Titus 2

Leveloklox Ase Nunuan Ti Luvuttadi Nuunu

Ketla nenu ne Taitas, una lox ase limixin nuunu mi loklok nunuan ik sixit eburu mi levelinga at ne Moroa. Una lox ase luvuttadi mukun keretna; di noxo inin tangtangku mi laxadan lolos; dinam tebeng loklox avukat kusu limixin dina lok ngangao atdi. Levempanga axap dina lox i, na lox avukat mun la lunuunu atnedi nak mokso rinotno. Dina umsu mi labalamu. Dola teventaba dina lok tong pen di, di noxo subu, ketla diba tu lolos at lunuunu atdi.

La kerepmo bok una tong i ri lavakin mukun keretna: luruptuvuk atnedi na dadat la na xaala, di noxo tere mumu tara, di noxo inin amisik lengkadan lolos. Ketla loklok nunuan na ravasu at lorooro atdi, kusu limixin dina ven di la dina mumu asu nom loklok nunuan atdi. Loklok atdi na lox avukat, kusu dina ba epovo na tong asu levelinga ri lavakin maxat keretna; dina balamu lavatlok atdi la dina balamu laxamdak mi laxaalik atdi. Dina mumu asu loklox avukat; luruptuvuk atdi na dadat; dina gugu avukat to xolonu atdi; dina lok tooro limixin axap; dinang tonga res at levelinga at lavatlok atdi. Dina mumu asu luruptuvuk nunuan, kusu limixin ma xamang at lotu di noxo epovo na tong i do levelinga at ne Moroa i lok kapmek.

La kerepmo bok una tong i ri luvuraau maxat do dina mumu asu loklox avukat. At levempanga axap nenu una lok leveloklok i nunuan ngan lampoovo ridi xusu nedi bok dina lok levempanga nunuan. Dola una lox ase limixin, una paase ruturun tidi la levelinga ram nak sixit nunuan, la una vavang bok mi levelinga nunuan, kusu nedi di munepen midik, di noxo epovo na vaase mumu dik, ketla diba lok mamangan.

La una tong i ri lavasaxaruki do nedi dinang tonga res at luvuttadi amgomgo atdi at levempanga axap; la dina gugu avukat kusu luvuttadi amgomgo atdi diba lok momo mi lugugu atdi; la nemen di guta vorang linga mi levelinga xapmek ti luvuttadi amgomgo atdi. 10 Nemen ditap kip pilo xaka levempanga at luvuttadi amgomgo atdi; ketla dina mumu asu loklok nunuan kusu luvuttadi amgomgo atdi diba ven i, do di epovo na gugu avukat at levempanga axap. Dina mumu asu na leveloklok kusu limixin kopmen dina nuunu at ne Iesu dinaba ven kibis i do levelinga at ne Moroa, leeme loklox arooro atdik, i lox avukat tinotno.

11 Nom limixin nuunu dina mumu asu avukat levelinga at ne Moroa, mila ne Moroa ga lox asuusu letaba nabalamu ri limixin axap, neni ga riki ne Iesu Karisito xusu na lox arooro di. 12 Kuren la ata ke xepe leveloklok kakapmek keretna; dina ke xepe lorooro xapmek; nemen dik ta puse lolos ti levempanga at na lavatbung menemen; nemen dik gutak lok tangtangku, ketla lorooro atdik na dadat; la ata lok mo levempanga ne Moroa i vara i at na lavatbung menemen kopok. 13 La kerepmo atam tebeng loklox avukat ap mo levenaleng atat kis tangais ti mo langsangan laaleng avukat, la lovotpot nunuan at ne Iesu Karisito, neni ne Moroa silok atdik la neni Leeme Loklox Arooro atdik; neni naba rupot mi lisisixam silok at ne Temen. 14 Neni ga raba i xusu neni na un kaka amlong nedik basinge laxakapmek atdik ngan limixin dadat la kusu tana nemen ngan limixin teren kusuk mun la tana lolos ti lok leven gugu nunuan.

15 Na levelinga a tong pam i ru, ne Taitas, una anasa limixin me Krit min, kusu una lox alolos lorooro atdi mi na levelinga; la kerepmo bok una vaase sok di, atla kopmen torooro avukat atdi. La tara atdi guta lox abulubun kepe u, mila nenu leeme vapaase at ne Moroa.

Copyright information for `MMX