sibo pe vam laxakapmek atnedi! La luvukat ti mo laradi, Leeme Silok noxo doma rinotno bok ba laxakapmek teren.” b 

Kereva, na luvukat ne Devit ga paase min, atnedi xusuk mun di rivit kepe lengkontuxu atnedi? Kopmen. Tinedi bok kopmen dina vit kepe lengkontuxu atnedi. I ngan loxot at Lovoang Kaala i lok keretna, “Abaram ga nuunu at ne Moroa, la mumu mun lunuunu ren, ne Moroa ga siam kaka i ngan laradi mokmokso.” 10 Na luvukat ga vot tinotno at ua loxonaleng? Ga vor avot kopla, ga vot ba melemu at laaleng diga vit kepe loxontuxu at ne Abaram? Taklen i do ga vor avot, la kopmen do melemu ba. 11 Diga vit kepe loxontuxu ren ga melemu ba, la mo loklok diga lox i rin, ga lok ngan loklok katling ti lox asorun i do at lunuunu mun at ne Abaram, ne Moroa ga siam kaka i ngan laradi mokmokso, avot tinotno ri livirivit kepe loxontuxu ren. Kuren la ne Abaram i lok ngan ne temen nedik axap di nuunu at ne Moroa la dik lok keneng at lisisiam ngan luvuttadi mokmokso ren, nedi bok di goxovisi vit kepe lengkontuxu atnedi. 12 Neni ne temen nedi bok mo diga vit kepe vam lengkontuxu atnedi la diga lok ka lunuunu ngan lunuunu at ne temen nedik ne Abaram ga ruuna i, avot tinotno ri laaleng diga vit kepe loxontuxu ren.

Laxakaape At Ne Moroa Naba Sorun At Lunuunu Mene

13 Ne Moroa ga lok laxakaape eburu mi ne Abaram do lavatbung menemen axap, ateren eburu mi livipisik li ren. Na laxakaape goxo vot mumu i do ne Abaram gang tonga res at Lenavolo, ketla atla neni ga nuunu. Kuren la ne Moroa ga siam kaka i ngan laradi mokmokso. 14 Do lavanga ne Moroa ira xaape vam min kusu naba raba i rinedi ding tonga res at Lenavolo, naba lok ngan do kopmen tavasuun at lunuunu at laradi la laxakaape bok at ne Moroa neni lavanga gamasa. 15 Lenavolo ik lox asuusu lebelemamao at ne Moroa, ketla do xopmen tenavolo, kopmen bok torongtonga xepe at Lenavolo.

16 Kuren la laxakaape at ne Moroa naba sorun mun mumu lunuunu, kusu ne Moroa na lox asuusu letaba nabalamu ren la laxakaape ren naba sorun ti livipisik li axap at ne Abaram kerekngan levelinga at ne Moroa ga tong i. Kopmen do tinedi xusuk di mumu asu Lenavolo, ketla tinedi bok di nuunu ngan ne Abaram, neni ne temen nedik axap di ruuna lunuunu. 17 I ngan Lovoang Kaala i vaase i xeretna,

“Ara lok li vam u ngan ne temen limixin keneng at laranep silok buaang.” c 

Kuren la na laxakaape naba sorun ngan ne Moroa ga tong alii i la ne Abaram ga nuunu ren. Neni ne Moroa ik lox aroo luvuttadi basinge lanmet la mi levelinga mun teren neni ga rudum li levempanga goxovisi vot.

18 Ga lolos aleng ti ne Abaram kusu na nuunu ap mo laxakaape at ne Moroa rin, ketla neni ga nuunu ren la gam doma voovo rin; kuren la neni ga ravasu ngan ne temen limixin at laranep silok buaang. I ngan Lovoang Kaala i vaase i xeretna,

“Livipisik li ram naba umsu.” d 

19 Ga auret kusu levenmaares teren na lok ka lasangaun kobot (100) maares axap; ketla lunuunu ren goxo molo at levenaleng neni gam doma mumu labantuxu ren, ua gak milik ngan laradi met, kopla mumu ne Sera ga sioxo nga la ni goxo ruuna taxaalik. 20 Lunuunu ren goxo on basinge i, la neni bok goxo lox abulubun laxakaape at ne Moroa; ketla lunuunu ren ga suxa aumsu i mi lololos, la neni ga xip aurut laasen at ne Moroa. 21 Neni ga doxoma rinotno i do ne Moroa ga epovo ri lok levempanga neni ga xaape min. 22 Neni ba na lavasuun teren la ne Moroa ga siam abeles kaka i ngan laradi mokmokso mumu mun lunuunu ren saparap ne Moroa. 23 Na levelinga i vaase xeretna do,

“Moroa ga siam ka i ngan laradi mokmokso.” e 

Di goxo malagan i xusu tin kusuk mun.
24 Diga malagan box i rinedik do ne Moroa naba siam ka nedik ngan luvuttadi mokmokso, la di nuunu at neni ga lox aroo amlong ne Iesu, Leeme Silok atnedik basinge lanmet. 25 Moroa ga song araba i xusu naba met mumu laxakapmek atnedik, la ni ga roo xat amlong kusu ri lox asepmus dik.

Copyright information for `MMX