aLur 21:12
bLur 18:10,14
cLur 25:23
dMal 1:2-3
ePas 33:19
fPas 9:16
gOse 2:23
hOse 1:10
iAis 10:22-23
jAis 1:9
kAis 8:14, 28:16

Romans 9

Moroa Eburu Mi Limixin Teren

Nenia at ne Karisito la nenia axo xaxarang. Loroonan Kaala ik lok tatao lodoxoma avukat tarak la ik lok axasep box ia do nenia axo xaxarang. A paase ruturun i na dola lainbulu la lebelen tuntun tarak ti lubungmixin tarak i silok aleng. La i epovo dola nenia gita xip tutu mi lebelemamao at ne Moroa la gita lox epeseves ia basinge ne Karisito, kusu ri lok tooro luvutnetak, nedi limixin axa rak me Judaia. Nedi limixin soksoxolik ka at ne Moroa; la ni ga lok li nedi ngan luvutnitna. Ni ga lok levenekabus eburu minedi la lisisixam teren ga nemen kantubu atdi, la ga raba nedi mi Lenavolo; la diklen langas kusu dina lotu saparav i mi luruturun; la dira ruuna ka vam levengkakaape ren. Nedi lubungmixin diga ravasu at loxongkulao silok at ne Moroa me gano. La ne Karisito, neni ga vot ngan laradi, neni at nedi na lubungmixin. Ata emi asu mi laasen at ne Moroa neni i lok tatao lempanga axap la kopmen taxavaxap teren! Tuturun.

Nia axo vaase dola, ne Moroa goxo lox epovo laxakaape ren; atla kopmen limixin axap me Israel nedi limixin soksoxolik ka at ne Moroa. Nedi livipisik li at ne Abaram, ketla kopmen nedi axap luvutnitna ne Moroa. Ne Moroa ga vaase ri ne Abaram keretna,

“Lubungmixin at ne Aisak kusuk mun dinabak lok ngan livipisik li ram.” a 

Lavasuun at na xeretna, kopmen nedi axap livipisik li at ne Abaram di lok ngan lubungmixin tuturun, ketla nedi mun ne Moroa ga xaape midi ri ne Abaram di lok ngan lubungmixin tuturun at ne Abaram. La ne Moroa ga lok mo laxakaape mi na levelinga;

“Ap mo laaleng mokmokso nia anabamlong la ne Sera naba ruuna ka tamdak temes.” b 

10 Ketla kopmen neni xusuk mun na. Lumdak at ne Rabeka duga ruuna legese remen du, la neni lurubuno avolo atnedik ne Aisak. 11 Ketla avot at livipisik at na lumdak kopla du gita lok tempanga avukat kopla tempanga xapmek, ne Moroa ga lox avot be losoksoxolik teren kusu mo losoksoxolik teren naba tu at lodoxoma ren. 12 Losoksoxolik teren keretna, neni goxo ven ti lugugu atdu, ketla neni ga doma mu lorotoro ren. Kuren la ne Moroa ga lok ti nenen du xeretna,

“Lara avot naba gugu taba lara mumu.” c 

13 I ngan Lovoang Kaala i tong i xeretna,

“A vara aleng ne Jakop, ketla axo mulus ka ne Esao.” d 

14 Ataba tong ka la? Taba tong ka i do na levelinga at ne Moroa ixok mokso? Kopmen tinotno. 15 I ngan mo levelinga ne Moroa ga vaase i ri ne Moses keretna,

“Anaba lox asuusu lebelemumu rak ti nege a doma i, la anaba lox asuusu labalamu rak ti nege a doma i.” e 

16 Loklok at laradi noxo lox i xusu ne Moroa naba soxolik ka i, ketla lebelemumu xusuk mun at ne Moroa. 17 I ngan Lovoang Kaala i vaase mumu ne Parao xeretna,

“Nenia aga lok li u ngan Loorong Silok; lavasuun teren keretna, kusu anaba lox asuusu lolos tarak keneng at lorongtonga xepe ram, la keneng at nai limixin at lavatbung menemen axap dinabaklen laasen tarak.” f 

18 Kuren la ne Moroa i belemumu nedi do neni i doma di, la i lox amer avavarang levendoxoma atnedi do neni i doma box i xuren.

19 Tara atnemi naba sue ia xeretna, “Dola kuren, Moroa naba sok taba taradi xereva? La nege i epovo xusu na esev eburu mi lodoxoma at ne Moroa?” 20 Ketla nege nenu, laradi gamasa, u gagang linga ne Moroa? Ixo epovo do lavat sosopen kangka na susue laradi ik lox i do, “Tila u lox ia xeretna?” 21 Laradi ga lok mo lososopen kangka, neni xa i epovo xusu neni na lok mo loxompong kangka at langas ua i doma i xuren, la na lok bok tegepu sosopen mi mo mun legese xompong kangka, tara nunuan ti ove at levenaleng silok la tara diba vove min at levenaleng axap.

22 La ne Moroa i lok bok losoksoxolik teren kuren. Neni ga vara i xusu na lox asu lumukmusak teren la na lox ase lololos teren, ketla neni move naba ke amulus nedi limixin dik lox abelemamao i, keke i dola nedi limixin kapmek la i epovo xusu neni na sele utut nedi. 23 La ni ga vara box i xusu neni na lox asu lagale lisisixam teren, no ni ga soli asu i rinedik limixin ua neni ga belemumu dik, la ti nege atdik no neni gara gagas pam di xusu dinaba lok kaka lisisixam teren, 24 mo nabak lok tinedik na, neni gara ro ka vam nedik, kopmen do at limixin me Judaia xusuk mun, ketla boro bok at limixin kopmen di me Judaia. 25 I ngan neni ga vaase i ro xeneng at lubuk at ne Osea xeretna,

“Limixin di goxo ruuna ka ia, nia anaba tong di do nedi limixin tarak. Lara lubungmixin no nenia a goxo xok di, anaba tong di do nedi at laxat tinotno rak.” g 

26 La neni ga lok bok,

“La to ap mo loxot tino neni ga tong i do, nemi xopmen limixin tarak, mogo neni naba tong di do nedi luvutnitna ne Moroa, mo i rooro.” h 

27 La ne Aisaia ga vaase mumu bok leme Israel keretna,

“Limixin bok me Israel di buaang aleng ngan levenit kangkaneng nou saparap laras, ketla teventaba mun atdi naba roo suu.
28 Leeme Silok naba lok soso mun ti vorang laxakapmek at limixin at lavatbung menemen axap.” i 

29 I ngan ne Aisaia gara tong pam i gano, ni ga lok keretna,

“Amo dola Leeme Silok i lolos aleng gi toxo ke xepe lavalabat atnedik, nedik na gitaba lok kapmek ngan limixin me Sodom, nedik gitaba uu ngan limixin me Gomora.” j 

Lorongtonga Xepe At Leme Israel

30 Ataba tong ka toxolinga salai? Do limixin kopmen di me Israel, nedi di goxok lok tong i xusu dinak mokso at lemeren ne Moroa, ketla diga sepmus mene mumu lunuunu atnedi. 31 Ketla leme Judaia, nedi lavaanat soksoxolik ka at ne Moroa diga puse ri teventaangas kusu dina nemen mokmokso at lemeren ne Moroa, la di goxo epovo. 32 Tila ba la di goxo epovo? Atla levempanga diga lox i goxo ru rinotno at lunuunu atdi, ketla at leven gugu mun atdi. Digak sak kikixin at luat, 33 no Lovoang Kaala i paase min keretna,

“Mina ven ba i, a lok li luat to xeneng at lemenemen Saion ti lok limixin dinaba sak kikixin teren. Mo luat naba lok nedi dina subu. Ketla nege do i nuunu ren, neni noxo doma saasaa.” k 

Copyright information for `MMX